ខេត្តបាត់ដំបង ៖ គ្រូពេទ្យនៃមន្ទីរពហុព្យាបាលសុវណ្ណ ដែលមានទីតាំងនៅក្នុងសង្កាត់ស្វាយប៉ោ ក្រុងបាត់ដំបង រងការចោទប្រកាន់ថា បានធ្វើឲ្យស្ត្រីមានផ្ទៃពោះគ្រប់ខែឆ្លងទន្លេម្នាក់ស្លាប់ទាំងម្ដាយ ទាំងកូន បន្ទាប់ពីស្វាមីស្ត្រីរូបនេះបញ្ជួនមកឲ្យគ្រួពេទ្យនេះពិនិត្យផ្ទៃពោះ នៅវេលាម៉ោង៨និង៣០នាទីព្រឹក ថ្ងៃទី១៦ ខែកញ្ញា ឆ្នាំ២០១៧ ហើយបានស្លាប់នៅវេលាម៉ោង៦ល្ងាចថ្ងៃដដែល ក្រោយពីគ្រូពេទ្យចាក់ថ្នាំ និងព្យួរសេរ៉ូម ដែលគេសង្ស័យថា អាចបណ្ដាលមកពីប្រតិកម្មថ្នាំ។
លោកឧត្តមសេនីយត្រី ជេត វណ្ណនី ស្នងការរងខេត្តមានប្រសាសន៍ថា ពិតជាមានរឿងនេះកើតឡើងមែន ហើយលោកស្នងការខេត្តបានបញ្ជាភ្លាមៗឲ្យមន្ត្រីនៃការិយាល័យជំនាញចុះកាន់មន្ទីរពហុព្យាបាលសុវណ្ណ ដើម្បីពិនិត្យសព។ ប៉ុន្តែត្រូវបានរថយន្តសាមុយនៃមន្ទីរពេទ្យឯកជននេះ ដឹកសពស្ត្រីរងគ្រោះប្រគល់ឲ្យក្រុមគ្រួសារផុតទៅហើយ។ ករណីនេះបានផ្ទុះខ្លាំងរហូតឈានដល់ការឃាត់រថយន្តពេទ្យមិនឲ្យចាកចេញពីផ្ទះស្ត្រីរងគ្រោះទៀតផង នៅពេលរថយន្តនេះដឹកសពទៅប្រគល់ឲ្យក្រុមគ្រួសារ។ លោកបានបន្ថែមថា ដោយសារតែមានការប្រឈមជាមួយអ្នកភូមិបែបនេះ ទើបលោកស្នងការខេត្តបញ្ជាឲ្យកម្លាំងជំនាញចុះទៅអន្តរាគមន៍ផ្ទាល់ដល់ផ្ទះស្ត្រីរងគ្រោះទាំងយប់ និងពិនិត្យសពស្ត្រីរងគ្រោះទៀតផង។ ពេលនេះមន្ត្រីជំនាញកំពុងសួរនាំ និងធ្វើការស្រាវជ្រាវអំពីមូលហេតុនៃការស្លាប់ស្ត្រី និងកូនក្នុងផ្ទៃនេះហើយ។
បើតាមរបាយការណ៍របស់មន្ត្រីមូលដ្ឋានឲ្យដឹងថា ស្ត្រីរងគ្រោះឈ្មោះអ៊ំ សោភ័ណ្ឌ អាយុ៤២ឆ្នាំ មានស្វាមីវ័យក្មេងឈ្មោះទង អេលីយ៉ា អាយុ២២ឆ្នាំ ជាកសិករ រស់នៅភូមិអូរតាញា ឃុំតាគ្រាម ស្រុកបាណន់។ ស្វាមីស្ត្រីរងគ្រោះបានបំភ្លឺប្រាប់សមត្ថកិច្ចថា នៅព្រឹកថ្ងៃទី១៦ កញ្ញា ខ្លួនបាននាំប្រពន្ធទៅពិនិត្យផ្ទៃពោះនៅ «មន្ទីរពហុព្យាបាលសុវណ្ណ» ហើយគ្រូពេទ្យប្រាប់ថា ប្រពន្ធខ្លួនអាចនឹងកើតនៅល្ងាច