អេស្ប៉ាញ៖ អតីតខ្សែបម្រើរបស់ករ្ុម Real Madrid លោក Kaka បាននិយាយអំពីទុក្ខលំបាកក្នុងកំឡុងពេលដែលលោកលេងនៅក្រោមការគ្រប់គ្រងរបស់គ្រូបង្វឹកលោក Jose Mourinho។
បុរសវ័យ៣៥រូបនេះ បាននិយាយក្នុងបទសម្ភាសមួយថា រូបគេមានការសោកស្តាយដែលសម្រេចចិត្តមកលេងឲ្យក្រុម Real Madrid ព្រោះការសម្រេចចិត្តនេះបានធ្វើឲ្យអាជីពបាល់ទាត់របស់រូបគេបានរលាយខ្ចាត់ខ្ចាយអស់។ អតីតជម្រើសជាតិប្រេស៊ីលរូបនេះបានបន្តថា ចំណុចដ៏ធំមួយដែលធ្វើឲ្យខ្លួនទទួលការបរាជ័យគឺការខ្វះជំនឿទុកចិត្តពីគ្រូបង្វឹកលោក Jose Mourinho។
លោក Kaka បាននិយាយថា លោកនិងគ្រូបង្វឹកសញ្ជាតិព័រទុយហ្គាល់ តែងតែមានការគោរពគ្នាទៅវិញទៅមក ប៉ុន្តែទំនាក់ទំនងរបស់ពួកគេទាំងពីរដូចជាមិនសូវត្រូវរូ៉វគ្នាប៉ុន្មានទេ។
អតីតខ្សែរបស់ Real Madrid រូបនេះបានបន្តថា កាលរូបលោកនៅលេងឲ្យក្រុម AC Milan ទម្រង់លេងរបស់លោកមានភាពល្អប្រសើរ ដោយសារតែកាលនោះគ្រូបង្វឹកមានការជឿទុកចិត្តលើសមត្ថភាពរបស់លោក។
លោកបានបន្តទៀតថា លុះមកដល់ក្រុម Real Madrid លោកត្រូវបានជាប់ឈ្មោះជាកីឡាករបម្រុងរហូតដោយសារតែគ្រូបង្វឹកមិនបានផ្តល់ឱកាសឲ្យលោកបានបញ្ចេញសមត្ថភាព។ បែបនេះហើយទើបទម្រង់លេងរបស់លោកធ្លាក់ចុះម្តងបន្តិចៗ រហូតដល់កែប្រែលែងឡើង។
គួរបញ្ជាក់ថា Kaka បានលេងក្រោមការបង្វឹករបស់បុរសសញ្ជាតិព័រទុយហ្គាល់ លោក Jose Mourinho ពីឆ្នាំ២០១០ រហូតដល់ឆ្នាំ ២០១៣ ដោយកាលនោះ រូបគេបានចាកចេញពីទឹកដី Santiago Bernabeu ១ខែក្រោយពីលោក Mourinho បានប្រកាសលាលែងពីដំណែងចេញពីក្រុម Real Madrid៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
