រាជធានីភ្នំពេញ ៖ រថយន្ដស៊េរីទំនើបម៉ាកអេស្កាលែត SRX ពណ៌ស បើកបោះពួយទៅបុកខឿនសួនច្បារផ្លូវភ្លោះហោះ ហើយបុកសសរបង្គោលប៉ាណូផ្សាយពាណិជ្ជកម្មរួចផ្លោងរំលងសួនទៅធ្លាក់លើផ្លូវម្ខាងទៀត បណ្ដាលឱ្យដាច់កង់មុខខាងស្ដាំ តែមិនបណ្ដាលឱ្យមានគ្រោះថ្នាក់ដល់មនុស្សទេ ។ ហេតុការណ៍នេះកើតឡើងកាលពីវេលាម៉ោង១និង២០នាទីរំលងអធ្រាត្រថ្ងៃទី១២ មីនា តាមមហាវិថីព្រះមុនីវង្សកែងផ្លូវលេខ២៤១ ជិតស្ថានទូតអាល្លឺម៉ង់ ក្នុងសង្កាត់បឹងព្រលិត ខណ្ឌ៧មករា ។
សន្ដិសុខដែលយាមនៅជិតកន្លែងកើតហេតុបានឱ្យដឹងថា មុនពេលកើតហេតុរថយន្ដម៉ាកអេស្កាលែត SRX ពណ៌ស ជិះគ្នាប្រមាណជា៤-៥នាក់ បើកតាមមហាវិថីព្រះមុនីវង្ស ក្នុងទិសដៅពីលិចទៅកើតក្នុងល្បឿនលឿន ខណៈមកដល់ផ្លូវកែង២៤១ ជាផ្លូវភ្លោះសំពៅមាសក៏បត់ស្ដាំ ដោយរថយន្ដបោះពួយលឿនពេកទើបជ្រុលទៅបុកខឿនសួនច្បារផ្លូវភ្លោះហោះទៅបុកបង្គោលប៉ាណូផ្សព្វផ្សាយពាណិជ្ជកម្មរួចផ្លោងរំលងសួនច្បារទៅធ្លាក់ផ្លូវម្ខាងទៀត បណ្តាលឱ្យរថយន្ដដាច់កង់មុខខាងស្ដាំ និងផ្ទុះពោងសុវត្ថិភាព៤ តែមិនបណ្ដាលឱ្យអ្នកជិះក្នុងរថយន្ដរងរបួសទេ ។
រថយន្ដបង្កហេតុត្រូវសមត្ថកិច្ចជំនាញស្ទួចយកទៅរក្សាទុកនៅសាលារាជធានីភ្នំពេញដើម្បីរង់ចាំធ្វើការដោះស្រាយ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]