ខេត្តកំពត ៖ បុរសម្នាក់ប្រឡែងលេងជាមួយក្មួយប្រុសអាយុ៣ឆ្នាំ ដោយម្តាយឪពុកក្មេងប្រុសត្រូវជាប្អូនរបស់ប្រពន្ធបុរសនោះទៅធ្វើការនៅថៃទុកកូនឲ្យបុរសនោះ និងប្រពន្ធជួយមើល ខណៈពេលប្រឡែងលេងជាមួយក្មួយក៏ជ្រុលជើងឈូសចំចុងឆ្អឹងជំនីមួយជើង ស្រាប់តែក្មួយប្រុសសន្លប់បាត់ ក្រោយមកក៏ស្លាប់ ហេតុការណ៍នេះកើតឡើងកាលពីថ្ងៃទី៣០ សីហា ឆ្នាំ២០១៧ ចន្លោះម៉ោង៨ទៅម៉ោង១០ព្រឹក ស្ថិតក្នុងភូមិត្រពាំងថ្ងាន់ ឃុំប្រភ្នំ ស្រុកអង្គរជ័យ ខេត្តកំពត។
លោកវរសេនីយទោ ឈឹម ឈាង បានឲ្យដឹងថា ជនបង្កឈ្មោះ ត្រក រ៉ា ភេទប្រុស អាយុ៣៤ឆ្នាំ ត្រូវជាឪពុកធំរបស់កុមាររងគ្រោះ។ នៅពេលប្រឡែងជ្រុលជើង បណ្តាលឲ្យកុមាររងគ្រោះស្លាប់ ក្រោយមកឪពុកធំរូបនេះក៏រត់គេចខ្លួនបាត់តាំងពីថ្ងៃកើតហេតុម្ល៉េះ។ អស់ពេលជិតមួយខែ ការិយាល័យព្រហ្មទណ្ឌកំរិតធ្ងន់ដឹកនាំកម្លាំងសហការពីកម្លាំងស្នងការដ្ឋាននគរបាលខេត្តព្រះវិហារផងនោះ ទើបនៅថ្ងៃទី១៥ កញ្ញានេះ តាមចាប់ខ្លួនជនបង្កហិង្សានោះបញ្ជូនមកកាន់ស្នងការដ្ឋានខេត្តកំពតវិញ ដើម្បីធ្វើការសាកសួរ។
បើចម្លើយជនសង្ស័យសារភាពថា ខ្លួនពិតជាបានប្រើហិង្សាទៅលើក្មេងប្រុសឈ្មោះ ថេត សវរល័ក្ខ ហៅទិច អាយុ៣ឆ្នាំ បណ្តាលឲ្យស្លាប់ពិតប្រាកដកមែន។ ដោយខ្លួនប្រឡែងលេងជាមួយក្មួយ ហើយក៏ជ្រុលឈូសមួយជើងត្រូវត្រង់ឆ្អឹងជំនីផុតខាងឆ្វេង បណ្តាលឲ្យវាដួល ហើយវាស្រែកថា «អ៊ំអើយចុកណាស់ៗ» មួយសន្ទុះក៏សន្លប់បាត់។ ភ្លាមៗនោះខ្លួនក៏លើកវាឡើងទៅផ្ទះដាក់លើគ្រែ រួចច្របាច់ដៃជើង និងដងខ្លួនឲ្យវាតែនៅមិនដឹងខ្លួន ទើបខ្លួនដឹងថា វាស្លាប់ហើយ ខ្លួនក៏ចុះមកដីវិញ រួចរត់ទៅយកម៉ូតូម៉ាកសេ១២៥ ស៊េរីឆ្នាំ២០១៤ ពីប្រពន្ធជិះគេចខ្លួនទៅខេត្តតាកែវតែម្តង ។ ពេលទៅដល់ខេត្តតាកែវ មើលទៅសភាពមិនស្រួល ម្យ៉ាងខេត្តនេះមានព្រំប្រទល់ និងក្បែរកន្លែងកើតហេតុផង ក៏យកម៉ូតូនោះទៅបញ្ចាំបានលុយ១០ម៉ឺនរៀល រួចបន្តរត់ទៅកាន់ខេត្តព្រះវិហារ ស្រាប់តែថ្ងៃទី១៥នេះ ក៏ត្រូវសមត្ថកិច្ចចាប់ខ្លួន ហើយបញ្ជូនមកកាន់ខេត្តកំពតវិញតែម្តង។
លោករវសេនីទោឲ្យដឹងទៀតថា ជនសង្ស័យខាងលើត្រូវបានកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធី៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]