Marcelo ថា មិនមែនមកពីអត់ Ronaldo ទើបក្រុមលេងបានត្រឹមស្មើ Bilbao ទេ

អេស្ប៉ាញ៖ ខ្សែការពារឆ្វេងរបស់ក្រុមអធិរាជស Real Madrid កីឡាករ Marcelo បានបដិសេធទៅនឹងសំណួររបស់អ្នកសារព័ត៌មានថា មិនមែនមកពីអវត្តមានរបស់កីឡាករ Cristiano Ronaldo ទើបធ្វើឲ្យក្រុមរបស់គេបានត្រឹមស្មើជាមួយ Athletic Bilbao នោះទេ។

ខ្សែការពារក្រុមជម្រើសជាតិប្រេស៊ីលនេះ បានធ្វើការរំលឹកទៅដល់អ្នកគាំទ្រក្លិបដែលមានមូលដ្ឋាននៅក្នុងទីក្រុមម៉ាឌ្រីដថា ក្លិបដែលឈ្នះពានរង្វាន់បីសម័យកាលនៅ Champions League បានសម្រេចនឹងជោគជ័យនេះគឺមកពីសំណាងរបស់ពួកគេមិនមែនមកពីកីឡាករ Cristiano Ronaldo តែម្នាក់អាចធ្វើបាននោះទេ។

នៅពេលដែលអ្នកសារព័ត៌មានរបស់កាសែត Four Four Two បានសួរទៅកាន់ខ្សែការពារវ័យ ៣០ឆ្នាំនេះថា (តើ Ronaldo អវត្តមានជាហេតុដែលធ្វើឲ្យមានការប៉ះពាល់ទៅលើលទ្ធផលរបស់ក្រុម Real Madrid មែនទេ)? 

ចម្លើយតបមកវិញរបស់កីឡាកររូបនេះគឺ៖ «ខ្ញុំគិតថាអ្នកគាំទ្រជាច្រើននឹកដល់លោក Raúl, Zidane…… មិនមែន Cristiano នោះទេ។ ការចាញ់នេះគឺពួកយើងពិតជាខកចិត្តខ្លាំង តែពួកយើងក៏សង្ឃឹមថានឹងមានលទ្ធផលល្អជាងមុននៅក្នុងការប្រកួតបន្ទាប់។ យើងបានប្រឹងប្រែងអស់ពីកម្លាំងកាយចិត្តទៅហើយ ដូច្នេះការចាញ់ឈ្នះយើងមិនអាចកំណត់ទុកមុនបាននោះទេ ប៉ុន្តែខ្ញុំគិតថាមិនមែនមកពីអត់ Ronaldo នោះទេ»។

សូមបញ្ជាក់ថា ក្រុមអធិរាជស Real Madrid បានត្រឹម១ពិន្ទុប៉ុណ្ណោះជាមួយក្រុម Athletic Bilbao នៅក្នុងការប្រកួតសប្តាហ៍ទី៤នៃក្របខណ្ឌលីកកំពូលរបស់ប្រទេសអេស្ប៉ាញ ខណៈការប្រកួតបន្ទាប់ពួកគេ គឺនឹងត្រូវបើទ្វារកីឡដ្ឋាន Santiago Bernabeu របស់ខ្លួនដើម្បីទទួលស្វាគមន៍ក្រុមភ្ញៀវ Roma នៅថ្ងៃព្រហស្បត្តិ៍ ក្នុងពានរង្វាន់ Champions League ជើងទី ១៕