នៅក្នុងសមុទ្រទឹកប្រៃដ៏ធំល្វឹងល្វើយ មានពពួកត្រីសមុទ្រ និងអាហារសមុទ្រជាច្រើន ដែលត្រូវបានមនុស្សទូទៅ និយមចូលចិត្តទទួលទាន មិនថាជាការទទួលទានស្រស់ៗ និងជាការយកមកចម្អិនជាអាហារផ្សេងៗនោះទេ ដោយសារតែវាមានរសជាតិឈ្ងុយឆ្ងាញ់ពិសា។ តែវាក៏មានផ្ទុកទៅដោយប្រូតេអ៊ីន សារធាតុរ៉ែ និងវីតាមីនសំខាន់ៗ ជាពិសេសគឺ អូមេហ្គា៣( Omega-3) ដ៏ច្រើនលើសលប់តែម្តង ដែលមានប្រយោជន៍ជួយដល់សុខភាពជាច្រើនមុខ។
ដូច្នេះ គ្រាន់តែអ្នកឧស្សាហ៍ទទួលទានពពួកអាហារសមុទ្រជាប្រចាំ នឹងផ្តល់ឱ្យអ្នកនូវគុណប្រយោជន៍ចំពោះសុខភាពរួមមាន៖
# សារធាតុសំខាន់ៗជំនួយសុខភាពទូទៅ
អាហារសមុទ្រដែលមានដូចជា ត្រីសាម៉ុន និងត្រីធូណា ជាប្រភពនៃវីតាមីន និងរ៉ែសំខាន់ៗរួមមានដូចជា វីតាមីន B-Complex B1 B12 Biotin វីតាមីន D វីតាមីន B ដែលមានប្រយោជន៍ជួយដល់ផ្នែកសុខភាពមួយចំនួនដូចជា៖
- បង្កើនថាមពលរាងកាយ
- ជំនួយដល់ការរំលាយអាហារ
- បង្កើនសមត្ថភាពប្រព័ន្ធបន្តពូជ
- ធ្វើឱ្យប្រព័ន្ធភាពស៊ាំកាន់តែរឹងមាំ
- ជំនួយដល់គ្រាប់ភ្នែក
- ជំនួយដល់ការរីកលូតលាស់ឆ្អឹង និងកោសិកាល្អៗ ព្រមទាំងជំនួយសុខភាពជាច្រើនផ្នែកទៀត។
# ជំនួយសុខភាពបេះដូង
ជាតិខ្លាញ់ឆ្អែតអូមេហ្គា ៣ របស់ពពួកគ្រឿងសមុទ្រ ត្រូវបានគេដឹងថាផ្តល់នូវសារធាតុសំខាន់ៗ ជំនួយដល់សុខភាពបេះដូងឱ្យកាន់តែប្រសើរជាងមុន និងបង្ការជំងឺមួយចំនួនផងដែរដូចជា៖ ជំងឺបេះដូង ជំងឺសរសៃឈាមបេះដូង ជំងឺដាច់សរសៃឈាមខួរក្បាល និងជំងឺគាំងបេះដូងជាដើម។
# ល្អសម្រាប់អ្នកដែលមានរោគសន្លាក់
ការទទួលទានពពួកគ្រឿងសមុទ្រជាប្រចាំឱ្យបានទៀងទាត់ អាចជួយការពារ និងកាត់បន្ថយការឈឺចុកចាប់នៃជំងឺទាក់ទងនឹង ឆ្អឹង សន្លាក់ និងរលាកសន្លាក់រ៉ាំរ៉ៃបានយ៉ាងប្រសើរផងដែរ។
# ជំនួយសុខភាពភ្នែក
ការទទួលទានពពួកគ្រឿងសមុទ្រជាប្រចាំ អាចជួយថែរក្សាសុខភាពឱ្យល្អប្រសើរជាងមុន ការពារជំងឺភ្នែកផ្សេងៗជាពិសេសជំងឺភ្នែកពេលដែលចាស់ឡើង និងធ្វើឱ្យភ្នែកភ្លឺថ្លា មើលច្បាស់ល្អទៀតផង។
