ហុងកុង៖ លោក Lam Ching Ying ដែលបងប្អូនខ្មែរយើងស្គាល់ច្បាស់ថាជា “គ្រូម៉ៅចាប់ខ្មោច” គឺជាតារាសម្តែងដ៏ល្បីល្បាញមួយរូប ក្នុងវិស័យភាពយន្តហុងកុង ក្នុងទស្សវត្សរ៍ទី ៩០។ លោកបានកើតនាទីក្រុងហុងកុង នាខែធ្នូ ឆ្នាំ១៩៥២ ជាកូនទី៣ ក្នុងគ្រួសារមានកូនចំនួន ៦ នាក់។
លោកបានកសាងភាពល្បីល្បាញខ្លាំង ក្រោយពីបានដើរតួជាគ្រូចាប់ខ្មោច ក្នុងខ្សែភាពយន្តខ្មោចឆៅ មានដូចរឿង Mr. Vampire និង Vampire Expert ជាដើម។ ជាអកុសល លោក Lam Ching Ying បានទទួលមរណភាពនាថ្ងៃទី ៨ វិច្ឆិកា ១៩៩៧ ក្នុងអាយុ ៤៤ ឆ្នាំ ដោយសារជំងឺមហារីក។
មរណភាពរបស់លោក កើតឡើងរយៈពេលពីរសប្តាហ៍ បន្ទាប់ពីចែកផ្លូវគ្នាជាមួយនឹងតារាស្រីនាង Kingdom Yeun ដែលធ្លាប់សម្តែងរួមគ្នាក្នុងភាពយន្តរឿង Vampire Expert វគ្គ ១។
អ្វីគួរឲ្យកត់សម្គាល់នោះ រយៈពេលប្រហែល ២០ ឆ្នាំមកហើយ ក្រោយការស្លាប់របស់លោក Lam Ching Ying យើងសង្កេតឃើញថា តួអង្គកូនសិស្ស ដែលធ្លាប់សម្តែងជាមួយគ្រូខ្មោចរូបនេះ មានវ័យកាន់តែចាស់ផងដែរ។
ចង់ដឹងថាតើ ពួកគេមានការប្រែប្រួលយ៉ាងណាខ្លះហើយ សូមតាមដានទាំងអស់គ្នា៖
១. លោក Collin Chou ដើរតួជាកូនសិស្សច្បងគ្រូម៉ៅ ក្នុងភាពយន្តរឿង Exorcist Master
កើតនាថ្ងៃទី៖ ១១ សីហា ១៩៦៧ (៥០ ឆ្នាំ)
ទីកន្លែងកំណើត៖ តៃវ៉ាន់
ជីវប្រវត្តិ៖ លោក Collin Chou មិនត្រឹមតែធ្លាប់សម្តែងជាមួយលោក Lam Ching Ying ប៉ុណ្ណោះទេ តារាប្រុសរូបនេះ ធ្លាប់បានសហការសម្តែងជាមួយកំពូលតារាភាពយន្តល្បីៗដូចជា Jet Li (លីលានជា), Sammo Hung (អាម៉ាប់) និង Donnie Yen (កុំកុំ) ផងដែរ ក្នុងភាពយន្តវាយតប់គ្នាដូចជារឿង Sha Po Lang (2005), Fearless (2006), និង Flash Point (2007) ជាដើម។
២. លោក Chin Siu-ho ដើរតួជាកូនសិស្ស (ហៅ Chau-sang) របស់គ្រូម៉ៅ ក្នុងភាពយន្តរឿង Mr. Vampire
កើតនាថ្ងៃទី៖ ២៦ មករា ១៩៦៣ (៥៥ ឆ្នាំ)
ទីកន្លែងកំណើត៖ ហុងកុង
ជីវប្រវត្តិ៖ តារាសម្តែងរូបនេះ បានប្រឡូកចូលវិស័យភាពយន្តតាំងពីឆ្នាំ ១៩៧៨ រហូតមកទល់សព្វថ្ងៃ និងទទួលការប្រជាប្រិយភាពលើកដំបូង ក្នុងទសវត្សរ៍ឆ្នាំ ១៩៨០។
