អេស្ប៉ាញ៖ បន្ទាប់ពីស៊ុតបញ្ចូលទី១គ្រាប់ ក្នុងការប្រកួតដែល Atletico Madrid យកឈ្នះ Roma ២-០ កាលពីម្សិលមិញ ក្នុងក្របខណ្ឌ Champions League ខែ្សប្រយុទ្ធ Antoine Griezmann បានប្ដេជ្ញាថា រូបគេនឹងក្រុមទាំងមូល នឹងព្យាយាមធើ្វយ៉ាងណាតស៊ូឲ្យដល់ទីបំផុត ក្នុងការប្រកួតចុងក្រោយនៃវគ្គចែកពូលសម្រាប់ក្របខណ្ឌកំពូលរបស់អឺរ៉ុបមួយនេះ។
ជ័យជម្នះទៅលើក្រុមខ្លាំងមកពីអីុតាលីនេះ បានធើ្វឲ្យក្រុមដែលមានមូលដ្ឋានក្នុងរដ្ឋធានី Madrid កាន់តែមានទំនុកចិត្ដ ទោះជាដឹងថាឱកាសរបស់ខ្លួន សម្រាប់ឡើងទៅកាន់វគ្គបន្ទាប់មានតិចក៏ដោយ។
Griezmann ខែ្សប្រយុទ្ធជម្រើសជាតិបារាំង បានប្រាប់ដល់អ្នកសារព័ត៌មានថា៖ «ពួកយើងនឹងព្យាយាមឲ្យដល់ទីបញ្ចប់។ វាជារឿងសំខាន់ណាស់ក្នុងការយកឈ្នះ» ។
លើសពីនេះ Griezmann ក៏បាននិយាយអំពីការស៊ុតបញ្ចូលទី ដ៏អស្ចារ្យរបស់ខ្លួនក្នុងការប្រកួតខាងលើផងដែរ ក្រោយពីខកខានស៊ុតអស់ជាច្រើនប្រកួតមក។
«ខ្ញុំសប្បាយចិត្ដដែលអាចស៊ុតបញ្ចូលទី។ ខ្ញុំរីករាយសម្រាប់មិត្ដរួមក្រុមរបស់ខ្ញុំ ហើយនេះគឺជាអ្វីដែលខ្ញុំអាចជួយក្រុមបាន។ ខ្ញុំព្យាយាមលេងឲ្យអស់ពីសមត្ថភាព ប៉ុន្ដែយ៉ាងណា យើងត្រូវតែខិតខំហ្វឹកហាត់ និងព្យាយាមជាបន្ដទៀត» Griezmann និយាយ។
Atletico Madrid ស្ថិតនៅចំណាត់ថ្នាក់លេខ៣ ក្នុងពូល C តាមពីក្រោយ Roma ដែលស្ថិតនៅលេខ២ ចំនួន២ពិន្ទុ ដូច្នេះការប្រកួតចុងក្រោយ នៃវគ្គចែកពូលដែលធើ្វឡើងនៅខែក្រោយនេះ គឺ At.Madrid ត្រូវការឈ្នះជាដាច់ខាត ដើម្បីចាំអ៊ុតមើល Roma (លុះត្រា Roma បរាជ័យ) ទើបអាចឡើងវគ្គបន្ដបាន៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
