ប៊ែលហ្ស៊ិក ស្គាល់រសជាតិបរាជ័យធ្ងន់ករ ក្រោមថ្វីជើងក្រុមស្វីស ដោយលទ្ធផល ៥-២ (មានវីដេអូ)

បរទេស៖ ក្រុមជម្រើសជាតិប៊ែលហ្ស៊ិក បានភ្លាត់ចាញ់ក្រុមម្ចាស់ផ្ទះស្វីស នាកីឡដ្ឋាន Swissporarena ដោយលទ្ធផលសឹងតែមិនគួរឲ្យជឿ ពោលគឺចាញ់ដល់ទៅ ៥-២ ឯណោះនៅក្នុងពានរង្វាន់ UEFA Nations League កាលពីយប់មិញនេះ។

ស្របពេលដែល ក្រុមលេខ ៣នៅព្រឹត្តការណ៏បាល់ទាត់ពិភពលោកឆ្នាំ ២០១៨នេះ ជាអ្នកស៊ុតគ្រាប់បាល់២គ្រាប់នាំមុខមុន ដែលអាចរកបានខ្សែបម្រើប្រយុទ្ធ Thorgan Hazard នៅនាទីទី២ និងនាទី១៧ ខណៈដែលក្រុមម្ចាស់ផ្ទះស្វីសបានសងវិញដល់ទៅ ៣គ្រាប់នៅក្នុងតង់ទី១ ពោលគឺរកបានដោយ ខ្សែការពារ Ricardo Rodríguez និងខ្សែប្រយុទ្ធទោល Haris Seferović ដល់ទៅ ២គ្រាប់នៅនាទីទី៣១ និងនាទីទី៤៤ ហើយលទ្ធផល ៣-២នេះបានរក្សារហូតដល់បញ្ចប់វគ្គទី១។

យ៉ាងណាមិញ នៅក្នុងតង់ទី២ ក្រុមជម្រើសជាតិស្វីសនៅតែរក្សាភាពខ្លាំងរបស់ពួកគេ ដោយអាចស៊ុតបន្ថែម២គ្រាប់ទៀតដោយ ខ្សែការពារ Nico Elvedi នៅនាទីទី ៦២ និងមួយគ្រាប់ទៀតដោយខ្សែប្រយុទ្ធទោល Seferović ដដែលនៅនាទីទី៨៤ ហើយលទ្ធផល ៥-២នេះគឺគ្រាប់គ្រាន់អាចនឹងឲ្យក្រុមម្ចាស់ផ្ទះស្វីសឡើងទៅឈរកំពូលតារាងពូលទី២នៃពានរង្វាន់ UEFA Nations League បានហើយ។

សូមបញ្ជាក់ផងដែរថា ក្រុមខ្លាំងចំនួន ៣ ដែលទទួលបានចំណាត់ថ្នាក់កាលពីលេងនៅក្នុងព្រឹត្តិការណ៍បាល់ទាត់ពិភពលោកឆ្នាំ ២០១៨នេះសុទ្ធតែបានចាញ់រៀងៗខ្លួន ដោយក្នុងនោះរួមមានដូចជា ក្រុមម្ចាស់ជើងឯកបារាំងបានបរាជ័យក្រោមថ្វីជើងក្រុមជម្រើសជាតិហូឡង់នៅក្នុងលទ្ធផល ២-០, ក្រុមចំណាត់ថ្នាក់លេខ២ ក្រូអាត បានបរាជ័យក្រោមថ្វីជើងក្រុមជម្រើសជាតិអង់គ្លេស ដោយលទ្ធផល ២-១ និងចុងក្រោយនេះក្រុមលេខ៣ ប៊ែលហ្ស៊ិក បានភ្លាត់ចាញ់ក្រុមជម្រើសជាតិស្វីស នៅក្នុងលទ្ធផល ៥-២៕

• វីដេអូ