Oppo នាំអ្នកសារព័ត៌មានប្រចាំ South Asia មកប្រទេសចិន មើលរូបរាង R17 Pro ដែលអាចនឹងមានលក់នៅកម្ពុជា!

ចិន៖ ក្រុមហ៊ុន Oppo ដែលជាក្រុមហ៊ុនទូរស័ព្ទលំដាប់ថ្នាក់ទី៤ នៅលើពិភពលោក កាលពីពេលថ្មីៗនេះ បានផ្តល់ឱកាសដល់អ្នកសារព័ត៌មានប្រចាំនៅក្នុងតំបន់ South Asia ក៏ដូចជាសារព័ត៌មាន Khmerload បានទៅទស្សនាផ្ទាល់ ដល់ការិយាល័យ ក៏ដូចជារោងចក្រតំឡើងស្មាតហ្វូនផ្ទាល់ នៅក្នុងទីក្រុងសិនជិន ដែលជាតំបន់ឧស្សាហកម្មដ៏ធំមួយនៅក្នុងប្រទេសចិន។

ក្នុងដំណើរទស្សនកិច្ចមួយនេះ ក្រុមហ៊ុន Oppo បានបង្ហាញថា ចំណុចខ្លាំងដែលធ្វើឲ្យខ្លួន ក្លាយជាក្រុមហ៊ុនវ័យក្មេង អាចឈរជើងនៅក្នុងចំណាត់ថ្នាក់លេខ៤ បាននោះ ក៏ដោយសារតែក្រុមហ៊ុន Oppo មានបុគ្គលិកវ័យក្មេង អាយុក្រោម៣០ឆ្នាំ ដែលពួកគេអាចយល់ច្បាស់ពីតម្រូវការរបស់យុវវ័យផ្ទាល់តែម្តង។

ប៉ុន្តែអ្វីដែលគួរឲ្យចាប់អារម្មណ៍ជាងនេះទៅទៀតនោះ គឺក្រុមហ៊ុន Oppo បានបង្ហាញទូរស័ព្ទថ្មីមួយគ្រឿង ឲ្យក្រុមការងារ Khmerload បានចាប់កាន់ដំបូងបំផុត ក៏ដូចជាបានប្រើប្រាស់នូវបច្ចេកវិទ្យាថ្មីបំផុតមួយរបស់ Oppo នោះគឺ Oppo R17 Pro ដែលមិនទាន់មានលក់នៅក្នុងប្រទេសកម្ពុជានៅឡើយទេ។

ស្មាតហ្វូន R17 Pro មួយនេះ បានបំពាក់នូវបច្ចេកវិទ្យាដ៏ទំនើបចុងក្រោយរបស់ Oppo បូករួមទាំងការថតរូបបែប 3D ការថតរូបបានច្បាស់ល្អ ទោះបីស្ថិតក្នុងកម្រិតពន្លឺទាប និងបច្ចេកវិទ្យាសាកថ្មលឿនដំបូងបំផុត ដែលត្រូវបានបង្កើតឡើងដោយក្រុមហ៊ុន Oppo ផ្ទាល់។

តែទោះជាយ៉ាងណាយើងនៅមិនទាន់ទទួលបានព័ត៌មានច្បាស់លាស់នៅឡើយទេថា Oppo R17 Pro អាចមានលក់នៅក្នុងប្រទេសកម្ពុជា បានក្នុងពេលណា។ ដូច្នេះមានតែរងចាំតាមដានព័ត៌មានបន្តពីក្រុមការងារ Khmerload ជាបន្តទៀត៕

• រូបភាព