El Clasico សែ្អកនេះ នឹងមិនមានវត្ដមាន Ronaldo និង Messi ជាលើកដំបូងក្នុងរយៈពេលជាង ១ទសវត្សរ៍

អេស្ប៉ាញ៖ ការប្រកួតដ៏ធំរបស់លីកកំពូលអេស្ប៉ាញ ពោលគឺការប្រកួតរវាងក្រុម Barcelona ដែលនឹងត្រូវបើកទ្វារកីឡដ្ឋានរបស់ពួកគេ ស្វាគមន៍ក្រុមអធិរាជស Real Madrid គឺនឹងពុំមានវត្ដមានកំពូលកីឡាករឆ្នើម២រូបឡើយ គឺខែ្សប្រយុទ្ធ Lionel Messi និង Cristiano Ronaldo។ 

Ronaldo បានធើ្វការផ្លាស់ចេញពីក្រុមម្ចាស់ពានរង្វាន់ Champions League ១៣សម័យ ក្រោយចំណាយពេលជាមួយពួកគេអស់រយៈពេល ៩ឆ្នាំ និងបានក្លាយជាកីឡាករដែលស៊ុតបញ្ចូលទីច្រើនជាងគេប្រចាំប្រវត្ដិសាស្រ្ដក្លិប។ រូបគេបានចូលរួមជាមួយក្រុមសេះបង្កង់ Juventus ក្នុងតម្លៃ១០០លានផោន និងបានស៊ុតបញ្ចូលទីបានចំនួន ៥គ្រាប់ហើយគិតត្រឹមពេលនេះ។

ដោយឡែក កីឡាករជម្រើសជាតិអាហ្សង់ទីន Messi វិញ បានរងរបួសដៃ ហើយនឹងត្រូវខកខានមិនបានជួយក្រុមអស់ចំនួន៣សប្ដាហ៍។ កីឡាករវ័យ៣១ឆ្នាំនេះ បានរងរបួសដៃខាងស្ដាំដែលមើលទៅទំនងដូចជាធ្ងន់ដែរ ក្រោយពីរូបគេព្យាយាមប្រជែងយកបាល់ ក្នុងការប្រកួតដែលក្រុមម្ចាស់ផ្ទះ Barcelona បំបាក់ក្រុមខ្លាំង Sevilla ក្នុងលទ្ធផល ៤-២ កាលថៃ្ងសៅរ៍ សប្ដាហ៍មុន។

ដូច្នេះការបាត់បង់ខែ្សប្រយុទ្ធទាំង២នេះ នឹងធើ្វឲ្យការប្រកួតដ៏ធំដែលត្រូវគេដាក់ឈ្មោះថា El Clasico នឹងត្រូវប្រកួតដោយគ្មានពួកគេជាលើកដំបូង ក្នុងរយៈពេល ១០ឆ្នាំចុងក្រោយ៕