# ជួយឱ្យស្បែកស្អាត
ជាតិអាស៊ីតខ្លាញ់ឆ្អែត អូមេហ្គា៣ (Omega-3 Fatty Acid) ក៏ត្រូវបានគេដឹងដែរថា ល្អបំផុតសម្រាប់ជំនួយស្បែកឱ្យស្រស់ស្អាត ភ្លឺថ្លា មានសំណើម ជាពិសេសអាចការពារស្បែកពីផលប៉ះពាល់នៃកម្តៅថ្ងៃ និងអាចការពារការកើតមុនលើផ្ទៃមុខ។
# ជំនួយសុខភាពខួរក្បាល
សារធាតុ DHA និង EPA ដែលមាននៅក្នុងអាស៊ីតខ្លាញ់ឆ្អែត អូមេហ្គា៣ (Omega-3 Fatty Acid) របស់ពពួកអាហារសមុទ្រ ត្រូវបានគេរកឃើញថា អាចជំនួយដល់សុខភាពខួរក្បាលទូទៅ បង្កើនការរីកលូតលាស់នៃកោសិកាខួរក្បាលរបស់ទារក និងកុមារ។ ជាពិសេស ការទទួលទានគ្រឿងសមុទ្រ ថែមទាំងអាចជំនួយដល់ការចងចាំ សម្រាប់អ្នកដែលដល់វ័យចំណាស់ឧស្សាហ៍ភ្លេចភ្លាំង រួមទាំងបង្ការជំងឺវង្វេងវង្វាន់របស់មនុស្សចាស់ផងដែរ (Alzheimer’s disease) ។
# ប្រឆាំងនឹងការធ្លាក់ទឹកចិត្ត
អាស៊ីតខ្លាញ់ឆ្អែតអូមេហ្គា៣ (Omega-3 Fatty Acid) របស់អាហារសមុទ្រ ថែមទាំងមានលទ្ធភាពប្រឆាំង និងការពារនឹងការកើតអាការធ្លាក់ទឹកចិត្ត ជំងឺថប់អារម្មណ៍ រួមទាំងបញ្ហាផ្លូវចិត្តមួយចំនួនបានយ៉ាងល្អប្រសើរផងដែរ។ ដូច្នេះការទទួលទានគ្រឿងសមុទ្រជាប្រចាំ នឹងធ្វើឱ្យសុខភាពផ្លូវចិត្តរបស់អ្នកល្អជាងមុន។
# ល្អសម្រាប់ស្ត្រីមានផ្ទៃពោះ
សម្រាប់ស្ត្រីដែលកំពុងតែមានផ្ទៃពោះ ការសិក្សាបានបង្ហាញថា ការទទួលទានពពួកអាហារសមុទ្រ អាចជួយបង្កើនការរីកលូតលាស់របស់ទារកក្នុងផ្ទៃឱ្យល្អប្រសើរ បង្ការការសម្រាលកូនមុនកំណត់ និងអាចជួយធ្វើឱ្យខួរក្បាល-ប្រព័ន្ធសរសៃប្រសាទទារករីកលូតលាស់ ដំណើរល្អទៀតផង។
# បង្កើនប្រព័ន្ធភាពស៊ាំ
អាហារសមុទ្រផ្ទុកទៅដោយ អាស៊ីតខ្លាញ់ឆ្អែតអូមេហ្គា៣ (Omega-3 Fatty Acid) និងសារធាតុប្រឆាំងអុកស៊ីតកម្ម ដែលអាចជួយការពាររាងកាយពីផលប៉ះពាល់នៃជំងឺផ្សេងៗ ជាពិសេសគឺជំងឺ ហឺត និងអាល្លែក្ស៊ីស្បែក៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]