បានម៉ាស៊ីនជំនួយពីកូនប្រុស កសិករដាំបន្លែរូបនេះ ស្រួលខ្លាំងតែម្តង (មានវីដេអូ)

ចិន៖ «ធ្វើការដោយភាពឆ្លាតវៃ មិនមែនដោយកម្លាំងតែមួយមុខ» ឬ «Work Smart, Not Hard» ប្រហែលជាត្រូវនឹងសាច់រឿងរបស់កសិករដាំបន្លែមួយរូប ឈ្មោះ Gong Rongniang អាយុ ៥៥ឆ្នាំ ដែលរស់នៅភូមិភាគអាគ្នេយ៍នៃខេត្ត Fujian ប្រទេសចិន។

កាលពីមុនអ្នកស្រី Gong ត្រូវចំណាយពេលប្រហែល ៣ម៉ោងក្នុងមួយថ្ងៃ ដើម្បីដឹកជញ្ជូនបន្លែទាំងនោះ ប៉ុន្តែឥឡូវនេះ អ្នកស្រីចំណាយពេលតែប្រហែល ៤០នាទីប៉ុណ្ណោះ។ ភាពងាយស្រួល និងរហ័សនេះ អាចកើតឡើងបានដោយសារអ្នកស្រីទទួលបានម៉ាស៊ីន hoverboard (ឧបករណ៍ទប់លំនឹងខ្លួន ដែលមានកង់២ ហើយអាចបើកទៅមុខបាន) ពីកូនប្រុសរបស់អ្នកស្រី។

តាមរយៈសារព័ត៌មាន Shanghaiist បានឲ្យដឹងថា អ្នកស្រី Gong បានទទួលម៉ាស៊ីនកង់២នេះ ប្រហែល២ឆ្នាំមកហើយ ដោយកូនស្រីរបស់អ្នកស្រីបានទិញម៉ាស៊ីននេះតាមប្រព័ន្ធអនឡាញក្នុងតម្លៃ ២០០០យ័ន (ប្រហែល ៣១៥ ដុល្លារអាមេរិក)។

បន្ទាប់ពីទទួលបានឧបករណ៍នេះ អ្នកស្រីក៏បានរៀនអំពីរបៀបទប់លំនឹងនៅលើម៉ាស៊ីន ហើយក៏អាចជិះវាបានយ៉ាងស្ទាត់ជំនាញ ក្នុងរយៈពេលតែ៣ម៉ោងប៉ុណ្ណោះ។

ឧបករណ៍នេះ អាចជួយសម្រួលជីវិតរបស់អ្នកស្រីបានមួយកម្រិត ដោយអ្នកស្រីបានជិះវា ដើម្បីរែកបន្លែនឹងស្មារបស់អ្នកស្រីតែម្តង។

ឡូយមែនទែន! អ្នកស្រី Gong ជិះ hoverboard ដឹកជញ្ជូនបន្លែ ហើយថែមទាំងដាក់ដៃទាំងពីរចូលក្នុងហោប៉ៅទៀតផង។

ភាពល្បីល្បាញរបស់អ្នកស្រី បានកើតឡើងកាលពីថ្ងៃសៅរ៍កន្លងទៅនេះ បន្ទាប់ពីអ្នកប្រើប្រាស់បណ្តាញសង្គម Weibo បានថតជាប់សកម្មភាពដែលអ្នកស្រីធ្វើដំណើរត្រលប់ទៅផ្ទះវិញ ក្នុងឱកាសបុណ្យចូលឆ្នាំចិននេះ។ 

វីដេអូនេះ ក៏ត្រូវបានគេចែកចាយយ៉ាងច្រើនសន្ធឹកសន្ធាប់ រហូតដល់មានអ្នកសារព័ត៌មានចុះទៅសាកសួរអ្នកស្រីដល់កន្លែងទៀតផង៕

សូមទស្សនាវីដេអូខាងក្រោម៖

• វីដេអូ