រថយន្ត BMW បុកជាមួយកូរ៉ូឡា វិលខ្ញាល់ទៅបុក ជាប់បង្គោលភ្លើង រថយន្តទាំងពីរគ្រឿង ខូចខាតធ្ងន់ធ្ងរ ម្ចាស់រថយន្ត កូរ៉ូឡា រងរបួស

ភ្នំពេញ៖ ដោយសារអ្នកបើកបរ ធុំក្លិនស្រាដូចគ្នា មកដល់ចំណុច ផ្លូវកែងរថយន្ត BMW ពណ៌ខ្មៅ បុករថយន្តកូរ៉ូឡា ពណ៌ស្ករ ធ្វើឲ្យរថយន្ត BMW វិលខ្ញាល់ទៅបុកជាប់បង្គោល ភ្លើងធ្វើពីដែក បណ្តាលឲ្យរថយន្ត រងការខូចខាតស្ទើរទាំងស្រុង ម្ចាស់កូរ៉ូឡារងរបួសដៃស្តាំបន្តិច ។ គ្រោះថ្នាក់នេះកើតឡើងនៅ វេលាម៉ោង២និង៤៥នាទីរំលងអធ្រាត្រឈានចូលថ្ងៃទី៩ វិច្ឆិកា ឆ្នាំ២០១២ នៅចំណុចមហាវិថីព្រះនរោត្តម កែង ២១៤ ក្នុងសង្កាត់ចតុមុខ ខណ្ឌដូនពេញ ។

សាក្សីនៅកន្លែង កើតហេតុបានឲ្យដឹងថា រថយន្ត BMW ពណ៌ខ្មៅ ជិះគ្នា៣នាក់ ជាយុវជន បើកតាមផ្លូវលេខ២១៤ ពីកើតទៅលិច ចំណែករថយន្តកូរ៉ូឡា ពណ៌ស្ករ ជិះម្នាក់ឯង តាមមហាវិថីព្រះនរោត្តម ពីត្បូងទៅជើង ខណៈមកដល់ចំណុច ផ្លូវកែងអ្នកបើកបរ រថយន្តទាំងពីរគ្រឿងសុទ្ធតែធុំក្លិនស្រា បើកលឿនបណ្តាលឲ្យ បុកគ្នាលាន់ដូចរន្ទះធ្វើឲ្យរថយន្ត BMW វិលខ្ញាល់ពីរបីជុំទៅបុកជាប់បង្គោលភ្លើង ធ្វើពីដែកខូចខាតផ្នែកខាងមុខ និងចំហៀងខាងឆ្វេង ចំណែករថយន្តកូរ៉ូឡា របើកកំបូលនិងខូចខាត ចំហៀងខាងស្តាំ ម្ចាស់របួសដៃស្តាំបន្តិច ។

អ្នកបើករថយន្តកូរ៉ូឡាមានឈ្មោះ ណែម នីន ភេទប្រុស អាយុ៣១ឆ្នាំ ជាវិស្វករ ស្នាក់នៅផ្ទះអត់លេខ ផ្លូវលេខ២០២ សង្កាត់ទឹកល្អក់ទី២ ខណ្ឌទួលគោក ។

ក្រោយពេលកើតហេតុ រថយន្តទាំងពីរគ្រឿង ត្រូវសមត្ថកិច្ចយកទៅរក្សាទុក នៅការិយាល័យនគរបាលចរាចរណ៍ផ្លូវគោក ៕

ដោយ៖ ដើមអម្ពិល

ផ្តល់សិទ្ធដោយ ដើមអម្ពិល