ប្រភេទដើមឈើបុរាណរាប់ពាន់ឆ្នាំនៅអាហ្វ្រិក ចាប់ផ្ដើមងាប់ជាបន្តបន្ទាប់ដោយហេតុផលនេះ

អាហ្វ្រិក៖ ដើម baobab ដែលមានអាយុកាលចាស់ និងមានទំហំធំជាច្រើនបានចាប់ផ្ដើមងាប់ជាបន្តបន្ទាប់នៅក្នុងរយៈពេល ១ទសវត្សកន្លងមកនេះ។

ដើមឈើនីមួយៗមានអាយុចាប់ពី ១១០០ឆ្នាំ ទៅដល់ ២៥០០ឆ្នាំ ហើយមានដើមឈើខ្លះមានទំហំស្មើឡានក្រុងទៀតផង។ ក្រុមអ្នកវិទ្យាសាស្ត្របានប៉ាន់ស្មានថា ហេតុផលនៃការដួលរលំក្នុងចំនួនយ៉ាងច្រើននៃដើមឈើបុរាណនេះ គឺបង្កឡើងដោយការប្រែប្រួលអាកាសធាតុ។

គេបានលើកឡើងថា «យើងបានរាយការណ៍ថាដើមឈើចំនួន៩ នៃដើមឈើចាស់ជាងគេទាំង១៣ បានងាប់រួចមកហើយ ក្នុងកំឡុងពេល ១២ឆ្នាំកន្លងមកនេះ»។ នៅក្នុងចំណោមដើមឈើដែលបានងាប់ទាំង ៩ គឺមាន៤ ដែលជាដើម baobab ធំជាងគេនៅអាហ្វ្រិក។

អ្នកវិទ្យាសាស្ត្របានលើកឡើងបន្តថា «យើងសង្ស័យថាការដួលរលំនៃដើមឈើ baobab ក្នុងចំនួនដ៏ច្រើនបែបនេះ គឺបណ្ដាលមកពីបម្រែបម្រួលអាកាសធាតុនៅតំបន់អាហ្វ្រិកខាងត្បូង»។ ទោះជាយ៉ាងណាក៏ដោយ គេក៏បានលើកឡើងដែរថា គេត្រូវការធ្វើការស្រាវជ្រាវបន្តទៅទៀតមុននឹងអាចធ្វើការសន្និដ្ឋានបាន។ 

ក្នុងកំឡុងឆ្នាំ ២០០៥ និង២០១៧ អ្នកស្រាវជ្រាវបានកំណត់អាយុ និងកត់សម្គាល់ដើម baobab ដែលមានទំហំធំ និងអាយុច្រើន ៦០ដើម។ គេបានរកឃើញថា ដើមឈើដែលមានអាយុច្រើន និងទំហំធំភាគច្រើនបានដួលរលំអស់រួចទៅហើយ។ ហើយដើមឈើដែលបានងាប់ទាំងអស់គឺនៅក្នុងតំបន់អាហ្វ្រិកខាងត្បូង ដែលមានដូចជាប្រទេស ហ្សុីមបាវេ ណាមីប៊ី អាហ្វ្រិកខាងត្បូង បុតស្វាណា និងសំប៊ី។

ដើម baobab គឺជាដើមឈើមានផ្កាដែលមានអាយុចាស់ជាងគេ និងទំហំធំជាងគេនៅលើលោក។ បើយោងទៅតាមអ្នកស្រាវជ្រាវបានលើកឡើងថា ដើមឈើប្រភេទនេះអាចរស់បាន ៣០០០ឆ្នាំឯណោះ។ ហើយវាគឺជាដើមឈើមួយប្រភេទដែលពិបាកក្នុងការបំផ្លាញបំផុត ដោយសូម្បីតែត្រូវបានគេដុត ឬបកសម្បកក៏ដោយ ក៏វានៅតែអាចដុះឡើងមកវិញដដែល។ ហើយនៅពេលដែលវាងាប់ គឺវាចាប់ផ្ដើមរលួយពីខាងក្នុង រួចដួលរលំតែម្ដង៕

• ទីកន្លែង
• ធម្មជាតិ
• អាកាសធាតុ