Leonardo អាចនឹងមកដឹកនាំកម្ពុជា វិញ ប្រសិនបើ….

បរទេស៖ អតីតគ្រូបង្វឹកក្រុមជម្រើសជាតិកម្ពុជា លោក Leonardo Vitorino បានបង្ហើបថា មានប្រិយមិត្ដកម្ពុជាជាច្រើន ចង់ឲ្យលោកមកដឹកនាំ ក្នុងក្រុមជម្រើសជាតិឡើងវិញ។

បុរសសញ្ជាតិប្រេស៊ីលរូបនេះ ត្រូវបានសហព័ន្ធបាល់ទាត់កម្ពុជា តែងតាំងជាគ្រូបង្គោលនៃក្រុមជម្រើសជាតិកម្ពុជា កាលពីខែមិនា ឆ្នាំ២០១៧ ក្រោយពីកុងត្រារបស់លោក Leoo Taehoon បានផុត។ យ៉ាងណាលោក Leonardo ត្រូវបានសហព័ន្ធបណ្ដេញចេញពីតំណែងកាលពីខែតុលា កន្លងទៅ។  

គ្រូបង្វឹកវ័យ៤៤ឆ្នាំនេះ បានដឹកនាំក្រុមជម្រើសជាតិកម្ពុជាចំនួន ៧ប្រកួត ដោយក្នុងនោះគឺចាញ់រហូតដល់ទៅ ៦ដង និងឈ្នះ១ដង (ឈ្នះ ១-០ លើក្រុមអាហ្គានីស្ថាន) ដែលជ័យជម្នះនោះ គឺលោកផ្ញើជូនជាពិសេស ទៅដល់សម្ដេចតេជោ ហ៊ុន សែន។

ក្រោយពីការចាកចេញរបស់លោក បានធើ្វឲ្យអ្នកគាំទ្រវិស័យបាល់ទាត់មិនពេញចិត្ដ និងចង់ឲ្យលោកវិលត្រលប់ មកដឹកនាំក្រុមមួយនេះសាជាថ្មី។ Leonardo បានប្រាប់ដល់ទំព័រ TheMorning ថា «មានប្រិយមិត្ដកម្ពុជា ជាច្រើនដែលចង់ឲ្យខ្ញុំវិលមកកម្ពុជា ហើយប្រព័ន្ធផ្សព្វផ្សាយ ក៏បានសួរខ្ញុំពីចំណុចនេះដែរ»។

«ខ្ញុំនឹងមកដឹកនាំក្រុមជម្រើសជាតិសាជាថ្មី ប្រសិនបើលោកនាយករដ្ឋមន្រ្ដី ហ៊ុន សែន ទាក់ទងមកខ្ញុំជាលក្ខណៈបុគ្គលថៃ្ងណាមួយ។ ខ្ញុំត្រូវការថាមពលដើម្បីឲ្យមានការផ្លាស់ប្ដូរ មិនមែនប្រើប្រាស់មនុស្ស ឫកីឡាករក្នុងស្រុក ដើម្បីធើ្វរឿងមិនល្អក្នុងវិស័យបាល់ទាត់កម្ពុជានោះទេ» លោក Leonardo បន្ថែម៕