ឈីលី៖ ខ្សែប្រយុទ្ធក្លិបបិសាចក្រហម Manchester United កីឡាករ Alexis Sanchez បានខកចិត្តយ៉ាងខ្លាំង បន្ទាប់ពីរូបគេបានស៊ុតបាល់ពិន័យ ១១ម៉ែត្រមិនចូលទីក្រុមជម្រើសជាតិកូស្តារីកា ដែលបណ្ដាលឲ្យក្រុមជម្រើសជាតិឈីលីរបស់គេត្រូវចាញ់ ការប្រកួតមិត្តភាពអន្ដរជាតិនៅក្នុងលទ្ធផល ៣-២។
អតីតខ្សែប្រយុទ្ធក្រុមកាំភ្លើងធំ Arsenal រូបនេះ មានឱកាសទាត់បាល់ពិន័យ ១១ម៉ែត្រនៅក្នុងនាទីទី៨២ នៅពេលដែលខ្សែការពារ Kendall Waston របស់ក្រុមជម្រើសជាតិកូស្តារីកា បានទៅទាញស្មារបស់គេឲ្យដួលនៅក្នុងប្រអប់គ្រោះថ្នាក់ ប៉ុន្តែរូបគេបែរជាភ្លាត់ស៊ុតមិនចូលទីក្រុមភ្ញៀវទៅវិញ។
យ៉ាងណាមិញ ខ្សែប្រយុទ្ធវ័យ ២៩រូបនេះ នៅតែអាចរកគ្រាប់បាល់ឲ្យក្រុមជម្រើសជាតិឈីលីបានចំនួន ១គ្រាប់ផងដែរ សម្រាប់ការប្រកួតមិត្តភាពអន្ដរជាតិនេះ គឺធ្វើបាននៅនាទីទី៩០ ដោយការខាប់បាល់បញ្ចូលទីបានយ៉ាងល្អ។
គូរឲ្យដឹងថា គ្រាប់បាល់ ៣របស់ក្រុមជម្រើសជាតិកូស្តារីកា គឺរកបានដោយខ្សែការពារ Kendall Waston ចំនួន ២គ្រាប់ និងខ្សែការពារ Ronald Matarrita ចំនួន ១គ្រាប់ ខណៈដែល ២គ្រាប់របស់ក្រុមជម្រើសជាតិឈីលីវិញ រកបានដោយខ្សែការពារ Sebastián Vegas និងខ្សែប្រយុទ្ធ Alexis Sanchez៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
