Suarez ប្រកាសដំណឹងល្អមួយ ក្រោយជួយក្រុមឈ្នះយប់មិញ

រុស្ស៊ី៖ ក្រោយពីជួយក្រុមជម្រើសជាតិឲ្យឈ្នះកាលពីយប់មិញ កីឡាករ Luis Suarez បានប្រកាសជាសាធារណៈថា ភរិយាខ្លួនកំពុងតែមានផ្ទៃពោះកូនទីបីហើយ។

ក្រោយពីបានស៊ុតបញ្ចូលទី ក្នុងការប្រកួតកាលពីយប់មិញ ខ្សែប្រយុទ្ធរបស់ក្រុម Barcelona រូបនេះបានអបអរសាទរដោយយកបាល់មកដាក់ចូលក្នុងអាវធ្វើដូចជាពោះធំ ដែលរឿងនេះធ្វើឲ្យអ្នកតាមដានខ្លះមានការងើយឆ្ងល់ផងដែរ។ 

ប៉ុន្តែក្រោយចប់ការប្រកួត អតីតកីឡាករក្រុម Liverpool រូបនេះបាននិយាយទៅកាន់អ្នកសារព័ត៌មានថា លោកកំពុងតែសប្បាយចិត្តពេក ដោយសារតែភរិយាលោកកំពុងតែមានផ្ទៃពោះជាលើកទី៣ហើយ។

ខ្សែប្រយុទ្ធវ័យ៣១ឆ្នាំរូបនេះបានបន្តថា លោកសូមអរគុណនូវអ្នកដែលបានផ្ញើសារមកជូនពរលោកក៏ដូចជាភរិយា ហើយលោកនឹងខិតខំឲ្យអស់ពីសមត្ថភាពសម្រាប់ជួយក្រុមជម្រើសជាតិឲ្យទទួលបានជោគជ័យនៅក្នុងឆ្នាំនេះ។ 

គួរបញ្ជាក់ថា ក្រុមអ៊ុយរ៉ាហ្គាយ នឹងត្រូវប្រកួតជាមួយក្រុមរុស្ស៊ី នៅថ្ងៃទី២៥ វេលាម៉ោង៩យប់ ខាងមុខនេះ ដែលជាការប្រកួតចុងក្រោយក្នុងពូល ដោយប្រទេសទាំងពីរកំពុងតែប្រជែងគ្នាយកលេខមួយក្នុងនៅក្នុងតារាង៕