ខេត្តសៀមរាប ៖ បងស្រី ឌឿ សុផល ជាប្រជាពលរដ្ឋមានទីលំនៅ ភូមិអូរតាប្រាក់ ស្រុកពួក ខេត្តសៀមរាប ដែលជាជនពិការភ្នែកទាំងពីរ និងមានកូន២នាក់នៅក្នុងបន្ទុក ក្នុងការជួបសំណេះសំណាលជាមួយអ្នកសារព័ត៌មាន ក្នុងឱកាសធ្វើពិធីប្រគល់រង្វាន់លើកទឹកចិត្តដល់សិស្សានុសិស្សប្រឡងជាប់សញ្ញាប័ត្រមធ្យមសិក្សាទុតិយភូមិឆ្នាំសិក្សា ២០១៦-២០១៧ ក្រោមអធិបតីភាពរបស់ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិ ចុះជួយខេត្តសៀមរាប កាលពីព្រឹកថ្ងៃអាទិត្យ ទី១៧ ខែកញ្ញា ឆ្នាំ២០១៧ នៅរដ្ឋបាលសាលាខេត្តសៀមរាប ។
បងស្រីក៏បានរៀបរាប់បញ្ជាក់ឱ្យដឹងផងដែរថា បងស្រីជាជនពិការភ្នែកទាំងសងខាង ហើយក្នុងជីវភាពក្រុមគ្រួសារមានការជួបលំបាកទៀតផង ដោយបងស្រីនៅផ្ទះបានលក់ដូរបន្តិចបន្ទូច ដើម្បីផ្គត់ផ្គង់ជីវភាពក្នុងក្រុមគ្រួសារ ។ កត្តាសំខាន់បងស្រីបានខិតខំផ្គត់ផ្គង់ដល់កូនៗឱ្យបានសិក្សារៀនសូត្រ ទទួលបាននូវចំណេះដឹង ក្នុងការកសាងអនាគតរបស់ពួកគេ ។ ម្យ៉ាងទៀត ទោះបីបងស្រីជាជនពិការភ្នែកមែនពិត តែគាត់បានពុះពារគ្រប់ឧបសគ្គ ដោយទឹកចិត្តស្រឡាញ់នូវការសិក្សារបស់កូនៗ បងស្រីបានធ្វើការអប់រំផ្តល់ដំបូន្មានដល់កូនៗ ឱ្យខិតខំសិក្សារៀនសូត្រ ពីព្រោះថាចំណេះវិជ្ជានេះហើយ ដែលជាស្ពានចម្លងឱ្យយើងរួចផុតពីភាពក្រីក្រ ភាពល្ងង់ខ្លៅ រហូតដល់កូនស្រី របស់គាត់បានប្រឡងជាប់សញ្ញាប័ត្រមធ្យមសិក្សាទុតិយភូមិ ឆ្នាំសិក្សា ២០១៦-២០១៧ ហើយទទួលបាននិទ្ទេស A ដែលឱ្យគាត់មិនអស់សង្ឃឹមចំពោះកូនរបស់គាត់ឡើយ ដែលជាធនធានមនុស្សមួយដ៏សំខាន់នៅក្នុងជីវិតរបស់គាត់ ក៏ដូចសង្គមជាតិទាំងមូលផងដែរ ។
តាមការបញ្ជាក់របស់ក្មួយស្រី ឌឿ ពិសី អាយុ១៨ឆ្នាំ រៀននៅថ្នាក់ទី១២B នៃវិទ្យាល័យពួក ស្រុកពួក ខេត្តសៀមរាប បានរៀបរាប់ឱ្យដឹងថា ទោះបីម្តាយរបស់ខ្លួនពិការភ្នែកក៏ពិតមែន តែគាត់ក៏មានឆន្ទះខ្ពស់ក្នុងការជំរុញដល់កូនៗគាត់ ឱ្យបានសិក្សារៀនសូត្រ ចាប់តាំងពីថ្នាក់បឋមរហូតដល់វិទ្យាល័យ ក៏អ្នកម្តាយរបស់នាងខ្ញុំ មិនដែលមានការត្អូញ ត្អែរឡើយ គឺគាត់ធ្វើយ៉ាងណាឱ្យកូនៗមានចំណេះដឹងខ្ពង់ខ្ពស់ ទោះបីគាត់ឈឺក្តៅរងាយ៉ាងណាក៏ដោយ ។
