(ភ្នំពេញ)៖ នៅរសៀលថ្ងៃទី០៣ ខែធ្នូ ឆ្នាំ២០១៨ សមត្ថកិច្ចជំនាញ នៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនជនសង្ស័យ០៣នាក់ ជាចោរលួចទៅកាន់សាលាដំបូងរាជធានីភ្នំពេញ ដើម្បីផ្ដន្ទាទោសតាមច្បាប់។
ករណីនេះកើតឡើង នៅរសៀលថ្ងៃទី០១ ខែធ្នូ ឆ្នាំ២០១៨ នៅចំណុច ផ្ទះលេខ៤ ផ្លូវM១៤ គំរោង៤ បុរីប៉េងហួត ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ ដែលបង្កឡើងដោយជនសង្ស័យ០៣នាក់ បានធ្វើសកម្មភាពលួច ឆ្កិះ សោរ ផ្ទះមូយកន្លែងនៅចំណុចខាងលើ ដើម្បីលួចទ្រព្យសម្បត្តិ តែក្នុងពេលធ្វើសកម្មភាព ពួកគេត្រូវបានកម្លាំងល្បាតមូលដ្ឋាន អាវុធហត្ថខណ្ឌច្បារអំពៅ ឃើញក៏ឃាត់ខ្លួនភ្លាមៗតែម្តង។
មន្ដ្រីអាវុធហត្ថរាជធានីភ្នំពេញ បានឲ្យដឹងថា ជនសង្ស័យទាំង៣នាក់នេះរួមមាន ទី១៖ឈ្មោះ រ៉ាន រតនៈ ហៅខ្មៅ ភេទប្រុស អាយុ២៣ឆ្នាំ, ទី២៖ឈ្មោះ សេង សុធឿន ហៅខុង ភេទប្រុស អាយុ២៦ឆ្នាំ និងទី៣៖ឈ្មោះ អ៊ុន យ៉ាឡូ ហៅនោ ភេទប្រុស អាយុ៣៦ឆ្នាំ។
ក្រោមវិធានការជំនាញ នៃការសាកសួររបស់សមត្ថកិច្ចជំនាញ នៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ នៅមុនធ្វើសកម្មភាព ពួកគេទាំង០៣នាក់ បានជក់គ្រឿងញៀន ជាមួយគ្នានៅម្តុំក្រោយអគ្គីសនីវត្តភ្នំ ក្រោយពេលជក់រួចពួកគេ បាននាំគ្នាទៅបុរីប៉េងហួត នៅភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ ដោយជិះម៉ូតូ០១គ្រឿង ម៉ាកសង់កូរ៉េ (ចាស់) ក្នុងគោលបំណងទៅរកលួចម៉ូតូនៅទីនោះ ពេលទៅដល់ពួកគេបានដើរសំដៅទៅផ្ទះមួយកន្លែង។
ពេលទៅដល់ពួកគេបានគោះទ្វារ តែគ្មានមនុស្សបើក បន្ទាប់មកបានធ្វើសកម្មភាពឆ្កិះសោរផ្ទះនោះ តែឆ្កិះមិនបានព្រោះតែម្ចាស់ផ្ទះប្រើសោរប្រភេទ សូឡិច ក្នុងពេលជាមួយគ្នានោះដែរ កម្លាំងអាវុធហត្ថមូលដ្ឋានខណ្ឌច្បារអំពៅ ល្បាតឃើញបានឃាត់ខ្លួនពួកគេទាំង០៣នាក់ យកមកទីបញ្ជាការដ្ឋាន កងរាជអាវុធហត្ថរាជធានីភ្នំពេញ ដើម្បីធ្វើការឃុំខ្លួនបណ្តោះអាសន្ន រងចាំធ្វើការសួរចម្លើយ និងកសាងសុំណុំរឿងបញ្ជូនទៅតុលាការ ដើម្បីផ្តន្ទាទោសតាមនិតិវិធីច្បាប់ ក្រោមទម្ងន់ទោសជាក់ស្តែងរបស់ពួកគេ។
ក្នុងចំណោមពួកគេទាំង០៣នាក់នោះ ឈ្មោះ រ៉ាន រតនៈ ហៅខ្មៅ បានសារភាពឲ្យដឹងបន្ថែមទៀតថា កន្លងមកកាលពីថ្ងៃទី០៨ ខែឧសភា ឆ្នាំ២០១៧ រូបគេធ្លាប់ជាប់ពន្ធនាគារព្រៃសរ ពីបទលួច (កាច់កញ្ចក់រថយន្ត) ហើយបានចេញមកវិញ នៅថ្ងៃទី០៨ ខែឧសភា ឆ្នាំ២០១៨ ក្រោយពេលចេញពីពន្ធនាគារមកវិញ រូបគេ និងបក្សពួកឈ្មោះ កូការ, ឈ្មោះ ធី និងឈ្មោះ ភណ្ឌ បានបន្តធ្វើសកម្មភាពលួចកាច់ ក ម៉ូតូ បន្តទៀត ជាច្រើនលើក ច្រើនសារ បានសម្រេចនៅតាមបណ្តាខេត្ត ដែលជាប់រាជធានីភ្នំពេញ ហើយបានយកម៉ូតូដែលលួចបាននោះ ទៅលក់នៅខេត្តកំពង់ស្ពឺ។
ជនសង្ស័យរូបនេះ បានបន្តទៀតថា កាលពីថ្ងៃទី២៣ ខែវិច្ឆិកា ឆ្នាំ២០១៨ រូបគេ រួមនិងឈ្មោះ កូការ, ឈ្មោះ ខេលី បានធ្វើសកម្មភាពកាច់ ក ម៉ូតូ០១គ្រឿង ម៉ាកវ៉េវ ពណ៍ក្រហមលាយខ្មៅ បានសម្រេចដោយឈ្មោះ ខេលី ជាអ្នកយកទៅលក់ ហើយបានឲ្យបា្រក់មកខ្លួន២០០ដុល្លារ៕
ប្រភព៖ freshnews
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
