គ្រូម្នាក់ពិន័យសិស្សរាល់ថ្ងៃព្រោះគេមកយឺត ពេលដឹងមូលហេតុនៅពីក្រោយ គ្រូនោះលុតជង្គង់ស្រក់ទឹកភ្នែកនៅចំពោះមុខសិស្ស (មានវីដេអូ)

បរទេស៖ ពេលខ្លះយើងតែងវិនិច្ឆ័យ និងចាប់កំហុសមនុស្សត្រឹមតែសំបកក្រៅ នៅពេលយើងឃើញគេធ្វើខុសអ្វីមួយ យើងក៏គិតថាគេមានចេតនាធ្វើខុស ប៉ុន្តែយើងពុំទាន់បានគិតស៊ីជម្រៅពីមូលហេតុនៅពីក្រោយខ្នងនោះទេ។

ថ្ងៃនេះយើងចង់ចែកចម្លែកនូវវីដេអូអប់រំមួយដែលនិយាយអំពីកូនសិស្សម្នាក់មករៀនយឺតរាល់ថ្ងៃ ហើយគេត្រូវបានគ្រូស្តីបន្ទាស់ និងដាក់ពិន័យគ្រប់ពេល ប៉ុន្តែនៅពេលគ្រូដឹងពីមូលហេតុនៅពីក្រោយវិញ គូ្រនោះក៏បានរត់ទៅឱបសិស្ស ហើយលុតជង្គង់ស្រក់ទឹកភ្នែក។

នៅក្នុងវីដេអូអប់រំនេះនិយាយអំពីក្មេងប្រុសម្នាក់មករៀនយឺតរាល់ថ្ងៃ ហើយគេត្រូវបានគ្រូពិន័យរាល់ថ្ងៃ មិត្តរួមថ្នាក់របស់គេសើចចំអកឲ្យគេ ហើយគេពិតជាខ្មាសមិត្តរួមថ្នាក់ទើបគេយំឱបតុ។

នៅពេលចេញទៅផ្ទះ គេក៏ប្រញាប់រត់ទៅផ្ទះវិញភ្លាម ហើយក៏ប្រញាប់ប្រញាល់ដោះអាវ និងកាតាបឲ្យប្អូនរបស់គេកំពុងរង់ចាំទៅសាលារៀន។

គ្រួសារបស់គេពិតជាក្រណាស់ ហើយគេមានបងប្អូន ២ នាក់ ដែលត្រូវពាក់អាវពណ៌សទៅសាលារៀន ដោយសារគេត្រូវចាំបងរបស់គេត្រលប់មកពីរៀនវិញ ទើបគេមានអាវ និងសម្ភារៈសិក្សាដូច្នេះបានជាគេទៅរៀនយឺតរាល់ថ្ងៃ។

ថ្ងៃមួយលោកគ្រូនោះក៏បានជិះកាត់ផ្ទះរបស់គេ ហើយក៏បានឃើញសកម្មភាពទាំងអស់នោះ ហើយគាត់ក៏យល់រឿងគ្រប់យ៉ាង។

បន្ទាប់មកនៅពេលក្មេងប្រុសនោះមករៀនយឺតម្តងទៀត គេនោះក៏បានហុចដៃឲ្យពិន័យរួចជាស្រេច ប៉ុន្តែលោកគ្រូនោះក៏បានរត់ទៅលុតជង្គង់ឱបកូនសិស្សរបស់ខ្លួន ហើយសកម្មភាពបែបនេះពិតជាធ្វើឲ្យយើងទប់ទឹកភ្នែកមិនបាន។

សរុបមកវិញ មនុស្សយើងម្នាក់ៗពុំគួរវិនិច្ឆយ និងចាប់កំហុសមនុស្សត្រឹមសំបកក្រៅទេ មុនពេលធ្វើសម្រេចចិត្តធ្វើអ្វីមួយ ឬនិយាយអ្វីមួយ យើងគួរតែសិក្សាស្រាវជ្រាវរកមូលហេតុពិតជាមុនសិន មុនធ្វើសម្រេចចិត្តវិនិឆ្ឆ័យ ឬដាក់ពិន័យនរណាម្នាក់៕

ទស្សនាវីដេអូខាងក្រោម៖

• ជំរុញទឹកចិត្ត
• គ្រូ
• វីដេអូ
• សាលា