ក្ដៅៗ! បឹងកេត ប្រកាសពីការចូលរួមសាជាថ្មីរបស់ វឌ្ឍនាកា

ភ្នំពេញ៖ ក្រុមជើងឯកលីកកំពូលកម្ពុជា ២រដូវកាលជាប់គ្នា បឹងកេត បានប្រកាសពីការចូលរួមសាជាថ្មីរបស់ខែ្សប្រយុទ្ធឆ្នើម ចាន់ វឌ្ឍនាកា ដើម្បីចូលរួមប្រកួតប្រជែងដណ្ដើមពានរង្វាន់នានាសម្រាប់ក្លិប។ 

បឹងកេត បានធើ្វសន្និសីទសារព័ត៌មានបង្ហាញមុខជាផ្លូវការរបស់កីឡាករដែលមានប្រភពមកពីខេត្ដកំពត ក្នុងការចូលរួមជាមួយក្រុមសាជាថ្មី ក្រោយពីបាត់មុខអស់ពេលជិត២រដូវកាលមកហើយនោះ។

ទន្ទឹមនឹងនេះ ក្រុមជើងឯករង Toyata Mekong Club ឆ្នាំ២០១៥ ក៏បានបញ្ជាក់ផងដែរថា នៅថៃ្ងខាងមុខបើសិនវឌ្ឍនាកា ចង់សាកល្បងលេងនៅក្រៅប្រទេសទៀត នោះក្លិបនឹងគោរពតាមការសម្រេចចិត្ដរបស់គេផងដែរ។  

សូមបញ្ជាក់ថា កីឡាករ ចាន់ វឌ្ឍនាកា បានចាកចេញពីក្រុមបឹងកេត ដើម្បីទៅប្រកបអាជីពនៅក្រៅប្រទេសជាង១ឆ្នាំកន្លះមកហើយ ដោយចូលរួមជាមួយក្រុមចំនួន២ គឺទី១ ក្រុម Fujieda MYFC ស្ថិតក្នុងក្របខណ្ឌលីកលំដាប់ទី៣ជប៉ុន ខណៈក្លិបទី២ គឺក្លិប Pahang FA ស្ថិតក្នុងក្របខណ្ឌលីកកំពូលម៉ាឡេស៊ី៕