មិនធម្មតា! Sterling ក្លាយជាកីឡាករអង់គ្លេសទី១ ដែលមានប្រាក់ចំណូលខ្ពស់ជាងគេ ទាំងក្លិបទាំងក្របខណ្ឌ នៅ PL

អង់គ្លេស៖ ខ្សែប្រយុទ្ធ Raheem Sterling បានក្លាយទៅជាកីឡាករអង់គ្លេសទី១ ដែលមានប្រាក់ចំណូលខ្ពស់ជាងគេនៅក្នុងក្លិបមេឃខៀវ Manchester City ក៏ដូចជាប្រចាំនៅក្របខណ្ឌ Premier League ផងដែរ។

បន្ទាប់ពី ខ្សែប្រយុទ្ធក្រុមជម្រើសជាតិអង់គ្លេសរូបនេះ បានសម្រេចបន្តកុងត្រាថ្មីជាមួយក្រុមម្ចាស់ជើងឯកក្របខណ្ឌលីកកំពូលរបស់អង់គ្លេសកាលពីរដូវកាលមុន រូបគេបានក្លាយទៅជាកីឡាករដែលអាចរកប្រាក់ចំណូលបានច្រើនជាងគេបង្អស់នៅក្នុងក្លិប គឺរហូតដល់ ៣០មឺុនផោនក្នុងមួយសប្ដាហ៍ ហើយនៅក្នុងក្រុមជម្រើសជាតិវិញរូបគេក៏អាចទទួលបានប្រាក់ចំណូលរហូតដល់ ១៨មឺុនផោនក្នុងមួយសប្ដាហ៍ផងដែរ។

យ៉ាងណាមិញ នៅក្នុងការប្រកួតនៃពានរង្វាន់ Carabao Cup រវាងក្រុម Manchester City និងក្រុម Fulham កាលពីយប់មិញ គេសង្កេតឃើញថាអតីតខ្សែប្រយុទ្ធក្រុមហង្សក្រហម Liverpool រូបនេះបានត្រឹមតែអង្គុយនៅកៅអីបម្រុងតែប៉ុណ្ណោះ ក៏ប៉ុន្តែការប្រកួតនេះក្រុមរបស់គេបានយកឈ្នះក្រុមភ្ញៀវដោយលទ្ធផល ២-០ ផងដែរ។

គួរឲ្យដឹងថា ក្លិប Manchester City បានសម្រេចផ្ដល់កិច្ចសន្យាថ្មីដល់ខ្សែប្រយុទ្ធ Raheem Sterling ចំនួន ៥ឆ្នាំបន្តទៀតពោលគឺរហូតដល់ឆ្នាំ ២០២៣តែម្តង ហើយចំពោះទំហំនៃទឹកប្រាក់នៅក្នុងកិច្ចសន្យាថ្មីនេះដែរ ខ្សែប្រយុទ្ធរូបនេះអាចនឹងទទួលបានចំណូលមិនតិចជាង ១០០លានផោននោះទេសម្រាប់កាដូនៅក្នុងរដូវកាលថ្មីនេះ៕