រាជធានីភ្នំពេញ ៖ ជានិស្សិតម្នាក់ដែលកំពុងតែខិតខំប្រឹងប្រែងសិក្សារៀន សូត្រនៅសាកលវិទ្យាល័យអាស៊ីអឺរ៉ុប ឆ្នាំទី២ ផ្នែកអក្សរសាស្ត្រអង់គ្លេស កញ្ញាស្បោង រិទ្ធីយ៉ា អាយុ១៩ឆ្នាំ បានជ្រៀតខ្លួនប្រឡូកក្នុងពិភពសិល្បៈចម្រៀង និងសម្តែងតាមរយៈការប្រឡងតារាទូរទស្សន៍នៃស្ថានីយទូរទស្សន៍ បាយ័ន។ ការចំណាយពេលវេលាដ៏ មានតម្លៃជ្រៀតចូលទៅក្នុងវិស័យសិល្បៈចម្រុះនេះ ដោយសារនាងមាននិស្ស័យស្រឡាញ់សិល្បៈមិនអាចកាច់ផ្តាច់បាន ទើបនៅឆ្នាំ២០១០ ក៏សម្រេចចិត្តដាក់ពាក្យចូលប្រឡងប្រកួតប្រជែងរូបសម្ផស្ស និងទឹកដមសំឡេងក្នុងកម្មវិធីតារាទូរទស្សន៍នៃស្ថានីយទូរទស្សន៍ បាយ័ន ហើយបានជាប់ចំណាត់ថ្នាក់លេខ៣ ។
កញ្ញាស្បោង រិទ្ធីយ៉ា បានឱ្យអ្នកយកព័ត៌មានយើងដឹងថា ក្រោយពីជាប់ជាតារាទូរទស្សន៍មក នាងក៏ចាប់អាជីពជាអ្នកចម្រៀងនៅតាមពិធីមង្គលការ និងនៅលើឆាកប្រគំតន្ត្រីចុងសប្តាហ៍តាមស្ថានីយទូរទស្សន៍នានាផង ដែរ ។ កន្លងមកនាងតែងតែមានឱកាសបានបង្ហាញខ្លួនក្នុងកម្មវិធីប្រគំ តន្ត្រីតាមស្ថានីយទូរទស្សន៍បាយ័ន និងអប្សរាប៉ុស្តិ៍លេខ១១ ដោយជ្រើសរើសបទចម្រៀងសម័យចម្រុះ ហើយថ្មីៗនេះនាងឡើងច្រៀងនៅក្នុងកម្មវិធីដួងតារាមាស២០១២ របស់ស្ថានីយទូរទស្សន៍អប្សរាប៉ុស្តិ៍លេខ១១ នាងបានជ្រើសរើសបទចម្រៀង៤បទ គឺបទ «សូម្បីគេងលក់ក៏មិនឃ្លាតពីគ្នា» បទ «មើល» បទ «ឃាត់យ៉ាងណាបើបងចង់បែក» និងបទ «មិនឃើញទឹកភ្នែកអ្នកចាស់ តែឃើញស្នាមញញឹមអ្នកថ្មី»។
តាមរយៈបទចម្រៀង៤បទខាងលើនេះមិនត្រឹមតែ មានទឹកដមពីរោះរណ្តំចិត្តប្រិយមិត្តអ្នកទស្សនាផ្ទាល់ ប៉ុណ្ណោះទេ តែនាងបានធ្វើឱ្យយុវវ័យជាច្រើនអណ្តែតអណ្តូងលង់ក្នុង សម្ផស្សរបស់នាងថែមទៀតផង ។ កញ្ញាស្បោង រិទ្ធីយ៉ា ឱ្យដឹងទៀតថា កន្លងមកនាងក៏ធ្លាប់ចូលរួមថតសម្តែងកាយវិការខារ៉ាអូខេឱ្យ ផលិតកម្មរ៉ក់ និងសម្តែងថតភាពយន្តភាគឱ្យទូរទស្សន៍ CTN តាមរយៈរឿង «បេះដូងអ្នកការពារ» និងសម្តែងថតឱ្យស្ថានីយទូរទស្សន៍ប៉ុស្តិ៍លេខ៥ ក្នុងរឿង «ពេជ្រក្នុងបេះដូង» និងថតឱ្យប៉ុស្តិ៍បាយ័នតាមរយៈរឿង «ទឹកភ្នែកហូរគ្មានអ្នកជូត» ដែលអ្នកដឹកនាំតម្រូវឱ្យនាងសម្តែងជាតួអង្គកាចឆ្នាសឆ្នើម ឈ្នានីសគេ ។
កញ្ញាស្បោង រិទ្ធីយ៉ា និយាយថា ការក្លាយជាអ្នកសិល្បៈមិនត្រឹមតែសប្បាយ មានអារម្មណ៍ស្រស់ថ្លាប៉ុណ្ណោះទេ គឺថែមទាំងមានគេស្គាល់ច្រើន និងបានដើរលេងកម្សាន្តតាមតំបន់ទេសចរណ៍ធម្មជាតិគ្រប់ខេត្ត- ក្រុងទូទាំងព្រះរាជាណាចក្រកម្ពុជាផងដែរ ។ នាងសន្យាថា នឹងធ្វើជាអ្នកចម្រៀង និងសម្តែងរហូតដល់ចាស់កោងខ្នង ៕
ដោយ ៖ ធីតាកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
