ទល់លាមក គឺជាអាការដែលក្រពះពោះវៀនរបស់អ្នកមានបញ្ហា និងរបត់ពោះវៀនធ្វើធ្វើការខុសពីធម្មតា។ មនុស្សម្នាក់ៗសុទ្ធតែជួបប្រទះបញ្ហាទល់លាមកនេះ តែបើឧស្សាហ៍កើតមានញឹកញាប់វិញ វាអាចបង្កជាការឈឺចាប់ ហើយអាចប្រឈមនឹងហានិភ័យនៃជំងឺឬសដូងបាតថែមទៀតផង។
បើទោះបីជាមានថ្នាំមួយចំនួនអាចធ្វើការព្យាបាលអាការទល់លាមកបានក៏ពិតមែន ប៉ុន្តែវាក៏អាចបង្កជាផលប៉ះពាល់ដល់សុខភាពដែរ ដូច្នេះហើយបានជាថ្ងៃនេះយើងសុំណែនាំមិត្តអ្នកអាន អំពីវិធីប្រើប្រាស់ប្រេងអូលីវដើម្បីព្យាបាលអាការទល់លាមកបានយ៉ាងមានប្រសិទ្ធភាព។
ហេតុអ្វីប្រេងអូលីវអាចជួយដល់បញ្ហាទល់លាមក?
- ប្រេងអូលីវអាចជួយបង្កើនទឹកប្រម៉ាត់ដើម្បីជួយដល់ប្រព័ន្ធរំលាយអាហារក្នុងការដុតរំលាយជាតិខ្លាញ់ និងចំណីអាហារឱ្យបានល្អប្រសើរជាងមុន។ ជាពិសេសវាអាចរក្សាសំណើមពោះវៀនធំ និងសម្រួលដល់ពោះវៀនធំឱ្យការបន្ទោរបង់កាន់តែងាយស្រួលជាងមុន បង្ការ និងព្យាបាលបញ្ហាទល់លាមកផងដែរ។
- ប្រេងអូលីវអាចប្រឆាំងនឹងអាការហើម ឬរលាកពោះវៀនធំ
- ប្រេងអូលីវមានផ្ទុកសារធាតុមួយចំនួនដែលអាចជួយធ្វើឱ្យលាមកទន់ ងាយស្រួលបន្ទោរបង់
- សារធាតុ និងរ៉ែសំខាន់ៗដែលមាននៅក្នុងប្រេងអូលីវដូចជា វីតាមីន E វីតាមីនK សារធាតុប្រឆាំងអុកស៊ីតកម្ម និងអាស៊ីតខ្លាញ់ឆ្អែតអូមេហ្គា៣ (Omega-3 Fatty Acids) ដែលអាចជួយដល់ប្រព័ន្ធរំលាយអាហារសុខភាពក្រពះពោះវៀន និងព្យាបាលអាការទល់លាមកបានយ៉ាងមានប្រសិទ្ធភាព។
(ប្រេងអូលីវ អ្នកអាចរកទិញបានដោយងាយនៅតាមបណ្តាផ្សារទំនើប និងពិនិត្យឈ្មោះឱ្យបានត្រឹមត្រូវ ដោយជ្រើសរកតែប្រភេទប្រេងអូលីវ Extra Virgin Olive Oil មកប្រើតែប៉ុណ្ណោះ)
ដូច្នេះដើម្បីកុំឱ្យខាតពេលយូរ មកតាមដានការប្រើប្រាស់ប្រេងអូលីវ ដើម្បីព្យាបាលអាការទល់លាមកទាំងអស់គ្នា៖
១.ប្រេងអូលីវ
- ជាដំបូងគ្រាន់តែទទួលទានប្រេងអូលីវ ១ ទៅ២ស្លាបព្រាបាយនៅពេលព្រឹកពេលពោះទទេ
- បន្ទាប់មក ហាមទទួលទានទឹក ឬអ្វីទាំងអស់រយៈពេល ១ម៉ោង បន្ទាប់ពីទទួលទានប្រេងអូលីវរួច។ ជាចុងក្រោយអ្នកនឹងរត់ទៅបន្ទប់ទឹកភ្លាមៗដើម្បីបន្ទោរបង់ ហើយអាការទល់លាមករបស់អ្នកប្រាកដជាធូរស្រាលជាមិនខាន។
