រាជធានីភ្នំពេញ ៖ បុរសម្នាក់ត្រូវប្រជាពលរដ្ឋនាំគ្នាចាប់ខ្លួនកាលពីវេលាម៉ោង៧ ព្រឹកថ្ងៃទី១៤ មីនា បន្ទាប់ពីដាច់យ៉ៃធ្វើសកម្មភាពលួចម៉ូតូម៉ាកវ៉េវកញ្ជាស់ ពណ៌ខ្មៅ មួយគ្រឿង មិនបានសម្រេចនៅមុខផ្សារធំទួលសង្កែហៅផ្សារសាំហាន់ ស្ថិតក្នុងភូមិទួលសង្កែ សង្កាត់ទួលសង្កែ ខណ្ឌឫស្សីកែវ ។
ជនសង្ស័យដែលអស់លក្ខណ៍ឈ្មោះសេង ពិសិដ្ឋ ភេទប្រុស អាយុ២៨ឆ្នាំ ជាកម្មករសំណង់ មានលំនៅផ្ទះជួលភូមិទួលគោក សង្កាត់ទួលសង្កែ ខណ្ឌឫស្សីកែវ និងមានស្រុកកំណើតភូមិត្រពាំងពោធិ៍ ឃុំត្រពាំងផ្លុង ស្រុកពញាក្រែក ខេត្តកំពង់ចាម ។ ចំណែកម៉ូតូដែលជនសង្ស័យលួចពុំបានសម្រេចម៉ាកវ៉េវ ពណ៌ខ្មៅ កញ្ចាស់ស៊េរី២០០២ មានម្ចាស់ឈ្មោះឈិត អូរី ភេទស្រី អាយុ៣០ឆ្នាំ មានទីលំនៅផ្ទះជួល ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ ។ តាមព័ត៌មានឱ្យដឹងថា ក្រុមជនសង្ស័យមានគ្នា៣នាក់ ជិះម៉ូតូម៉ាកឌ្រីម ពណ៌ខ្មៅ ស៊េរី២០០៨ មួយគ្រឿងមកឈប់ នៅមុខផ្សារធំទួលសង្កែ បន្ទាប់មកជនសង្ស័យម្នាក់បានចុះទៅធ្វើសកម្មភាពលួចម៉ូតូម៉ាក វ៉េវ ដែលម្ចាស់ចតទុកមុខផ្សារនោះ ហើយបណ្តើរចេញត្រូវម្ចាស់ឃើញទាន់ស្រែកចោរៗ ក៏ត្រូវប្រជាពលរដ្ឋនាំគ្នាចាប់បានតែម្តង ។
តាមសម្តីម្ចាស់ម៉ូតូឈ្មោះឈិត អូរី បានឱ្យដឹងថា នៅមុនពេលកើតហេតុខ្លួនបានជិះម៉ូតូខាងលើទៅ ឈប់នៅមុខផ្សារចំហៀងខាងលិច ហើយបានទៅជួយរៀបចំផ្លែ ឈើឱ្យអ្នកស្គាល់គ្នាលក់។ ខណៈកំពុងរៀបចំផ្លែឈើ ស្រាប់តែក្រឡេកមើលម៉ូតូឃើញជនម្នាក់ជិះចេញភ្លាមខ្លួនបានរត់ទៅ ស្ទាក់ពីមុខស្រែកថា ចោរៗ ហើយត្រូវប្រជាពលរដ្ឋនាំគ្នាជួយចាប់បានប្រគល់ឱ្យប៉ូលិស ប៉ុស្តិ៍ទួលសង្កែ ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]