អីយ៉ា! «ស្លឹកត្របែក» ក៏អាចជួយបំបាត់មុខមុន ជាំ អាចម៍រុយ និងស្នាមជ្រួញបានដែរតើ!

អត្ថបទមុនៗ អ្នកបានដឹងរួចមកហើយថា «​ស្លឹកត្របែក» មានសារធាតុមានប្រយោជន៍សំខាន់ៗ ដែលអាចជួយដល់បញ្ហាជាច្រើនរួមមាន៖ ​បញ្ហាក្លិនខ្លួន ​បញ្ហាក្លិនមាត់  និងបញ្ហាជ្រុះសក់ជាដើម។ 

តាមការស្រាវជ្រាវ ក៏បានរកឃើញដែរថា ​ស្លឹកត្របែកក៏អាចមានលទ្ធភាពព្យាបាលបញ្ហាស្បែកមុខ ​និងស្បែកប្រតិកម្មផងដែរ ​ដោយគ្រាន់តែអនុវត្តវិធីងាយៗតាមបែបធម្មជាតិតែប៉ុណ្ណោះ។  

ដូច្នេះមកមើលទាំងអស់គ្នា ​តើស្លឹកត្របែកអាចជួយបញ្ហាស្បែកអ្វីខ្លះ?  និងអនុវត្តដោយវិធីសាស្រ្តបែបណា៖ 

# គុណសម្បត្តិរបស់ស្លឹកត្របែកសម្រាប់បញ្ហាស្បែកមុខ

១. ជួយបំបាត់បញ្ហាមុខមុន

តាមការស្រាវជ្រាវបានរកឃើញថា ស្លឹកត្របែកអាចមានសមត្ថភាពជួយប្រឆាំងមេរោគ បាក់តេរីដែលបង្កឱ្យកើតមុខមុន ថែមទាំងអាចព្យាបាលមុខមុនឱ្យឆាប់ជាសះស្បើយ និងបញ្ហារលាកសើស្បែកផ្សេងៗផងដែរ។

២. បំបាត់មុខប្រតិកម្ម ហើម ឬឡើងក្រហម

ស្លឹកត្របែក ថែមទាំងអាចទប់ស្កាត់ និងព្យាបាលជំងឺសើស្បែក ដែលមានប្រតិកម្មឡើងក្រហម ហើម កន្ទួលរមាស់ ដោយសារមេរោគបាក់តេរីម្យ៉ាងមានឈ្មោះថា Atopic Dermatitis ផងដែរ។

៣. ការពារ និងបំបាត់ស្នាមជ្រីវជ្រួញ

សារធាតុប្រឆាំងអុកស៊ីតកម្ម និងរ៉ាឌីកាល់សេរី នៅក្នុងស្លឹកត្របែកមិនត្រឹមតែប្រយុទ្ធប្រឆាំងនឹងជំងឺមហារីកប៉ុណ្ណោះទេ តែថែមទាំងអាចការពារ និងលុបបំបាត់ស្នាមជ្រីវជ្រួញលើផ្ទៃមុខថែមទៀតផង។ ពិសេសជាងនេះទៅទៀត ស្លឹកត្របែកក៏អាចជួយឱ្យស្បែកមុខស ស្រស់ថ្លាផងដែរ។

៤. បំបាត់ស្នាមជាំ អុចខ្មៅ និងអាចម៍រុយ

ស្លឹកត្របែក អាចមានលទ្ធភាពជួយធ្វើឱ្យមុខភ្លឺរលោង បំបាត់ចំនុចអុចខ្មៅដោយសារកម្តៅថ្ងៃ ស្នាមជាំ ស្នាមអាចម៍រុយបានផងដែរ។ ម្យ៉ាងទៀតថែមទាំងអាចជួយកាត់បន្ថយអាការរលាកលើស្បែលមុខផ្សេងៗជាច្រើនមុខទៀត។

# វិធីព្យាបាលបញ្ហាស្បែកដោយប្រើស្លឹកត្របែក

វិធីទី១៖

ងាយៗគ្រាន់តែអ្នកយកស្លឹកត្របែកស្រស់ៗ មកបុកឱ្យហ្មត់រួចយកមកលាបឱ្យសព្វផ្ទៃមុខដែលមានបញ្ហា ​ទុកចោលប្រមាណជា ​១៥នាទីចាំលាងទឹកចេញជាការស្រេច។ ​នេះជាវិធីដែលមានប្រសិទ្ធភាពបំផុត សម្រាប់បញ្ហាមុខមុន។ 

វិធីទី២៖

គ្រឿងផ្សំងាយៗរួមមាន៖

- ស្លឹកត្របែកក្រៀម

- ទឹកស្អាត

- ដុំសំលី

ការអនុវត្ត៖

- ជាដំបូងអ្នកគ្រាន់តែយកស្លឹកត្របែកក្រៀមៗ ប៉ុន្មានសន្លឹកល្មមៗ (ស្លឹកត្របែកដែលលាងទឹកស្អាត ហើយហាលឱ្យក្រៀម ប្រមាណជា ៤ ទៅ១០សន្លឹក) យកមកបុកឱ្យរាងហ្មត់បន្តិច  ឬ យកទាំងស្លឹកក្រៀមទាំងមូលក៏បាន

- បន្ទាប់មកអ្នកយកស្លឹកត្របែកនោះ ទៅដាំនៅក្នុងទឹកមួយឆ្នាំងល្មម ឱ្យពុះរហូតដល់ស្លឹកត្របែកប្រែជាពណ៌ក្រហមឬលឿង សឹមបិទភ្លើងទុកចោល ២ ទៅ៣នាទីឱ្យរាងត្រជាក់

- ជាចុងក្រោយយកដុំសំលីផ្តិតយកទឹកស្លឹកត្របែកនេះមកលាបឱ្យសព្វលើផ្ទៃមុខដែលមានបញ្ហា រួចទុកចោលឱ្យបាន ១៥នាទី ចាំលាងចេញជាមួយនឹងទឹកក្តៅឧណ្ហៗជាការស្រេច។ 

នេះជាវិធីសាស្រ្តល្អបំផុតសម្រាប់បញ្ហាស្បែកខ្មៅស្រអាប់ ​ស្នាមមុន ​ជាំ ​អាចម៍រុយ និងបញ្ហាផ្សេងៗដើម្បីប្រែឱ្យផ្ទៃមុខ ​ស ​ស្រស់ថ្លា។

ចំណាំ៖ ដើម្បីបង្កើនប្រសិទ្ធភាព និងធ្វើឱ្យរាល់ជំងឺសើស្បែករបស់អ្នកកាន់តែឆាប់ជាសះស្បើយអ្នកគួរតែអនុវត្តវិធីសាស្រ្តទាំងនេះឱ្យបានយ៉ាងហោចណាស់ ២ ទៅ ៣ ដងក្នុងមួយសប្តាហ៍៕