ចំណាំ៖ អ្នកក៏អាចបញ្ចុកប្រេងអូលីវ ១ស្លាបព្រាដល់កូនតូចៗរបស់អ្នកដែលមានបញ្ហាទល់លាមកផងដែរ ដើម្បីធ្វើឱ្យអាការបានធូរស្រាល។
២.ប្រេងអូលីវ និងក្រូចឆ្មារសម្បកលឿង (Lemon)
- អ្នកគ្រាន់តែលាយប្រេងអូលីវ ១ស្លាបព្រា ជាមួយនឹងទឹកក្រូចឆ្មារសម្បកលឿង ១ស្លាបព្រា (Lemon អាចទិញនៅផ្សារទំនើប តែបើពិបាករកប្រើក្រូចឆ្មារធម្មតាក៏បាន)
- បន្ទាប់មកទទួលទានវាមុនពេលចូលគេងរាល់យប់ នោះអាការទល់លាមករបស់អ្នកប្រាកដជាបានប្រសើរឡើង។
៣. ប្រេងអូលីវ និងទឹកក្រូច
- ច្របាច់ទឹកក្រូចស្រស់ៗ ១កែវ រួចលាយជាមួយនឹងប្រេងអូលីវ ២ស្លាបព្រា កូរចូលគ្នាឱ្យសព្វ
- បន្ទាប់មកទទួលទានទឹកមួយនេះ រាល់ពេលព្រឹកពេលពោះទទេ នោះអាការទល់លាមកនឹងបានធូរស្រាល។
ចំណាំ៖ សម្រាប់កូនក្មេង អ្នកអាចលាយប្រេងអូលីវកន្លះស្លាបព្រា ជាមួយនឹងទឹកក្រូចច្របាច់ស្រស់ៗ ១ពែងជំនួសវិញ ដើម្បីព្យាបាលជំងឺទល់លាមក។
៤. ប្រេងអូលីវ និងទឹកដោះគោជូរ
- យកទឹកដោះគោជូរធម្មជាតិគ្មានជាតិស្ករ និងខ្លាញ់ ១ពែង លាយជាមួយនឹងប្រេងអូលីវ ១ស្លាបព្រា កូរចូលគ្នាឱ្យសព្វ
- បន្ទាប់មក អ្នកត្រូវទទួលទានវា ១ថ្ងៃ ៣ដង គឺ ពេលព្រឹកពេលពោះទទេម្តង ពេលអាហារថ្ងៃត្រង់ម្តង និងពេលយប់មុនចូលគេងម្តងទៀត។
- អនុវត្តបែបនេះជាប្រចាំអ្នកនឹងអស់កង្វល់ពីបញ្ហាទល់លាមក។
៥. ប្រេងអូលីវ និងផ្លែចេក
- យកចេកទុំ ១ផ្លែបកសម្បកចេញ រួចកាត់វាជាដុំៗកិនលាយជាមួយនឹង ប្រេងអូលីវចំនួន ១ស្លាបព្រា
- បន្ទាប់មក ទទួលទានវា ១ថ្ងៃ ៣ដងរហូតដល់បញ្ហាទល់លាមករបស់អ្នកជាសះស្បើយ។
៦. ប្រេងអូលីវ និងម្នាស់
- យកសាច់ម្នាស់ដែលកាត់ដុំៗ ១ចាន មកកិន ឬក្រឡុកលាយជាមួយនឹងប្រេងអូលីវ ១ស្លាបព្រា
- ជាចុងក្រោយ អ្នកអាចទទួលទានវា មួយថ្ងៃ ២ដងដើម្បីជំនួយដល់ចលនាពោះវៀន និងធ្វើឱ្យអាការទល់លាមកបានធូរស្រាលជាងមុន។
៧. ប្រេងអូលីវ និងកាហ្វេ
- យកប្រេងអូលីវ ១ស្លាបព្រា កូរលាយជាមួយនឹងកាហ្វេក្តៅៗស្រស់ៗ ១ពែង
- បន្ទាប់មក ទទួលទានវា២ដងក្នុងមួយថ្ងៃ គឺពេលព្រឹកម្តង និងពេលល្ងាចម្តង។
- វិធីមួយនេះអាចជួយធ្វើឱ្យប្រព័ន្ធរំលាយអាហារដំណើរការល្អ ថែមទាំងជួយសម្រួលអាការទល់លាមកផងដែរ។
