Conor McGregor ផ្អាកប្រដាល់មួយរយៈ បែកគំនិតរកស៊ីលក់ស្រាវិញ ទទួលបានជោគជ័យកាក់កបខប់ៗ

បរទេស៖ បន្ទាប់ពីអ្នកប្រដាល់មុខឌឺ Conor McGregor បានចាញ់អ្នកប្រដាល់ Khabib Nurmagomedov កាលពីលើកមុនមក។ លោកក៏បានផ្អាកការប្រដាល់មួយរយៈ រួចក៏បែកគំនិតបើកអាជីវកម្មលក់ស្រាវីស្គី។ មួយរយៈចុងក្រោយនេះ យើងឃើញថា ការរកស៊ីរបស់លោកពិតជាទទួលបានការគាំទ្រ និងជោគជ័យខ្លាំងមែនទែន រហូតទល់តែស្រាវីស្គីរបស់លោកលក់អស់ពីស្តុក។

លោកបានថ្លែងថា “ជាទូទៅ ខ្ញុំគ្មានមូលហេតុត្រូវសូមទោសគេទេ ប៉ុន្តែលើកនេះ ខ្ញុំពិតជាសូមទោសដល់អ្នករាល់គ្នាពិតមែនចំពោះបញ្ហាអស់ស្តុកនេះ។ កាលពីអាទិត្យមុន ខ្ញុំបានទៅរោងចក្រផលិតស្រា ហើយពួកយើងគ្រោងរៀបចំ និងដឹកជញ្ជួនស្រាវីស្គីទាំងនេះទៅ អៀរឡង់ និងអាមេរិកនៅដើមខែធ្នូនេះ ដូច្នេះនៅដើមខែធ្នូទៅ វានឹងមានស្តុកវិញហើយ។”

ស្រាវីស្គីម៉ាក Proper Twelve របស់លោក គ្រាន់តែរយៈពេល ១០ ថ្ងៃសោះលក់បានរាប់សិនលានដប ដូច្នេះ វាពិតជាហួសការរំពឹងទុករបស់លោកពិតមែន ហើយនេះគឺជាមូលហេតុដែលវាអស់ស្តុកលឿនដូច្នេះ។

លោក McGregor បាននិយាយថា “មានមនុស្សរាប់ពាន់លាននាក់ជុំវិញពិភពលោកបានផ្ញើសារមកគាត់ ចង់ទិញស្រាវីស្គីនេះ។”

គួររម្លឹកផងដែរ លោក McGregor បានបង្កើតអាជីវកម្មលក់ស្រាវីស្គីនេះជាងមួយឆ្នាំមកហើយ ហើយលោកពិតជារកស៊ីបានកាក់កបខ្លាំងមែនទែន៕ 

• ជំនួញ