អាមេរិក៖ ប្រហែលជាមានប្រិយមិត្តមួយចំនួនធំធ្លាប់បានដឹងរួចមកហើយ អំពីភាពល្បីខ្ទរខ្ទាររបស់រឿង Titanic ដែលមានឈុតឆាកបែបស្នេហារ៉ូមែនទិក ហើយនឹងមានលាយលំជាមួយឈុតឆាកសោកនាដកម្មមួយដែលមានមនុស្សស្លាប់ជាច្រើនរយនាក់ ព្រោះតែការលិចកប៉ាល់ Titanic ដែលជាកប៉ាល់មួយដ៏ធំបំផុត។
ទន្ធឹមនឹងការល្បីខ្ទរខ្ទាររបស់ភាពយន្តមួយនេះ វាក៏បានបន្សល់ទុកនូវមន្ទិលសង្ស័យដ៏ធំមួយដល់អ្នកទស្សនា ដោយពួកគេឆ្ងល់ថា ហេតុអ្វីបានជាអ្នកនិពន្ធសាច់រឿងមួយនេះមិនរៀបចំឲ្យបន្ទះក្តារដែលតួអង្គស្រី Rose ជិះ អាចផ្ទុកតួអង្គ Jack មួយទៀត? ហើយហេតុអ្វីបានជាអ្នកនិពន្ធតម្រូវឲ្យ Jack បាត់បង់ជីវិត?
ដើម្បីធ្វើការបកស្រាយនូវមន្ទិលសង្ស័យដែលកើតមានឡើងអស់រយៈពេលជាង ២០ឆ្នាំ មកនេះ ទីបំផុតលោក James Cameron ដែលជាផលិតករនៃខ្សែភាពយន្តដ៏ល្បីល្បាញមួយនេះបានព្រមចូលខ្លួនមកទម្លាយការពិតដោយផ្ទាល់ហើយ។ ក្នុងការឆ្លើយតបទៅនឹងសំនួរដែលបានលើកឡើងថា ហេតុអ្វីបានជាលោកមិនរៀបចំឲ្យបន្ទះក្តារដែល Rose ជិះនោះអាចផ្ទុក Jack បានម្នាក់ទៀត? ហើយហេតុអ្វីបានជាលោកតម្រូវឲ្យ Jack ស្លាប់?
នៅពេលនោះលោកបានលើកឡើងយ៉ាងដូច្នេះថា វាពិតជាមិនមានអ្វីលំបាកសម្រាប់ខ្ញុំក្នុងការឆ្លើយទៅនឹងសំនួរមួយនេះឡើយ។ មូលហេតុដែលបន្ទះក្តារដែល Rose ជិះ មិនអាចផ្ទុក Jack បានព្រោះ នៅក្នុងប៉ារូលរឿងទំព័រទី ១៤៧ គឺតម្រូវឲ្យតួអង្គ Jack ត្រូវតែស្លាប់។
ហើយលោកក៏បានបន្ថែមទៀតថា នៅក្នុងសាច់រឿងមួយនេះវានិយាយអំពីការស្លាប់ និងការបែកបាក់គ្នា ដូច្នេះហើយទើបលោកសម្រេចជ្រើសរើសឲ្យតួអង្គ Jack ត្រូវស្លាប់ ដើម្បីឲ្យអ្នកទស្សនាមានចិត្តដិតដាមស្រលាញ់ និងអាណិតអាសូរចំពោះតួអង្គ Jack ដែលជាអ្នកតាមជួយ Rose អស់ជាច្រើនលើកច្រើនសា។ ម្យ៉ាងវិញទៀត ប្រសិនបើ Jack អាចមានជីវិតរស់បាន នោះសាច់រឿងទាំងមូលនឹងក្លាយទៅជាគ្មានន័យ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]