៨.ប្រេងអូលីវ និងទឹកដោះគោឆៅ
- យកប្រេងអូលីវ ១ស្លាបព្រាកូរលាយនៅក្នុងទឹកដោះគោឆៅក្តៅឧណ្ហៗ ១កែវ
- បន្ទាប់មកទទួលទានទឹកនេះរាល់ព្រឹកពេលពោះទទេ នោះអាការទល់លាមកប្រាកដជាបានធូរស្រាលជាងមុន។
៩. ប្រេងអូលីវ និងផ្លែឈើ
អ្នកអាចយកផ្លែឈើណាក៏បាន ដែលសម្បូរទៅដោយជាតិកាកសរសៃអាហារមកធ្វើជាសាឡាត់ផ្លែឈើលាយជាមួយនឹងប្រេងអូលីវដូចជា៖ ផ្លែប៉ោម និងសារីជាដើម ។ ដោយគ្រាន់តែលាងផ្លែឈើឱ្យបានស្អាត ដោយមិនបាច់ចិតសម្បករួចកាត់ជាចំណិតៗហើយលាយជាមួយប្រេងអូលីវ ១ស្លាបព្រា។ រួចទទួលទានវាជាប្រចាំរាល់ថ្ងៃ នោះអាការទល់លាមកប្រាកដជាបានធូរស្រាលជាងមុន។
១០. ប្រេងអូលីវ និងបន្លែ
ងាយៗ គ្រាន់តែអ្នកទទួលទានបន្លែដែលសម្បូរទៅដោយជាតិកាកសរសៃអាហារដូចជា៖ សណ្តែក ដំឡូងជ្វា ផ្កាខាត់ណាខៀវ និងពពួកបន្លែបៃតងជាច្រើនមុខផ្សេងទៀតជាមួយនឹងប្រេងអូលីវដើម្បីសម្រួលអាការទល់លាមក។
សម្គាល់៖
- ដើម្បីឱ្យការព្យាបាលអាការទល់លាមកកាន់តែមានប្រសិទ្ធភាព អ្នកត្រូវតែទិញប្រេងអូលីវសុទ្ធដែលមានដាក់អក្សរថា Extra Virgin Olive Oil ហើយអាចរកទិញបានដោយងាយនៅរាល់ផ្សារទំនើបនានា។
គន្លឹះបន្ថែម៖
ដើម្បីការពារ និងធ្វើឱ្យអាការទល់លាមកកាន់តែធូរស្រាលអ្នកអាចអនុវត្ត និងចៀសវាងការទទួលទានអាហារមួយចំនួនដូចជា៖
- កាត់បន្ថយការទទួលទានអាហារដែលមានជាតិខ្លាញ់ និងសាច់ច្រើន រួមទាំងអាហាកែច្នៃផ្សេងៗ
- ធ្វើសកម្មភាពបន្ថែមដូចជាហាត់ប្រាណ ឬហាត់យូហ្គា
- កាត់បន្ថយភាពតានតឹងនៅក្នុងអារម្មណ៍
- ទទួលទានទឹកឱ្យបានច្រើន យ៉ាងហោចឱ្យបាន ៨កែវក្នុងមួយថ្ងៃ
- ទទួលទានបន្លែ និងផ្លែឈើដែលសម្បូរទៅដោយជាតិកាកសរសៃអាហារឱ្យបានច្រើនដូចជាផ្លែប៉ោម ពពួកផ្លែក្រូច ផ្លែល្ហុង និងពពួកផ្លែឈើជាច្រើនមុខផ្សេងទៀត។
ក្នុងករណីអ្នកអនុវត្តវិធីសាស្រ្តធម្មជាតិខាងលើដោយការប្រើប្រេងអូលីវ និងអនុវត្តគន្លឹះបន្ថែមខាងលើរួចហើយ តែអាការទល់លាមកនៅតែមិនធូរស្រាលនោះ អ្នកត្រូវតែប្រញាប់ទៅពិគ្រោះជាមួយវេជ្ជបណ្ឌិតជំនាញ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]