ប្រយ័ត្នបរាជ័យសុំម្ចាស់ចិត្តរៀបការ! កុំឱ្យស្តាយក្រោយ បើមិនចេះត្រូវរៀន

ថ្ងៃសុំរៀបការ ជាថ្ងៃដ៏សំខាន់បំផុតមួយក្នុងជីវិតមនុស្សគ្រប់រូប។  សុភាពនារីតែងពេញចិត្តបុរសដែលធ្វើឱ្យរាល់ឱកាសទាំងអស់មានលក្ខណៈពិសេសសម្រាប់ខ្លួន។ បើការសុំរៀបការធ្វើឡើងក្នុងបរិយាកាសកាន់តែរ៉ូមែនទិក និងគួរឱ្យភ្ញាក់ផ្អើល នោះអនុស្សាវរីយ៍ដ៏អស្ចារ្យនឹងមានន័យធំធេង ហើយដក់ជាប់ក្នុងចិត្តយ៉ាងជ្រៅគ្មានថ្ងៃបំភ្លេចបានដែរ។ 

ដូច្នេះបើសុភាពបុរសទាល់តម្រិះ សូមសាកល្បងវិធីមួយក្នុងចំណោមវិធីទាំង៩ ដូចខាងក្រោម៖

១. អញ្ជើញគូស្នេហ៍ទៅញ៉ាំអាហារល្ងាចដ៏ពិសេស

អ្នកគួរជ្រើសរើសកន្លែងប្លែកពីគេមួយដែលមានភាពរ៉ូមែនទិក ក្រោមពន្លឺភ្លើងទានស្រាលៗ និងតន្រ្តីលេងកំដរ។ អ្នកអាចពឹងអ្នករត់តុឱ្យយកម្ហូបចុងក្រោយមួយចាន រៀបជារាងបេះដូងព័ទ្ធជុំវិញចិញ្ចៀនសុំរៀបការ ក្រោយពីញ៉ាំអាហាររួច។  

២. សុំរៀបការនៅថ្ងៃពិសេស

អ្នកគួរជ្រើសរើសថ្ងៃពិសេសណាមួយក្នុងជីវិតនាងដូចជា ថ្ងៃខួបកំណើត ថ្ងៃនៃក្តីស្រលាញ់ ថ្ងៃផ្តើមស្នេហ៍គ្រាដំបូង ឬថ្ងៃជួបគ្នាដំបូង។ល។ អ្នកអាចជូនផ្កាដែលនាងចូលចិត្តមួយបាច់ ដោយដាក់ចិញ្ចៀននៅកណ្តាល។ 

៣. សុំរៀបការក្នុងរោងកុន

ជាធម្មតា ក្រោយចប់ការបញ្ចាំងកុន រោងកុននឹងបើកភ្លើង ខណៈទស្សនិកជនភាគច្រើនមិនទាន់ចេញអស់។ ពេលនោះហើយដែលអ្នកគួរចាប់ផ្តើមប្រតិបត្តិការបេសកកម្មពិសេស ដែលត្រៀមទុកយូរហើយ។ ប៉ុន្តែគួរមើលកុនណាដែលសក្តិសមនឹងឱកាសនេះ ប្រយ័ត្នមើលចំរឿងខ្មោចមិនបានប៉ុន្មានផង នាងភ័យដល់ថ្នាក់សុំចេញពីរោងកុនមុន នោះគ្រប់យ៉ាងនឹងត្រូវចប់។ 

៤. ធ្វើផ្ទាំងសុំរៀបការ

អ្ននគួរព្យួរផ្ទាំងដែលសរសេរពាក្យសុំរៀបការ នៅតាមផ្លូវដែលនាងតែងដើរកាត់ ឬក្រៅផ្ទះរបស់នាង ឬនៅកន្លែងនាងធ្វើការ ឬលើរថយន្តរបស់អ្នកពេលមកជួបនាង។ បើចង់ឱ្យនាងរំភើបជាងនេះ អ្នកអាចពឹងមិត្តភក្តិប៉ុន្មាននាក់ទៅកន្លែងណាមួយ ឱ្យចាំជួយលើកផ្ទាំងនោះ។ ធ្វើបែបនេះ នាងច្បាស់ជាពេញចិត្ត តែកុំភ្លេចចិញ្ចៀន និងបាច់ផ្កាផង។  

