រាជធានីភ្នំពេញ ៖ ស្ត្រីជាសន្តិសុខឯកជនម្នាក់បានរត់មកប្តឹងសមត្ថកិច្ចឱ្យជួយរកយុត្តិធម៌ ក្រោយពីរូបនាងត្រូវប្រធានក្រុមចាប់រំលោភរហូតសម្រេច រួមគំរាមសម្លាប់បើនាងទម្លាយរឿងនេះ ហេតុការណ៍នេះកើតឡើងកាលពីម៉ោង១យប់រំលងអធ្រាត្រឈានចូលថ្ងៃទី១១ មីនា ស្ថិតក្នុងសង្កាត់ស្ទឹងមានជ័យ២ ខណ្ឌមានជ័យ ។
ស្ត្រីជនរងគ្រោះខាងលើមានអាយុ៤៦ឆ្នាំ មុខរបរសន្តិសុខ ចំណែកជនសង្ស័យឈ្មោះ សួង សុខឌឿន អាយុ៣៦ឆ្នាំ ស្នាក់នៅកន្លែងកើតហេតុ និងប្រធានដឹកនាំក្រុមសន្តិសុខទូទៅនៃក្រុមហ៊ុនឯកជនមួយ ។
ប្រភព័ត៌មានឱ្យដឹងថា នៅយប់ថ្ងៃទី០៩ មីនា បុរសជាប្រធានក្រុមមកពីច្រៀងខារ៉ាអូខេនៅម៉ោងរំលងអធ្រាត្រ ហើយចាប់ស្ត្រីរងគ្រោះចូលបន្ទប់ខ្លួនប៉ុនប៉ងរំលោភតែមិនសម្រេច លុះដល់យប់ឈានចូលថ្ងៃទី១១ ជនសង្ស័យត្រឡប់មកពីច្រៀងក៏ចាប់ស្ត្រីរងគ្រោះម្តងទៀត ទើបបានសម្រេច ក្រោយរំលោភរួចជនសង្ស័យបានគំរាមសម្លាប់ ប្រសិនបើនាងនិយាយរឿងនេះប្រាប់នរណាផ្សេងនោះ។
ដោយការភ័យខ្លាចស្ត្រីរងគ្រោះមិនបានប្រាប់ឡើយ លុះថ្ងៃទី១៨ នាងសម្រេចចិត្តប្រាប់រឿងនេះទៅអ្នកធ្វើការជាមួយគ្នា ក៏ត្រូវពួកគេឱ្យយោបល់ទៅប្តឹងសមត្ថកិច្ចតែម្តង ។ ហើយព្រឹកថ្ងៃទី១៩ នាងក៏មកកាន់ប៉ុស្តិ៍រដ្ឋបាលស្ទឹងមានជ័យទី២ រៀបរាប់ពីដំណើររឿងប្រាប់សមត្ថកិច្ច ដើម្បីសមត្ថកិច្ចជួយអន្តរាគមន៍ ។
ក្រោយការដាក់ពាក្យបណ្តឹងរួចរាល់ សមមត្ថកិច្ចបានហៅសាក្សីម្នាក់មកបំភ្លឺផងដែរ ដែលជាសន្តិសុខសម្រាកនៅផ្ទះជួលជាមួយគ្នាដែលបានឃើញ និងលឺសូរសម្រែករបស់ស្ត្រីរងគ្រោះ តែមិនហ៊ានជួយ ព្រោះជនសង្ស័យជាមេកើយ ។
លោកណេង សាមឿន នាយប៉ុស្តិ៍នគរបាលឱ្យដឹងថា ក្រោយទទួលពាក្យបណ្តឹង និងរាយការណ៍ជូនថ្នាក់លើរួចមក នគរបាលនៃនាយកដ្ឋានសន្តិសុខឯកជនក្រសួងមហាផ្ទៃបានមកទទួលពាក្យបណ្តឹងបន្ត ដើម្បីយកទៅបន្តនីតិវិធី ព្រោះរឿងរ៉ាវនេះពាក់ព័ន្ធនឹងសន្តិសុខឯកជន ។ យ៉ាងណាមិញជនសង្ស័យល្មោភកាមបានរត់គេចខ្លួនបាត់ស្រមោលសូន្យទៅហើយ ក្រោយដឹងថា ស្ត្រីរងគ្រោះមកដាក់ពាក្យបណ្តឹង ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]