រាជធានីភ្នំពេញ ៖ ជនជាតិចិន៣នាក់ បើករថយន្តបង្កម៉ាកឡិចស៊ីស RX៣៣០ ក្នុងស្ថានភាពស្រវឹងស្រាក្នុងល្បឿនយ៉ាងលឿនដូចហោះ មកដល់ផ្លូវបែកជាបួនស្ពាននាគវត្តភ្នំ ក៏ជ្រុលទៅបុកម៉ូតូ PCX បណ្ដាលឲ្យដួលរងរបួសស្រាលខូចខាតម៉ូតូបន្តិចបន្តួច ។
ហេតុការណ៍នេះ បានកើតឡើងកាលពីវេលាម៉ោង០១នឹង១០នាទីរំលងអធ្រាត្រ ឈានចូលថ្ងៃទី០២ ខែតុលា ឆ្នាំ២០១៧ តាមបណ្តោយផ្លូវ១០៦កែងផ្លូវព្រះនរោត្តម នៅចំណុចស្ពាននាគ ស្ថិតនៅសង្កាត់វត្តភ្នំ ខណ្ឌដូនពេញ ។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុ គេបានឃើញរថយន្តមួយគ្រឿងម៉ាកឡិចស៊ីស RX៣៣០ ពណ៌ស្ករ ពាក់ស្លាកលេខ ភ្នំពេញ ២N-៣៩៨៨ បើកបរដោយជនជាតិចិន៣នាក់ ក្នុងស្ថានភាពស្រវឹង ធ្វើដំណើរតាមបណ្តោយផ្លូវ១០៦ ក្នុងទិសដៅពីកើតទៅលិច បើកក្នុងល្បឿនយ៉ាងលឿនដូចហោះ ខណៈពេលបើកមកដល់ចំណុចកើតហេតុខាងលើ ផ្លូវបែកជាបួន រថយន្តបង្កមិនបានបន្ថយល្បឿននោះទេ ស្របពេលនោះដែរ មានបុរសម្នាក់ជិះម៉ូតូម៉ាក PCX ពណ៌ស ពាក់ស្លាកលេខ ភ្នំពេញ ១GC-១៣២៦ ធ្វើដំណើរមកតាមបណ្តោយផ្លូវព្រះនរោត្តម ក្នុងទិសដៅពីត្បូងទៅជើង ត្រូវរថយន្តបុកប៉ះចំក្បាលម៉ូតូផ្នែកខាងមុខចំហៀងខាងស្តាំ បណ្តាលឲ្យដួលម៉ូតូ សំណាងល្អមិនមានរងរបួសធ្ងន់ធ្ងរអីនោះឡើយ ។
ភ្លាមៗនោះដែរ រថយន្តបង្កមិនបានឈប់នៅដោះស្រាយជាមួយជនរងគ្រោះនោះទេ ព្យាយាមបើករត់គេចខ្លួន សំណាងល្អមានកម្លាំងសមត្ថកិច្ចគាត់កំពុងតែល្បាត ក៏អន្តរាគមន៍ដេញឃាត់បាននៅផ្លូវព្រះស៊ីសុវត្ថិមុខផ្សាររាត្រី ។
ក្រោយពេលកើតហេតុ ជនរងគ្រោះខឹងថា រថយន្តបង្ករត់បានទាមទារសំណងចំនួន៧០០ដុល្លារ ដោយមានការសម្របសម្រួលពីសមត្ថកិច្ច ក៏សម្រួលគ្នានៅត្រឹមតែ១៥០ដុល្លារ បញ្ចប់រឿងនៅនឹងកន្លែងកើតហេតុ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