លោកកសាងភាពល្បីល្បាញខ្លាំងក្នុងភាពយន្តរឿង Tai Chi Master និង Fist of Legend ដោយបានសម្តែងរួមគ្នាជាមួយកំពូលតារាភាពយន្ត Jet Li។ ចុងក្រោយនេះ លោក Chin Siu-ho បានសម្តែងក្នុងភាពយន្ត Vampire Cleanup Department (២០១៧) ជាភាពយន្តខ្មោចឆៅបែបកំប្លែង ផលិតឡើងដើម្បីរំលឹកដល់ គ្រូចាប់ខ្មោច Lam Ching Ying ដែលបានស្លាប់ទៅ អស់រយៈពេល២០ កន្លងមកនេះ។
៣. លោក Ricky Hui ដើរតួជា Man-choi ក្នុងភាពយន្តរឿង Mr. Vampire
កើតនាថ្ងៃទី៖ ០៣ សីហា ១៩៤៦ (ស្លាប់ក្នុងឆ្នាំ ២០១១ អាយុ ៦៥)
ទីកន្លែងកំណើត៖ ខេត្តក្វាងទុង
ជីវប្រវត្តិ៖ លោកកើតក្នុងគ្រួសារមួយ មានឪពុកជាអ្នកលេងវីយ៉ូឡុង និងម្តាយជាអ្នកស្រលាញ់គាំទ្រសិល្បៈល្ខោន។ លោក Ricky Hui មានបងប្អូនប្រុស ២ នាក់ គឺ Michael Hui និង Samuel Hui ដែលប្រឡូកចូលវិស័យសិល្បៈដូចគ្នា។ បងប្អូនទាំងបី ធ្លាប់សម្តែងរួមគ្នា ក្នុងភាពបែបកំប្លុកកំប្លែងជាច្រើនខ្សែផងដែរ។
លោកបានទទួលមរណភាពនាថ្ងៃទី ០៨ វិច្ឆិកា ២០១១ ក្នុងអាយុ ៦៥ ឆ្នាំ ដោយសារជំងឺគាំងបេះដូង។
៤. លោក Billy Lau ក្នុងភាពយន្តរឿង Mr. Vampire និង Mr. Vampire 3
កើតនាថ្ងៃទី៖ ៣ មេសា ១៩៥៤ (៦៣ ឆ្នាំ)
ទីកន្លែងកំណើត៖ ហុងកុង
លោកត្រូវបានមហាជនស្គាល់ច្បាស់ ក្រោយពីបានដើរតួជានាយប៉ូលិសក្នុងភាពយន្ត Mr. Vampire។ ក្រៅពីនេះ លោក Billy Lau ក៏ធ្លាប់បានដើរតួជាកូនសិស្សរបស់គ្រូចាប់ខ្មោច Lam Ching Ying ផងដែរ ក្នុងភាពយន្តរឿង Mr. Vampire វគ្គ៣។
ប៉ុន្មានឆ្នាំកន្លងមកនេះ លោក Billy Lau ហាក់ដូចជាពុំបានបង្ហាញខ្លួន ក្នុងវិស័យភាពយន្តទៀតឡើយ។
៥. លោក Frankie Lam ក្នុងភាពយន្តរឿង Vampire Expert 2
កើតនាថ្ងៃទី៖ ១៩ ធ្នូ ១៩៦៧ (៥០ឆ្នាំ)
ទីកន្លែងកំណើត៖ ហុងកុង
ជីវប្រវត្តិ៖ លោក Frankie Lam បានប្រឡូកចូលវិស័យភាពយន្តហុងកុង តាំងពី ១៩៨៩ រហូតមកទល់សព្វថ្ងៃ និងបានរៀបការក្នុងឆ្នាំ ២០០៤ ជាមួយនឹងតារាស្រីនាង Kenix Kwok និងទទួលបានចំណងដៃកូនស្រីម្នាក់ផងដែរ។
