បារាំង៖ បញ្ហាជម្លោះរវាង Edinson Cavani និងមិត្ដរួមក្រុម Neymar នៃក្រុម Paris Saint-Germain រឹតតែបន្ដកើនឡើងហើយ ក្រោយពីខែ្សប្រយុទ្ធជម្រើសជាតិអ៊ុយរ៉ាហ្គាយនេះ បានបដិសេធសំណើររបស់ក្លិប ១លានអឺរ៉ូ ជាថ្នូរដើម្បីប្រគល់សិទ្ធិស៊ុតបាល់ប៉េណាល់ទីឲ្យ Neymar។ នេះបើតាមសេចក្ដីរាយការណ៍មួយចេញពីប្រទេសអេស្ប៉ាញ។
សារព័ត៌មានអេស្ប៉ាញ El Pais បានអះអាងថា Cavani ត្រូវបានក្លិបផ្ដល់ទឹកប្រាក់ដើម្បីជាការលើកទឹកចិត្ដដល់រូបគេក្នុងការរកគ្រាប់បាល់ជាច្រើនដល់ក្រុម ជាពិសេស ជាងនេះទៅទៀតនោះ គឺដើម្បីឲ្យអតីតខែ្សប្រយុទ្ធរបស់ក្រុម Napoli នេះ ធើ្វការផ្លាស់ប្ដូរតួនាទីជាអ្នកស៊ុតបាល់ប៉េណាល់ទី ទៅឲ្យមិត្ដរួមក្រុម Neymar វិញ។
ប្រធានក្លិប PSG លោក Nasser Al-Khelaifi បានចំណាយពេលកាលពីសប្ដាហ៍មុន ដើម្បីធើ្វការចរចាជាមួយ Cavani និងអ្នកតំណាងរបស់គេ ទាក់ទងទៅនឹងបញ្ហាខាងលើដែលបានកើតឡើងកាលពីសប្ដាហ៍មុន ក្នុងការប្រកួតដែល PSG យកឈ្នះក្រុមម្ចាស់ផ្ទះ Lyon ដោយលទ្ធផល ២-០។
គួរបញ្ជាក់ឡើងវិញថា Neymar និង Cavani ត្រូវបានគេឃើញថាមានការប្រកែកគ្នាជុំវិញការទាត់បាល់ពិន័យហ្រ្វីឃីក និងបាល់ពិន័យប៉េណាល់ទី រហូតដល់ថ្នាក់ពេលចប់ការប្រកួតកាលពីសប្ដាហ៍មុន ក្រុមការងាររបស់ក្លិបបានបំបែកអ្នកទាំង២ ឲ្យនៅផ្សេងគ្នាក្នុងបន្ទប់ផ្លាស់សម្លៀកបំពាក់ផងដែរ ខណៈប៉ុន្មានថៃ្ងមុននេះ ក៏មានសារព័ត៌មានក្នុងប្រទេសបារាំង បានចុះផ្សាយថា Neymar បានធើ្វការសុំទោសដល់ Cavani ដើម្បីបញ្ចប់បញ្ហានេះ៕
ប្រភព៖ Dailymail
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