៥. បង្កប់ចិញ្ចៀនសុំរៀបការក្នុងប្រអប់សូកូឡា

សុភាពនារីភាគច្រើនចូលចិត្តសូកូឡា ដូច្នេះអ្នកគួរកុម្ម៉ង់ឱ្យគេធ្វើសូកូឡាជារាងបេះដូង ឬរាងប្លែកពីគេដែលមានភាពទាក់ទាញ រួចទុកកន្លែងមួយសម្រាប់ចិញ្ចៀនភ្ជាប់វាសនាក្នុងនោះ។ 

៦. សុំរៀបការនៅកន្លែងជួបស្នេហ៍ដំបូង

សុភាពបុរសគួរណាត់នាងទៅកន្លែងដែលអ្នកទាំងពីរជួបគ្នាដំបូងបំផុត។ អ្នកអាចជូនចិញ្ចៀនភ្ជាប់ពាក្យ ជាអំណោយនៅថ្ងៃនៃក្តីស្រលាញ់។ ធ្វើបែបនេះ កន្លែងពិសេសនោះ នឹងដក់ជាប់ក្នុងចិត្តអនាគតស្វាមីភរិយា កាន់តែជ្រាលជ្រៅ។  

៧. ជួលជាងថតពេលសុំរៀបការ

អ្នកគួរណាត់នាងទៅកន្លែងអ្នកទាំងពីរចូលចិត្ត ដោយជួលជាងថតរូបអាជីព ឬពឹងមិត្តភក្តិដែលជំនាញ មកថតឱ្យពេលសុំរៀបការ ព្រោះអ្នកអាជីព ឬអ្នកជំនាញទើបថតបានប្លង់ស្អាតៗបំផុតសម្រាប់អ្នកទាំងពីរ។ អ្នកច្បាស់ជាមិនចង់ឱ្យរូបថតអនុស្សាវរីយ៍ក្នុងថ្ងៃដ៏មានអត្ថន័យនេះ មើលមិនចូលភ្នែកឡើយ។

៨. តុបតែងបន្ទប់ឱ្យមានភាពរ៉ូមែនទិក

បើអ្នកធ្វើដំណើរទៅកន្លែងណាមួយជាមួយនាង ក្នុងមូលហេតុធ្វើការ ឬដំណើរកម្សាន្ត អ្នកអាចធ្វើឱ្យនាងភ្ញាក់ផ្អើលបែបរ៉ូមែនទិក ដោយដាក់ចិញ្ចៀននៅកណ្តាលបន្ទប់ក្រាលពេញដោយផ្កា។ អ្នកត្រូវពឹងបុគ្គលិកសណ្ឋាគារឱ្យជួយរៀបចំមុនពេលអ្នកមកដល់ ដើម្បីឱ្យនាងភ្ញាក់ផ្អើលពេលចូលបន្ទប់ភ្លាម។  

៩. តុបតែងរថយន្តរបស់នាងជាមួយផ្កា

អ្នកអាចប្រាប់ថាឡានរបស់អ្នកខូច រួចខ្ចីឡានរបស់នាងមួយពេល។ ក្រោយមក យកឡាននាងទៅតុបតែងពីខាងក្នុងយ៉ាងរ៉ូមែនទិក ជាមួយនឹងផ្កាជាច្រើនដែលមានពាក្យសុំរៀបការ។ បន្ថែមពីលើផ្កាទាំងនោះ អ្នកអាចរៀបចំប៉ោងៗរាងបេះដូង ដើម្បីឱ្យបរិយាកាសកាន់តែទាក់ទាញផងដែរ។ 

ទោះយ៉ាងណា ៩ចំណុចខាងលើគ្រាន់តែជាវិធីបើកផ្លូវឱ្យសុភាពបុរសមួយចំនួន ដែលមិនសូវប្រសប់ ក្នុងការបង្កើតឱកាសសុំរៀបការពីមនុស្សសំខាន់បំផុតប៉ុណ្ណោះ។ ក្រោយស្វែងយល់ចំណុចទាំងនេះហើយ អ្នកទាំងនោះអាចមានគំនិតច្នៃប្រឌិតធ្វើអ្វីផ្សេង ដែលប្រហែលជាចំណាយតិចជាង តែអាចបង្កើតបរិយាកាសរ៉ូមែនទិកលើសនេះ ហើយសុំរៀបការបានសម្រេចទៀត៕

បើប្រិយមិត្តដឹងវិធីល្អៗផ្សេងទៀត សូមជួយចែករំលែកឱ្យគ្នាយើងផងណា!

• ស្នេហា