លោក Frankie Lam នៅបន្តអាជីពជាតារាសម្តែងដដែល ដោយភាពយន្តចុងក្រោយរបស់លោក គឺរឿង My Unfair Lady (2017) ចាប់គូជាមួយតារាស្រី Jessica Hsuan។
៦. លោក Mang Hoi ដើរតួជាកូនសិស្សច្បងគ្រូម៉ៅ ក្នុងភាពយន្តរឿង Vampire Expert វគ្គ ២
កើតក្នុងឆ្នាំ ១៩៥៥
ទីកន្លែងកំណើត៖ ហុងកុង
ជីវប្រវត្តិ៖ លោកបានសហការសម្តែងជាមួយលោក Lam Ching Ying ក្នុងភាពយន្តរឿង Vampire Expert វគ្គ ២ មានសរុប ៥០ ភាគ តែអ្វីគួរឲ្យសោកស្តាយ វគ្គ ៣ នៃភាពយន្តនេះ ត្រូវបានរំសាយ ក្រោយលោក Lam Ching Ying បានទទួលមរណភាព។
លោកត្រូវបានគេដឹងថា ហាក់ដូចជា ឃ្លាតឆ្ងាយពីវិស័យភាពយន្តតាំងពីទសវត្សរ៍ឆ្នាំ ១៩៩០ មកម៉្លេះ ពោលគឺបង្ហាញខ្លួនតិចតួចបំផុតនាពេលបច្ចុប្បន្ន។
៧. លោក Michael Miu ដើរតួជាប៉ូលិស ក្នុងភាពយន្តរឿង Magic Cop
កើតនាថ្ងៃទី៖ ១៨ មិថុនា ១៩៥៨ (៥៩ ឆ្នាំ)
ទីកន្លែងកំណើត៖ ខេត្តចេជាំង
តារាសម្តែងកំពស់ ១.៧៩ ម៉ែត្ររូបនេះ មុនពេលចាប់ដៃគូសម្តែងជាមួយលោក Lam Ching Ying ធ្លាប់កសាងភាពល្បីល្បាញរួចមកហើយក្នុងទសវត្សរ៍ឆ្នាំ ១៩៨០ ក្នុងចំណោមតារាល្បីៗដូចជា Tony Leung, Andy Lau,និង Felix Wong ជាដើម។ លោកបានរៀបអាពាពិពាហ៍ជាមួយតារាសម្តែងស្រីនាង Jaime Chik និងមានចំណងដៃកូនពីរនាក់។
៨. លោក Wilson Lam Chun Yin ដើរតួជាប៉ូលិស ក្នុងភាពយន្តរឿង Magic Cop
កើតនាថ្ងៃទី៖ ២៣ តុលា ១៩៦០ (៥៧ ឆ្នាំ)
ទីកន្លែងកំណើត៖ ខេត្តក្វាងទុង
តារាសម្តែងរូបសង្ហាលោក Wilson Lam ធ្លាប់សម្តែងក្នុងភាពយន្តរឿង Magic Cop ដើរតួជាប៉ូលិសសើុបអង្កេតលើករណីជួញដូរគ្រឿងញៀន ជាមួយលោក Lam Ching Ying (ហៅលោកពូ/លោកគ្រូ) និងតារាសម្តែង Michael Miu (ដើរតួជាប៉ូលិសដូចគ្នា)។ ក្នុងភាពយន្តនេះ ក៏មានការចូលរួមសម្តែងពីតារាស្រីជប៉ុន Michiko Nishiwaki ដើរតួជាបិសាច។
បច្ចុប្បន្ន លោក Wilson Lam ហាក់ពុំសូវបង្ហាញខ្លួនទេ ក្នុងវិស័យភាពយន្តហុងកុងទៀតឡើយ។
ប្រភព៖ Wikipedia | Lam Ching-ying | Chin Siu-ho | Billy Lau | MyDramaList | IMDb | HKCINEMAGIC
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]