ខេត្តកណ្ដាល ៖ យុវជនម្នាក់ត្រូវបាននគរបាលស្រុកខ្សាច់កណ្ដាលចាប់ខ្លួន បន្ទាប់ពីបានហែកជញ្ជាំងផ្ទះ ចូលទៅលួចកាបូបលុយ កាលពីម៉ោង១និង៣០នាទីរំលងអធ្រាត្រថ្ងៃទី១៩ ខែតុលា ឆ្នាំ២០១៧ នៅភូមិកំពុងចម្លង ឃុំកំពុងចម្លង ស្រុកខ្សាច់កណ្ដាល ។
ជនសង្ស័យឈ្មោះសែន ឈីវវៃ អាយុ១៧ ឆ្នាំជនជាតិខ្មែរ មុខរបរកសិករ ។ ចំណែកជនរងគ្រោះឈ្មោះ សែម ចន្ធូ ភេទស្រី អាយុ៣៤ឆ្នាំ ជនជាតិខ្មែរ មុខរបរលក់ដូរ អ្នកទាំងពីររស់នៅ ភូមិ-ឃុំកើតហេតុខាងលើ ។
នគរបាលបានឲ្យដឹងថា មុនពេលកើតហេតុ យប់ថ្ងៃទី១៨ខែនេះ ជនរងគ្រោះបានយកលុយ ចំនួន១៦០០ដុល្លារ និង១លានរៀល ដាក់ក្នុងកាបូបស្ពាយពណ៌ស្វាយដាក់ក្រោមពូក ហើយចូលដេកលក់ធម្មតា ។ លុះដល់វេលាម៉ោង១និង៣០នាទី រំលងអធ្រាត្រថ្ងៃទី១៩ ជនសង្ស័យ លួចចូលផ្ទះតាមជញ្ជាំងខាងក្រោយ រួចឃើញកាបូបលុយជនរងគ្រោះនៅក្រោមពូកក្បាលដំណេកក៏លួចយក ហើយហែកជញ្ជាំងស័ង្កសីខាងមុខរត់ចេញទៅផ្ទះខ្លួន ។
បន្ទាប់មកជនសង្ស័យយកលុយចំនួន១៣៩០ដុល្លារ លាក់ទុកក្នុងបន្ទប់ក្នុងផ្ទះរបស់ខ្លួន និងដាក់តាមខ្លួនចំនួន២១០ដុល្លារ និងប្រាក់រៀលប្រហែល១លានរៀល យកទៅច្រៀងខារ៉ាអូខេ និងទិញទូរស័ព្ទម៉ាក Iphone5 មួយគ្រឿង ។
លុះដល់វេលាម៉ោង១០ព្រឹកថ្ងៃទី១៩ ជនរងគ្រោះបានមកដាក់ពាក្យបណ្តឹង ទើបកម្លាំងប៉ុស្តិ៍សហការជាមួយកម្លាំងផ្នែកនគរបាលយុត្តិធម៌ស្រុក ឃាត់ខ្លួនជនសង្ស័យមកសាកសួរ និងដកហូតវត្ថុតាង បានប្រាក់ចំនួន១៣៩០ដុល្លារ ទូរស័ព្ទម៉ាក Iphone5 មួយគ្រឿង កាបូបស្ពាយពណ៌ស្វាយចំនួន០១ ។ ក្រោយមកអធិការដ្ឋាននគរបាលស្រុក កសាងសំណុំរឿងចាត់ការតាមនីតិវិធីតែម្តង ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
