ចក្រភពអង់គ្លេស៖ ក្រុមហ៊ុនផលិតម៉ាស៊ីនយានយន្ត Rolls-Royce ដែលមានមូលដ្ឋាននៅចក្រភពអង់គ្លេស បានបញ្ចេញគំនិតនៃការផលិតយានយន្តដើរដោយចរន្តអគ្គិសនីដែលអាចហោះ និងចុះចតក្នុងខ្សែបញ្ឈរ (EVTOL) ដូចឧទ្ធម្ភាគចក្រដែលគេឱ្យឈ្មោះថា តាក់ស៊ីហោះ នៅពិព័រណ៍យន្តហោះអន្តរជាតិ ២០១៨ នៅតំបន់ Farnborough ក្នុងទីក្រុងឡុងដ៍។
ក្រុមហ៊ុននេះបានអះអាងថា តាក់ស៊ីហោះដំបូងរបស់ពួកគេនឹងអាចហោះលើមេឃយ៉ាងឆាប់បំផុត ត្រឹមដើមទសវត្សរ៍ឆ្នាំ ២០២០។
“ក្នុងទីផ្សារនេះ អ្នកនឹងឃើញអ្វីម្យ៉ាងបែបនេះដែលអាចហោះក្នុងរយៈពេល ៣ ទៅ ៥ ឆ្នាំទៀត ហើយយើងនឹងណែនាំបង្ហាញពីប្រព័ន្ធវាក្នុងពីរឆ្នាំទៀត។ នៅចុងឆ្នាំក្រោយ យើងនឹងត្រៀមរួចរាល់ដើម្បីហោះ” ប្រធានក្រុមអេឡិចត្រូនិកនៃក្រុមហ៊ុន Rob Watson បានបញ្ជាក់ដូច្នេះ។
យោងតាមសេចក្តីថ្លែងការណ៍របស់ក្រុមហ៊ុន យានយន្តនាពេលអនាគតនេះ អាចប្រើសម្រាប់ដឹកជញ្ជូនផ្ទាល់ខ្លួន ឬ សាធារណៈ ក៏ដូចជាក្នុងវិស័យភស្តុភារ និង យោធាផងដែរ។ អ្វីដែលពិសេសនោះគឺ តាក់ស៊ីហោះនេះអាចនឹងដឹកអ្នកដំណើរពី ៤ ទៅ ៥ នាក់ ក្នុងល្បឿនដល់ទៅ ៤០០ គ.ម/ម៉ោង ហើយអាចហោះបានចម្ងាយ ៨០០ គ.ម ដោយមិនបាច់បញ្ចូលភ្លើងជាថ្មី។
វានឹងអាចហោះឡើង ឬ ចុះចតក្នុងខ្សែបន្ទាត់ត្រង់ ជាមួយនឹងស្លាបដែលអាចវិល ៩០ ដឺក្រេ និង ស្លាបចក្រដែលអាចទប់ពីការធ្លាក់ក្នុងរយៈកម្ពស់មួយ។ អាគុយរបស់យានយន្តកូនកាត់នេះ នឹងប្រើម៉ាស៊ីនតួប៊ីនហ្គាស ដើម្បីបញ្ចូលថាមពល។ ទោះយ៉ាងណា តាក់ស៊ីហោះដែលដើរដោយអគ្គិសនីសុទ្ធសាធនេះ ស្ថិតនៅក្នុងដំណាក់កាលស្រាវជ្រាវនៅឡើយ។
គួរឱ្យដឹងថា ក្រៅពី Rolls-Royce ក៏មានក្រុមហ៊ុនដែលផ្តោតលើការផលិតយានយន្តកូនកាត់ដូចគ្នានេះដូចជា ក្រុមហ៊ុនយក្សផ្នែកដឹកជញ្ជូន និងចែកចាយ Uber ដែលមានមូលដ្ឋាននៅអាមេរិក គម្រោង the Kitty Hawk ដែលផ្តល់ថវិកាដោយស្ថាបនិករបស់ Google ក៏ដូចជាក្រុមហ៊ុនហោះហើររបស់ អាល្លឺម៉ង់ បារាំង ព្រមទាំង ក្រុមហ៊ុនយក្ស តូយ៉ូតា របស់ជប៉ុនផងដែរ៕
សូមទស្សនាវីដេអូខាងក្រោម៖
តើប្រិយមិត្តយល់យ៉ាងណាដែរ?
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]