រាជធានីភ្នំពេញ ៖ នារីបម្រើការក្នុងខារ៉ាអូខេម្នាក់ បានស្រែកឱ្យគេជួយ ដោយមានស្នាមចាក់នៅត្រង់ពោះនិងដៃ ហើយក្រោយមកក៏បានដាច់ខ្យល់ស្លាប់ ពេលបញ្ជូនសង្គ្រោះនៅមន្ទីពេទ្យ ដែលករណីសង្ស័យជាករណីជាឃាតកម្ម កើតឡើងកាលពីវេលាម៉ោង១១និង៣០នាទីយប់ ថ្ងៃទី១៥ វិច្ឆិកា ស្ថិតត្រង់ចំណុចបន្ទប់ជួលលេខ១០២ ជាន់ទី១ ក្នុងភូមិទ្រុងមាន់ សង្កាត់អូបែកក្អម ខណ្ឌសែនសុខ ។ នារីរងគ្រោះខាងលើ ឈ្មោះ សេក ស៊ីយ៉ា ជាអ្នកបំរើការនៅក្នុងខារ៉ាអូខេ «ដឹឃ្វីន» ស្នាក់នៅកន្លែងកើតហេតុខាងលើ និងមានស្រុកកំណើរនៅខេត្តកំពត ។
បើតាមប្រភពពីបុរសម្នាក់សុំមិនបញ្ចេញឈ្មោះ ដែលស្នាក់នៅខាងមុខបន្ទប់ជួលខាងលើឱ្យដឹងថា នៅមុនពេលកើតហេតុ ឃើញបន្ទប់បានបានបិទទ្វាបើកភ្លើង និងមានសភាពស្ងប់ស្ងាត់ធម្មតាដូចសព្វដង ។ លុះដល់វេលាកើតហេតុ ស្រាប់តែគាត់បានឮសម្លេងគោះទ្វារបន្ទប់ជួលរបស់គាត់ស្រែកឱ្យជួយ ។ ហើយគាត់ក៏បានបើកទ្វារបន្ទប់ ក៏ឃើញនារីរងគ្រោះបានដេកសន្លប់នៅខាងមុខបន្ទប់គាត់ ទាំងមានស្នាមរយះនៅត្រង់ពោះនិងដៃខាងស្តាំ ។ បន្ទាប់មកគាត់ ក៏ឮសំឡេងមានមនុស្សរត់ចុះទៅក្រោម ហើយគាត់ក៏ស្រែកឆោឡោបង្កការមានការភ្ញាក់ផ្អើលដល់ពលរដ្ឋដែលរស់នៅក្បែរនោះតែម្តង ។
មួយសន្ទុះក្រោយមក ក៏ឃើញមានបុរសវ័យប្រហែល២០ឆ្នាំម្នាក់បានរត់ឡើងមក តែមិនដឹកថា ត្រូវជាអ្វីនិងនារីរងគ្រោះនោះទេ ហើយបានស្រែកយំយ៉ាងខ្លាំង និងបាននិយាយទាំងភាពស្លន់ស្លោថា «រូបគេបាននៅជាមួយនិងនារីរងគ្រោះអស់មួយល្ងាចមកហើយ រួចមកនារីរងគ្រោះបាននិយាយទូរស័ព្ទជាមួយនិងសង្សារចាស់ ហើយនារីរងគ្រោះបានខឹងនឹងសង្សារចាស់ រួចក៏យកកាំបិតមកចាក់ខ្លួនឯង» ។
ហើយបន្ទាប់មក បុរសរូបនោះគិតតែនិយាយទៅមុខទៅក្រោយ និងគិតតែពីស្រែកថា បាត់ទូរស័ព្ទIPhone 6plus ក្រោយមកប្រជាពលរដ្ឋនិងបុរសរូបនោះ បានដឹកនារីរងគ្រោះ តាមរ៉ឺម៉កកង់បីទៅសង្គ្រោះនៅមន្ទីពេទ្យព្រះកុសុមៈ តែជាអកុសលខណៈពេលទៅដល់មន្ទីពេទ្យនារីរងគ្រោះបានដាច់ខ្យល់ស្លាប់បាត់បង់ជីវិតបាត់ទៅហើយ។ ភ្លាមៗនោះ បុរសដែលបានអះអាងថា បាននៅជាមួយនារីរងគ្រោះ បានគេចខ្លួនទៅបាត់ដោយនិយាយថា «ទៅសងសឹក» ។
បើតាមសម្តីពីនារីដែលត្រូវជាបងស្រីនារីរងគ្រោះឱ្យដឹងថា ជារៀងរាល់ថ្ងៃ ពួកគេទាំងពីរនាក់គឺស្នាក់នៅក្នុងបន្ទប់ជួលជាមួយគ្នា លុះដល់វេលាម៉ោងប្រហែល៦ល្ងាច រូបនារីបានប្រាប់ប្អូនស្រីថា នាងចេញទៅជប់លេងនៅផ្ទះមិត្តភក្តិនៅម្តុំកំបូល ហើយនារីរងគ្រោះដែលត្រូវជាប្អូនស្រីបានប្រាប់ទៅវិញថា ថ្ងៃនេះនាងមិនទៅធ្វើការទេ ។ ស្រាប់តែដល់វេលាកើតហេតុ ក៏ត្រូវបានអ្នកជិតខាងតេទៅប្រាប់ថា នារីរងគ្រោះត្រូវបានគេចាក់ ហើយឥលូវត្រូវបានបញ្ចូនទៅសង្គ្រោះនៅមន្ទីពេទ្យព្រះកុសុមៈហើយ ។
ក្រោយពេលកើតហេតុ សមត្ថកិច្ចមូលដ្ឋាននិងសមត្ថកិច្ចជំនាញចុះធ្វើកំណត់ហេតុជំហានដំបូងសមត្ថកិច្ចបានសណ្ឋានថា ជាករណីឃាតកម្ម ដោយឡែក សាកសពនារីរងគ្រោះត្រូវបានសមត្ថកិច្ចប្រគល់ទៅអោយក្រុមគ្រួសារដឹកយកទៅធ្វើបុណ្យទៅតាមប្រពៃណីនៅឯស្រុកកំណើត។ បច្ចុប្បន្នសមត្ថកិច្ចកំពុងធ្វើការស្រាវជ្រាវវែករកមុខជនសង្ស័យ យកទៅដាក់ទោសទៅតាមផ្លូវច្បាប់ ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]