ភារកិច្ចជាប៉ូលិសស្រី! ត្រជាក់ដល់ -៥៦អង្សាឡើងកកដី ក៏ប៉ូលិសស្រីនៅតែទៅសម្រួលចរាចរណ៍ ពិតជាគួរឲ្យស្ងើចសរសើរមែន

ចិន៖ ប៉ូលិសជនជាតិចិនមួយរូបមកពីទីក្រុង Hulunbuir កំពុងទទួលបានការចាប់អារម្មណ៍ខ្លាំងតាមប្រព័ន្ធអនឡាញ បន្ទាប់ពីរូបភាពសម្រួលចរាចរណ៍ក្នុងស្ថានភាពអាកាសធាតុដ៏សែនត្រជាក់  ត្រូវបានគេចែករំលែកយ៉ាងច្រើនសន្ធឹកសន្ធាប់។

យោងទៅតាមសារព័ត៌មាន China Daily បានឲ្យដឹងថា កាលពីថ្ងៃអង្គារ ទី២៣ មករា កន្លងទៅ អាកាសធាតុនៅក្នុងទីក្រុងមួយនេះ បានចុះត្រជាក់ខ្លាំងរហូតដល់ -៥០.៤ អង្សាឯណោះ ដែលនេះជាអាកាសធាតុត្រជាក់បំផុតមិនធ្លាប់មានពីមុនមក សម្រាប់តំបន់មួយនេះ។

ខណៈដែលអាកាសធាតុកំពុងត្រជាក់ខ្លាំង និងងាយបណ្តាលឲ្យគ្រប់គ្នាកើតជំងឺផ្តាសាយនោះ ប៉ូលិសចរាចរណ៍ស្រី ដែលមានឈ្មោះថា Gai Qi នៅតែបន្តធ្វើតួនាទីរបស់ខ្លួន ជាអ្នកសម្រួលចរាចរណ៍នៅតាមដងផ្លូវដដែល។

អ្នកនាង Gai បាននិយាយថា៖

“ក្នុងនាមជាប៉ូលិសស្រី វាជាតួនាទីរបស់ខ្ញុំក្នុងការសម្រួលចរាចរណ៍ឲ្យមានសណ្តាប់ធ្នាប់”។

អំឡុងពេលបំពេញភារកិច្ច គេឃើញអ្នកនាង Gai ស្លៀកខោ និងអាវដែលធ្វើពីកប្បាស ជាមួយនិងអាវក្រៅវែង ព្រមជាមួយម៉ាសបិទមុខផងដែរ ដើម្បីតទល់នឹងអាកាសធាតុដ៏សែនត្រជាក់នោះ។

ទោះជាយ៉ាងណា គេបានឃើញម៉ាសរបស់អ្នកនាង Gai គ្រប់ដណ្តប់ដោយទឹកកកទៅហើយ ទោះបីជាអ្នកនាងទើបតែចេញទៅសម្រួលចរាចរណ៍បានត្រឹមតែ១០នាទីក៏ដោយ។

ចុងក្រោយ យើងសង្ឃឹមថា អ្នកនាង Gai នឹងមិនផ្តាសាយ ឬមានបញ្ហាជំងឺផ្សេងៗដោយសារតែអាកាសធាតុដ៏ត្រជាក់នោះទេ។ 

ពិតជាគួរឲ្យស្ងើចសរសើរដល់ប៉ូលិសស្រីម្នាក់នេះខ្លាំងណាស់ ដែលមានទំនួលខុសត្រូវខ្ពស់លើការងាររបស់ខ្លួន៕

• ការងារ
• ជំរុញទឹកចិត្ត
• អាកាសធាតុ