ផ្លែប៉ោមអាចចាត់ជាអាហារសម្រន់មួយដ៏សំខាន់ដែលផ្តល់ជីវជាតិយ៉ាងសំបូរបែបសម្រាប់រាងកាយ និងខួរក្បាល។ ផ្លែឈើមួយប្រភេទនេះសំបូរទៅដោយសារធាតុចិញ្ចឹមរាប់តាំងពី វីតាមីន សារធាតុរ៉ែ សារធាតុសរសៃ ជាពិសេសសារធាតុប្រឆាំងនឹងជាតិពុល។ សារធាតុទាំងនេះសុទ្ធសឹងជាតម្រូវការនៃសរីរាង្គយើង (បេះដូង ប្រព័ន្ធរំលាយអាហារ សរសៃឈាម ជាដើម) និងខួរក្បាលទៀតផង។
ខាងក្រោមជាប្រភេទនៃសារធាតុចិញ្ចឹម និងអត្ថប្រយោជន៍នៃសុខភាពទទួលបានពីការទទួលទានផ្លែប៉ោម៖
១. ផ្លែប៉ោមជាប្រភពនៃវីតាមីន C
វីតាមីនសេ ជាប្រភេទវីតាមីនមានសារៈសំខាន់ចាំបាច់អាចការពារកោសិកាពីការខូចខាត។ វាចូលរួមចំណែករក្សាបរិមាណគ្រាប់ឈាមក្រហមឲ្យនៅថេរ ការពារពីជំងឺខ្វះជាតិដែក បន្ថយសម្ពាធឈាមមកនៅធម្មតា ការពារយើងពីជំងឺលើសឈាម ពង្រឹងប្រព័ន្ធភាពស៊ាំរាងកាយបានយ៉ាងល្អប្រឆាំងជំងឺផ្សេងៗ ការពារពីការបាត់បង់ការចងចាំនិងសតិស្មារតី ជាពិសេសវីតាមីននេះល្អខ្លាំងសម្រាប់សុខភាពមាត់ធ្មេញដោយសារវាអាចការពារនិងប្រឆាំងជំងឺអញ្ចាញធ្មេញ។
២. ផ្លែប៉ោម ជាប្រភពនៃសារធាតុសរសៃ
ផ្លែប៉ោមសំបូរសារធាតុសរសៃជាច្រើនចូលរួមចំណែកយ៉ាងសកម្មនាំយកសារជាតិកូលេស្តេរ៉ុលជាប់តាមប្រព័ន្ធរំលាយអាហារ និងសរសៃឈាម ចេញពីក្នុងខ្លួន។ វាជួយកាត់បន្ថយកូលេស្តេរ៉ុលមិនល្អ និងជួយដល់ការសម្រកទម្ងន់ផងដែរ។
តាមរយៈការសិក្សាស្រាវជ្រាវមួយលើស្ត្រីចំនួន១៦០នាក់ចែកជាពីរក្រុម (ចន្លោះអាយុ ៤៥ឆ្នាំដល់៦៥ឆ្នាំ) បានបង្ហាញលទ្ធផលថា ស្ត្រីមួយក្រុមដែលហូបផ្លែប៉ោមរាល់ថ្ងៃ សារធាតុកូលេស្តេរ៉ុលមានការធ្លាក់ចុះបានដល់ ២៣%។ ការកាត់បន្ថយសារធាតុកូលេស្តេរ៉ុលនេះបានដើរតួនាទីមួយដ៏សំខាន់ដល់ការកាត់បន្ថយហានិភ័យនៃជំងឺទាក់ទងនឹងបេះដូង។
លើសពីនេះសារធាតុសរសៃបានដើរតួនាទីយ៉ាងសំខាន់ដល់ប្រព័ន្ធរំលាយអាហារ ជួយដល់ការស្រូបយកសារធាតុចិញ្ចឹមពីចំណីអាហារ និងសម្រួលដល់ការដឹកនាំកាកសំណល់បញ្ចេញចោល។
៣. ផ្លែប៉ោម ជាប្រភពនៃវីតាមីន B
វិតាមីនB ជាសារធាតុសរីរាង្គយ៉ាងសំខាន់ ព្រោះស្ទើរតែរាល់ប្រតិកម្មក្នុងរាងកាយរបស់យើងពាក់ព័ន្ធជាមួយវា។ វីតាមីននេះជួយបំបែកស្ករនិងខ្លាញ់សម្រាប់ជាថាមពលនិងលំនឹងនៅក្នុងខ្លួនប្រាណ។ វាជួយសំយោគឡើងវិញនូវអាស៊ីតអាមីណេ ដែលជាទម្រង់តូចល្អិតបង្កើតរាល់ប្រូតេអ៊ីនទាំងឡាយ។ ក្រៅពីនេះវីតាមីនB បានចូលរួមចំណែកសាងសង់ស្រទាប់ខាងក្រៅរបស់កោសិកា ផលិតថាមពល កំចាត់ជាតិពុលពីរាងកាយ ថែមទាំងផលិតអរម៉ូនមួយចំនួន។ ជាពិសេសវាជាវីតាមីនដ៏សំខាន់សម្រាប់ទ្រទ្រង់សុខភាពខួរក្បាល បង្កើនការចងចាំ និងការគិតពិចារណា។
៤. ផ្លែប៉ោម ជាប្រភពនៃវីតាមីនE
វីតាមីនE ជាប្រភេទវីតាមីនប្រឆាំងនឹងការជ្រីវជ្រួញនៃស្បែក។ វាជាសារធាតុដ៏សំខាន់ប្រឆាំងនឹងពពួកជាតិពុលដែលបំផ្លាញកោសិកា។ ហេតុនេះហើយវាល្អសម្រាប់ការរក្សាសម្ជស្សឲ្យនៅក្មេងជាងវ័យ និងការលូតលាស់នៃសក់។ ក្រៅពីនេះ ខ្លួនប្រាណយើងត្រូវការវីតាមីននេះ សម្រាប់ពង្រឹងប្រព័ន្ធភាពស៊ាំរាងកាយ ប្រឆាំងបាក់តេរី វីរុស ជាដើម។ វាការពារពីការស្ទះសរសៃឈាមតាមរយៈការពង្រីកសរសៃឈាម។ ជាពិសេសជួយរក្សាសុខភាពបេះដូងនិងប្រឆាំងជំងឺបេះដូងទាំងឡាយ បន្ថយហានិភ័យនៃជំងឺមហារីក និងបង្កើនសមត្ថភាពខួរក្បាល៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]