ខេត្តកណ្តាល ៖ គ្រោះថ្នាក់ចរាចរណ៍មួយគួរឲ្យរន្ធត់បណ្តាលឲ្យមនុស្សបួននាក់ មួយគ្រួសារបានស្លាប់ ភ្លាមៗនៅនឹងកន្លែងកើតហេតុយ៉ាងអាណោចអាធ័ម។ ហេតុការណ៍គ្រោះថ្នាក់គួរឲ្យរន្ធត់នេះបានកើតឡើង នៅថ្ងៃអាទិត្យ ៦រោច ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣០ ខែកញ្ញា ឆ្នាំ២០១៨ វេលាម៉ោង៣ និង៤០នាទីរសៀល លើកំណាត់ផ្លូវជាតិលេខ៣ ចន្លោះគីឡូម៉ែត្រលេខ៣៤-៣៥ ត្រង់ចំណុចភូមិក្រាំងគាំ ឃុំត្បែង ស្រុកកណ្តាលស្ទឹង ខេត្តកណ្តាល។
លោកឧត្តមសេនីយ៍ វ៉ែន សាវឹន ស្នងការរងទទួលផែនចរាចរណ៍នៃស្នងការនគរបាលខេត្តកណ្តាលបានប្រាប់ឲ្យដឹងថា ជនរងគ្រោះទី១-ឈ្មោះ ខាត់ ពៅ ភេទប្រុស អាយុ២៨ឆ្នាំ ទី២-ឈ្មោះ ហៀង ភ័ស្ត អាយុ២៥ឆ្នាំ(ត្រូវជាប្រពន្ធ) ទី៣-ឈ្មោះ ហៀង ធីតា ភេទស្រី អាយុ១៣ឆ្នាំ ទី៤-ឈ្មោះ ហៀង ផៃយ៉ម ភេទស្រី អាយុ១២ឆ្នាំ អ្នកទាំង៤មានទីលំនៅ ភូមិត្រពាំងចក ឃុំមហាឫស្សី ស្រុកគងពីសី ខេត្តកំពង់ស្ពឺ។ ម្ចាស់រថយន្តឈ្មោះ គឹម ថង មានទីលំនៅផ្ទះលេខ២០២ ផ្លូវវត្តអង្គតាម៉ិញ ភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
លោកស្នងការរងបានបញ្ជាក់ថា មុនពេលកើតហេតុមានម៉ូតូ មួយគ្រឿងម៉ាក HONDA CLICK ពណ៌ខ្មៅ ពាក់ស្លាកលេខ ភ្នំពេញ 1T-4477 បើកបរសោយឈ្មោះ ខាត់ ពៅ ជាមួយក្រុមគ្រួសារ លុះពេលបើកបរមកដល់ចំណុចកើតហេតុខាងលើ បានបុកជាមួយរថយន្តមួយគ្រឿងម៉ាក HYUNDAI ពណ៌ស ពាក់ស្លាកលេខ ភ្នំពេញ 3D-2412 ប្រភេទបែន (អ្នកបើកបររត់គេច) ជាកម្មសិទ្ធិរបស់ឈ្មោះ គឹម ថង បើកបរមានទិសដៅផ្ទុយគ្នា បណ្តាលឲ្យស្លាប់ទាំងបួននាក់មួយគ្រួសារ។
លោកបានបន្ថែមទៀតថា ជំហានដំបូងករណីនេះ បណ្តាលមកពីអ្នកបើកបរម៉ូតូ បើកបរចូលចំណែកផ្លូវយានម្ខាងទៀត ដែលមានទិសដៅផ្ទុយគ្នា និងអ្នកបើកបររថយន្ត បើកបរមានល្បឿនលឿន។ បច្ចុប្បន្នវត្ថុតាងទាំងពីរមានរថយន្ត និងម៉ូតូ សមត្ថកិច្ចជំនាញចរាចរណ៍ស្រុកកណ្តាលស្ទឹងបានយកមករក្សាទុកនៅអធិការដើម្បីបន្តរនីតិវិធីទៅតាមផ្លូវច្បាប់៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
