Salah បង្ហើបហេតុផលមួយចំនួន ដែលរូបគេមិនអាចជោគជ័យកាលលេងឲ្យ Chelsea

អង់គ្លេស៖ Mohamed Salah បានទទួលស្គាល់ថា រូបគេបានពង្រឹងនូវទម្រង់លេង ក៏ដូចជាកម្លាំងរបស់ខ្លួនច្រើន ចាប់តាំងពីរូបគេឈានជើងចូលលេងក្នុងលីកកំពូលអង់គ្លេស។

កីឡាករជម្រើសជាតិអេហ្ស៊ីប រូបនេះ កំពុងតែរីករាយក្នុងរដូវកាលដំបូងរបស់ខ្លួនឲ្យក្រុម Liverpool ដោយអាចស៊ុតបញ្ចូលទីដល់ទៅ ៤០គ្រាប់ គ្រប់កម្មវិធីគិតត្រឹមពេលនេះ។  

បើត្រឡប់ទៅកាន់ឆ្នាំ២០១៤ វិញ ពោលគឺនៅពេលដែលរូបគេលេងឲ្យក្រុម Chelsea ក្រោយផ្លាស់ពីក្រុម Basel ក្នុងតម្លៃជាង ២០លានដុល្លារអាមេរិក អ្វីៗហាក់ដូចមិនល្អប្រសើរនោះឡើយសម្រាប់ Salah។ គ្រានោះ កីឡាករជំនាញជើងឆ្វេងនេះ បង្ហាញខ្លួនបានត្រឹម ១៩ប្រកួតប៉ុណ្ណោះសម្រាប់ក្រុមតោខៀវ ដែលធើ្វឲ្យទម្រង់លេងរបស់គេធ្លាក់ចុះយ៉ាងខ្លាំង។