ក្មួយស្រីបានរៀបរាប់បន្តទៀតថា ដោយកត្តាទាំងនេះហើយ ដែលបានជំរុញឱ្យខ្លួននាងខ្ញុំត្រូវខិតខំសិក្សារៀនសូត្រទាំងនៅសាលា និងនៅផ្ទះ ដោយមិនទុកពេលវេលាឱ្យឥតប្រយោជន៍ឡើយ ។ ម្យ៉ាងទៀតក្រៅពីការងារសិក្សា ក្មួយស្រីក៏បានយកចិត្តទុកដាក់ជួយដល់ការងារផ្ទះជំនួសអ្នកម្តាយខ្លួនទៀតផង ។ ក្មួយស្រីក៏បានរៀបរាប់បន្ថែមទៀតថា លទ្ធផលដែលក្មួយទទួលបាននិទ្ទេស A នាពេលនេះ ក៏ជាញើសឈាមរបស់អ្នកម្តាយ លោកគ្រូ អ្នកគ្រូ ដែលបានខិតខំបង្ហាត់បង្រៀនប្រៀនប្រដៅដល់ខ្លួននាង ព្រមទាំងការខិតខំយកចិត្តទុកដាក់សិក្សារបស់នាងបន្ថែមទៀតផងដែរ ។
ក្នុងនោះដែរក្មួយស្រី ឌឿ ពិសី ក៏បានធ្វើការថ្លែងអំណរគុណចំពោះ លោកគ្រូ អ្នកគ្រូដែលជាគ្រូបាអាចារ្យ បានបង្ហាត់បង្រៀនដល់នាង សំខាន់ចំពោះទឹកចិត្តអ្នកម្តាយ ដែលបានទូន្មានកូន ក៏ដូចជាអាជ្ញាធរដែនដី ជាពិសេសប្រមុខរាជរដ្ឋាភិបាល ដែលមាន សម្តេចតេជោ ហ៊ុនសែន នាយករដ្ឋមន្ត្រី ដែលជាបីតាសន្តិភាពនូវកម្ពុជា បានធ្វើឱ្យយើងគ្រប់គ្នារស់នៅក្រោមដំបូលសន្តិភាពពេញលេញ ទើបយើងបានទទួលសាលារៀន សិក្សារៀនសូត្រមកដល់ពេលនេះ ហើយទទួលបាននិទ្ទេស A ទៀតផង ។
ម្យ៉ាងទៀតក៏ធ្វើការថ្លែងអំណរគុណចំពោះ សម្តេចពិជ័យសេនា ទៀ បាញ់ និងលោក ឃឹម ប៊ុនសុង រួមទាំងបងប្អូនសប្បុរសជនដែលបានផ្តល់រង្វាន់លើកទឹកចិត្ត ដល់សិស្សជាប់និទេ្ទស A នាពេលនេះ ។ ក្នុងនោះក្មួយស្រីក៏បានធ្វើការប្តេជ្ញាចិត្ត និងខិតខំបន្តការសិក្សាប្ថែមទៀតនៅពេលដែលមានសប្បុរសជនបានផ្តល់ជាអាហារូបករណ៍ ពីព្រោះថាក្រុមគ្រួសាររបស់ក្មួយ ពុំមានលទ្ធភាពឱ្យបានបន្តការសិក្សានៅសាកលវិទ្យាល័យបានឡើយ ។ ដូច្នេះហើយក្មួយក៏បាន ធ្វើការអំពាវនាវដល់បណ្តាសាកលវិទ្យាល័យក្នុងខេត្ត ដែលមានចិត្តសប្បុរសក្នុងការផ្តល់អាហារូបករណ៍ ដើម្បីឱ្យក្មួយស្រីបានបន្តការសិក្សាបន្ថែមទៀតដោយក្មួយស្រីនៅតែមានចិត្តស្រឡាញ់ការសិក្សា ក្នុងការកសាងអនាគតខ្លួន ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