ឬយប់នេះ (ថ្ងៃទី១៦ កញ្ញា)។ តាមពិតខ្លួនធ្លាប់នាំប្រពន្ធទៅពិនិត្យម្ដងហើយនៅមន្ទីរពេទ្យខេត្ត ហើយពេទ្យថា នឹងគ្រប់ខែនៅថ្ងៃទី១២ កញ្ញា តែលើស៤ថ្ងៃហើយមិនឃើញកើត ទើបខ្លួននាំប្រពន្ធទៅពិនិត្យនៅមន្ទីរពេទ្យឯកជនខាងលើក៏ជួបគ្រោះថ្នាក់តែម្ដង។
ប្ដីស្ត្រីរងគ្រោះប្រាប់សមត្ថកិច្ចទៀតថា នៅថ្ងៃកើតហេតុនោះក្រោយពីពិនិត្យរួច គ្រូពេទ្យបានឲ្យថ្នាំប្រពន្ធខ្លួនលេប លុះនៅរសៀលថ្ងៃដដែលប្រពន្ធខ្លួនបែកទឹកភ្លោះ និងចុកពោះ។ ពេលនោះពេទ្យបានដាក់សេរ៉ូម និងចាក់ថ្នាំនៅលើភ្លៅទៀត ហើយខ្លួនសួរនាំពីការចាក់ថ្នាំនោះ តែគ្រូពេទ្យថា ជាថ្នាំបំបាត់ការឈឺចាប់។ គ្រាហ៍នោះប្រពន្ធខ្លួនឈឺកាន់តែខ្លាំង។ ខ្លួនភ័យក៏ដើរទៅហៅគ្រូពេទ្យមកមើលទៀត លុះគ្រូពេទ្យមកដល់ ស្រាប់តែប្រាប់ថា ត្រូវដូរបន្ទប់ ព្រោះបន្ទប់នេះគ្មានឧបករណ៍គ្រប់គ្រាន់។ ពេលនោះប្រពន្ធខ្លួនវិលមុខ ឈឺពោះ និងខ្សោយកាន់តែខ្លាំង ហើយពេទ្យបានដាក់អ៊ុកស៊ីហ្សែន ចាក់ថ្នាំតាមខ្សែសេរ៉ូម និងបាញ់ថ្នាំម្យ៉ាងចូលមាត់ទៀត តែស្របពេលនោះខ្លួនឃើញមានឈាមហូរចេញតាមមាត់ទៅហើយ ប៉ុន្តែអ្វីដែលធ្វើឲ្យខ្លួនមានការភ្ញាក់ផ្អើលនោះ គឺនៅពេលគ្រូពេទ្យប្រាប់ឲ្យខ្លួនទៅបំពេញឯកសារដើម្បីវះកាត់ ដែលខ្លួនមិននឹកស្មានដល់។ គ្រូពេទ្យក៏បញ្ជូនប្រពន្ធខ្លួនទៅកាន់បន្ទប់វះកាត់ភ្លាមៗដែរ។ ពេលដល់បន្ទប់វះកាត់ពេទ្យមិនទាន់ធ្វើការវះកាត់ទេ គ្រាន់តែព្យួរសេរ៉ូមទុកប្រពន្ធខ្លួនចោលក្នុងបន្ទប់។ ប៉ុន្តែប្រមាណ៣នាទីក្រោយ គ្រូពេទ្យហៅខ្លួនទៅក្នុងបន្ទប់វះកាត់ ស្រាប់តែឃើញប្រពន្ធខ្លួនបែកពពុះមាត់ និងហូរឈាមតាមមាត់លែងដឹងខ្លួនទៅហើយ។ គ្រាហ៍នោះគ្រូពេទ្យប្រាប់ថា «គាត់ធ្ងន់ហើយ បើអាចជួយបានពេទ្យនឹងជួយ តែបើជួយមិនបានមានតែកាត់ចិត្តទៅ និងដឹកសពយកទៅផ្ទះតែប៉ុណ្ណោះ» ហើយប្រពន្ធខ្លួនក៏ដាច់ខ្យល់ស្លាប់ភ្លាមៗយ៉ាងរន្ធត់បំផុត។ ស្ថិតក្នុងស្ថានភាពដ៏រន្ធត់នេះ ក៏សង្ស័យថា