រដ្ឋដែលមានអ្នកទស្សនាច្រើនបំផុត នៅសហរដ្ឋអាមេរិក

អាមេរិក៖ អាមេរិកគឺជាប្រទេសមួយក្នុងចំណោមប្រទេសដទៃទៀតដែលមានភ្ញៀវទេសចរទៅទស្សនាដ៏ច្រើនកុះករ។ ដូចជាយើងដឹងស្រាប់រួចហើយថា សហរដ្ឋអាមេរិកមានរដ្ឋចំនួន ៥០ ហើយរដ្ឋនីមួយៗសុទ្ធតែមានលក្ខណៈពិសេសរៀងៗខ្លួន។  ដូច្នេះថ្ងៃនេះយើងសូមបង្ហាញអ្នករាល់គ្នាឲ្យមកស្គាល់រដ្ឋ ដែលមានអ្នកទស្សនាដ៏ច្រើនបំផុតនៅសហរដ្ឋអាមេរិក៖

១. កាលីហ្វញ៉ា

កាលីហ្វញ៉ាគឺជារដ្ឋដែលមានអ្នកទស្សនាដ៏ច្រើនបំផុតនៅសហរដ្ឋអាមេរិក។ វាគឺជារដ្ឋដ៏រស់រវើក ដែលមានកន្លែងកម្សាន្តជាច្រើនដូចជា សួនឧទ្យានជាតិ Yosemite ស្ពាន Golden Gate សួនកម្សាន្ត Disney land ហូលីវូដ ឆ្នេរសមុទ្រ និងទេសភាពធម្មជាតិដ៏ស្រស់ប្រិមប្រិយដែលកត្តាទាំងនេះពិតជាទាក់ទាញ ភ្ញៀវទេសចរជាតិ និងអន្តរជាតិមកកម្សាន្តនៅរដ្ឋនេះ។

២. ផ្លរីដា

រដ្ឋផ្លរីដាក៏មានឈ្មោះហៅក្រៅថា “Sunshine State” ហើយកន្លែងពិសេសដែលទាក់ទាញភ្ញៀវទេសចរនោះគឺ ឆ្នេរសមុទ្រ និងឧទ្យានកម្សាន្តជាច្រើនដូចជា កោះ Amelia ប្រាសាទ Castillo de San Marcos សួនកម្សាន្ត Walt Disney World និងឆ្នេរសមុទ្រខាងត្បូងជាដើម។

៣. រដ្ឋណេវ៉ាដា

រដ្ឋនេះល្បីតាំងពីឆ្នាំ ១៨៥៩ ដោយសាររដ្ឋនេះគឺជាតបន់ផលិតមាសដ៏ច្រើនបំផុតនៅសហរដ្ឋអាមេរិក។  ទីក្រុងឡាសវេហ្គាសគឺជាទីក្រុងកម្សាន្តដ៏ពេញនិយមបំផុតមួយនៅក្នុងរដ្ឋនេះ ហើយគោលដៅទេសចរណ៍ដ៏ពេញនិយមផ្សេងទៀតរួមមានបឹង Tahoe ទំនប់ Hoover និងជ្រលង Fire State Park ។

៤. រដ្ឋតិចសាស

តិចសាស់គឺជារដ្ឋធំទីពីរនៅសហរដ្ឋអាមេរិក ដោយនៅតំបន់ខ្លះគេហៅវាថា រដ្ឋឡូនស្តារ។ កន្លែងទាក់ទាញរបស់រដ្ឋនេះគឺសារមន្ទីរ Alamo នៅ San Antonio ដែលជាតំបន់ប្រវត្តិសាស្ត្រដ៏សំខាន់។  តំបន់ពិសេសផ្សេងទៀតមានដូចជា មជ្ឈមណ្ឌលអវកាសហ៊ូស្តុន សារមន្ទីរជាន់ទី ៦ នៅ Dealey Plaza ក្នុងទីក្រុង Dallas និងឧទ្យានជាតិ Big Bend។

៥. ញូវយ៉ក

រដ្ឋញូវយ៉កមានកន្លែងពិសេសល្បីៗជាច្រើនរួមមាន តំបន់ពាណិជ្ជកម្ម Times Square ស្ពាន Brooklyn ឧទ្យាន Central Park និងជាពិសេសនោះគឺ រូបសំណាក់សន្តិភាពរបស់អាមេរិក (Statue of Liberty) ដែលតំបន់ទាំងនេះពិតជាមានប្រជាប្រិយភាពខ្លាំងណាស់ក្នុងចំណោមភ្ញៀវទេសចរជាតិ និងអន្តរជាតិមកទស្សនាកម្សាន្ត។

សរុបមកអាមេរិកគឺជាប្រទេសដ៏ធំដែលមានកន្លែងកម្សាន្តជាច្រើន ដោយហេតុនេះហើយបានជាមានភ្ញៀវទេសចរទូទាំងពិភពលោកមកកម្សាន្តក្នុងប្រទេសនេះ។ យ៉ាងណាមិញក៏មានរដ្ឋផ្សេងៗទៀតដែលមានប្រជាប្រិយភាពខ្លាំងណាស់ដែរ មានដូចជា រដ្ឋហាវ៉ៃ រដ្ឋ Georgia រដ្ឋ Carolina ខាងត្បូង និងរដ្ឋវីជីនី៕

តើប្រិយមិត្តយល់យ៉ាងណាដែរ?

• ទីកន្លែង