ទោះកំពុងខ្វះបុគ្គលិក ក៏ក្រុមហ៊ុនផលិតរថយន្ត Tesla នៅតែបណ្តេញបុគ្គលិកចោលអស់រាប់រយនាក់ លែងឲ្យធ្វើការ ព្រោះពួកគេ...

អាមេរិក៖ មិត្តអ្នកអានប្រហែលជាបានដឹងហើយថា ក្រុមហ៊ុនផលិតរថយន្ត Tesla គឺជាសាជីវកម្មពហុជាតិដ៏ធំមួយទូទាំងពិភពលោក ដែលក្រុមហ៊ុននេះមានទីតាំងធំនៅសហរដ្ឋអាមេរិក និងជាដៃគូប្រកួតប្រជែងយ៉ាងធំ ជាមួយក្រុមហ៊ុនផលិតរថយន្តមួយចំនួន។ 

ស្រដៀងទៅនឹងក្រុមហ៊ុនដទៃទៀតដែរ Tesla មានរបាយការណ៍ប្រចាំឆ្នាំផ្ទាល់ខ្លួនមួយ ដែលសង្ខេបជារួមស្តីអំពីចំណូលចំណាយ ឬផលិតភាពរថយន្ត ដែលពួកគេបានសម្រេច​នាពេលកន្លងមក ហើយអ្វីដែលគួរឲ្យចាប់អារម្មណ៍នោះ គឺក្រោយពីពិនិត្យឃើញរបាយការណ៍នៃភាពសកម្ម ឬប្រសិទ្ធភាពរបស់បុគ្គលិកខ្លួនរួច ក្រុមហ៊ុនមួយនេះបានបញ្ឈប់បុគ្គលិកអស់ជាច្រើនរយនាក់ លែងឲ្យមកធ្វើការទាំងខ្លួនកំពុងខ្វះបុគ្គលិកបម្រើការងារ​ក៏ដោយ។

គួរបញ្ជាក់ថាមកទល់ពេលនេះ Tesla មានបុគ្គលិកសរុបប្រមាណ ៣៣,០០០ នាក់ ហើយក្រុមហ៊ុនកំពុងស្ថិតក្នុងដំណើរការផលិតរថយន្តប្រភេទ Tesla Model 3 ដើម្បីបំពេញតម្រូវការអតិថិជនប្រមាណជាង ៤០ម៉ឺននាក់។ 

ទោះជាយ៉ាងណាក៏ដោយ គោលដៅដែលពួកគេកំណត់ថាត្រូវផលិតរថយន្តប្រភេទ Tesla Model 3 ឲ្យបាន ១ ៥០០គ្រឿងក្នុងត្រីមាសទីបី បែរជាបរាជ័យទៅវិញ ពោលគឺ​ផលិតបានត្រឹមតែ ២៦០​គ្រឿងប៉ុណ្ណោះ។ ដោយសារបែបនេះហើយ Tesla គឺកំពុង​ជួបវិបត្តិដ៏ធំមួយ ដែលក្រុមហ៊ុននេះត្រូវការបុគ្គលិកបន្ថែម ដើម្បីបំពេញតម្រូវការផលិត​កម្មរបស់ពួកគេ។

ប្រភពព័ត៌មានបានឲ្យដឹងថា បុគ្គលិកប្រមាណជាង ៤០០នាក់ត្រូវបានក្រុមហ៊ុន Tesla បណ្តេញចេញពីការងារ ស្របពេលកំពុងស្វែងរកបុគ្គលិកបន្ថែមទៀត មកជំនួសកន្លែងអ្នកដែលត្រូវបានបណ្តេញចេញ និងយកមកបំពេញតម្រូវការការងារជាច្រើនផ្សេងទៀតផងដែរ។

ការបណ្តេញបុគ្គលិកចេញយ៉ាងដូច្នេះ គឺមិនមែនមកពីការផលិត Model 3 មិនបានដូចគម្រោងតែប៉ុណ្ណោះទេ ពោលវាក៏ជាប់ទាក់ទងទៅនឹងរថយន្ត Model X SUVs ផងដែរ។ មួយថ្ងៃមុនការបណ្តេញចេញនៃបុគ្គលិកក្រុមហ៊ុន Tesla  គឺមានការជួបប្រទះវិបត្តិដ៏ធំមួយ ដែលរថយន្តប្រភេទ Model X SUVs ប្រមាណ ១១,០០០ គ្រឿងដែលត្រូវបានលក់ចេញរួច បែរជាត្រូវបញ្ជាត្រឡប់យកមកវិញ ព្រោះរថយន្តទាំងអស់នោះត្រូវគេរកឃើញថាមានបញ្ហាបាំងខាងក្រោយ ដែលអាចបង្កឲ្យមានគ្រោះថ្នាក់បានជាយថាហេតុ៕