ភ្នំពេញ៖ អតីតគ្រូបង្វឹកក្រុមជម្រើសជាតិកម្ពុជា លោក ប្រាក់ សុវណ្ណារ៉ា បានឲ្យដឹងថា លោករំពឹងបាល់ទាត់ខែ្មរនឹងមានការរីកចម្រើនខ្លាំង បន្ទាប់ពីលោក Honda ឡើងកាន់តំណែងជាអ្នកចាត់ការទួទៅ និងជាគ្រូបង្គោលក្រុមជម្រើសជាតិកម្ពុជា។
ថែ្លងឲ្យដឹងក្រោយបញ្ចប់សន្និសីទសារព័ត៌មានស្ដីពីពិធីប្រកាសជាផ្លូវការពីការចូលកាន់តំណែងរបស់ Honda កាលពីថៃ្ងអាទិត្យកន្លងទៅ អតីតគ្រូបង្វឹកក្រុមបឹងកេតបាននិយាយថា ការមកដល់របស់ Honda គឺជាការប្រសើររបស់កីឡាករ ព្រោះថារូបគេគឺជាកីឡាករលំដាប់អន្ដរជាតិដ៏មានឥទ្ធិពល ហើយការមកដល់នេះដែរ ក៏អាចជួយអភិវឌ្ឍន៍បាល់ទាត់កម្ពុជា ឲ្យកាន់តែខ្លាំង និងមានសក្ដានុពលថែមទៀត។
«អ្វីដែលគាត់ (Honda) មកកាន់កម្ពុជាលើកនេះ គោលបំណងសំខាន់គឺទាក់ទងទៅនឹងការអភិវឌ្ឍន៍ ដែលជារឿងដែលយើងត្រូវការចាំបាច់ ព្រោះរូបគាត់គឺជានិមិត្ដរូបរបស់បាល់ទាត់ ដែលអាចជួយជម្រុញឲ្យកីឡាកររបស់យើងខិតខំប្រឹងប្រែង» សម្ដីលោក ប្រាក់ សុវណ្ណារ៉ា។
សូមបញ្ជាក់ថា Honda នឹងមិនយកប្រាក់ខែពីការធើ្វជាគ្រូបង្វឹកនេះទេ ខណៈដែលសហព័ន្ធនឹងរ៉ាប់រងចំពោះការស្នាក់នៅ ហូបចុក និងសំបុត្រយន្ដហោះ នៅពេលដែលរូបគេមកដឹកនាំក្រុមជម្រើសជាតិកម្ពុជានៅពេលខាងមុខនេះ ដើម្បីត្រៀមចូលលេងពានរង្វាន់ AFF Suzuki Cup៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]