ការស្លាប់របស់ប្រពន្ធខ្លួននេះ អាចបណ្ដាលមកពីការប្រតិកម្មថ្នាំ និងការយឺតយ៉ាវរបស់គ្រូពេទ្យ រួមផ្សំនឹងការធ្វេសប្រហែសផង ព្រោះប្រពន្ធខ្លួនមិនមានបញ្ហាអ្វីទេ ពេលនាំមកពីផ្ទះ គឺគ្រាន់តែនាំមកឲ្យគ្រូពេទ្យជួយពិនិត្យផ្ទៃពោះតែប៉ុណ្ណោះ ដែលលើស៤ថ្ងៃហើយមិនទាន់កើត តែបែរជាចាក់ថ្នាំ ឲ្យលេបថ្នាំ និងដាក់សេរ៉ូមរហូតធ្វើឲ្យប្រពន្ធខ្លួនស្លាប់ទាំងកូនក្នុងផ្ទៃតែម្ដង។
ជុំវិញការចោទប្រកាន់នេះ កោះសន្តិភាពបានព្យាយាមសុំការបំភ្លឺតាមទូរស័ព្ទពីលោកគ្រូពេទ្យ ប៊ុន សុវណ្ណ ដែលជាអ្នកគ្រប់គ្រងមន្ទីរពហុព្យាបាលសុវណ្ណខាងលើនេះ តែត្រូវបានអ្នកផ្សេងលើកទូរស័ព្ទនេះ ហើយនិយាយថា ខ្លួនជាបុគ្គលិក មិនអាចបំភ្លឺបានឡើយ។
បើតាមប្រភពនានាបានបង្ហើបឲ្យដឹងថា នៅពេលស្ត្រីរងគ្រោះស្លាប់ ខាងមន្ទីរពេទ្យឯកជននេះបានបញ្ជូនសពចេញភ្លាមៗយ៉ាងតក់ក្រហលបំផុត ទៅកាន់លំនៅឋានជនរងគ្រោះតាមរយៈរថយន្តសាមុយរបស់មន្ទីរពេទ្យនេះ។ ពេលបញ្ជូនសពស្ត្រីដល់ផ្ទះ ស្រាប់តែសាច់ញាតិ និងអ្នកភូមិផ្ទុះប្រតិកម្មយ៉ាងខ្លាំង រារាំងមិនឲ្យរថយន្តសាមុយ និងអ្នកបើកបរចាកចេញពីផ្ទះជនរងគ្រោះឡើយ រហូតទាល់តែមានអន្តរាគមន៍ពីសមត្ថកិច្ច ទើបស្ថានភាពបានធូរស្រាលវិញ។
លោកឧត្តមសេនីយត្រី ជេត វណ្ណនី ស្នងការរងខេត្តបានថ្លែងជុំវិញករណីនេះថា បន្ទាប់ពីផ្ទុះនូវរឿងមិនប្រក្រតីនៃមន្ទីរពេទ្យឯកជននេះ លោកស្នងការខេត្តបានបញ្ជាភ្លាមៗឲ្យមន្ត្រីការិយាល័យជំនាញ ចុះពិនិត្យសពទាំងយប់ដល់លំនៅឋានជនរងគ្រោះ។ ការិយាល័យជំនាញបានទទួលបណ្ដឹងពីក្រុមគ្រួសារជនរងគ្រោះរួចហើយ រីឯការធ្វើកោសល្យវិច័យលើសពជនរងគ្រោះក៏រួចរាល់ហើយដែរ។ លោកបានបញ្ជាក់បន្ថែមថា យើងកំពុងសួរនាំសាក្សីមួយចំនួន និងកំពុងរៀបចំចេញដីកាកោះអញ្ញើញក្រុមគ្រូពេទ្យ និងម្ចាស់គ្លីនិកឯកជនមួយនេះឲ្យចូលមកបំភ្លឺតាមនីតិវិធីច្បាប់ហើយ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
