រាជធានីភ្នំពេញ ៖ ស្ត្រីមានផ្ទៃពោះជិតគ្រប់ខែទៅហើយនោះ ដោយសារតែភាពឆោតល្ងង់លនិងការខ្វះមុខ ខ្វះក្រោយ ពិសេសក្នុងរដូវបុណ្យភ្ជុំបិណ្ឌផងនេះ ដាច់ចិត្តធ្វើអំពើលួចលុយរបស់មិត្តភក្តិខ្លួន ដែលជាកម្មការីរោងចក្រដូចគ្នា ។ សំណាងល្អ មានអ្នកជួយអន្តរាគមន៍ សុំឱ្យដោះលែងស្ត្រីរូបនេះវិញ ព្រោះតែការអាណិត ។
ហេតុការណ៍នេះ បានកើតមានឡើង នៅចំណុចផ្ទះជួលតាមផ្លូវបេតុង ក្រុមទី១៧ ភូមិប្ញស្សី សង្កាត់ស្ទឹងមានជ័យ២ ខណ្ឌមានជ័យ កាលពីវេលាម៉ោង០២ និង៣០នាទីរសៀលថ្ងៃទី១៥ កញ្ញា។
ស្ត្រីដែលរពិសដៃមិនបានគិតវែងឆ្ងាយនេះ ឈ្មោះគីម ហ័ង អាយុ២៣ឆ្នាំ ជាកម្មការិនីរោងចក្រ មានទីលំនៅផ្ទះជួលក្នុងភូមិត្នោតជ្រុំ៤ សង្កាត់បឹងទំពុន២ ខណ្ឌមានជ័យ ។ ដោយឡែក ស្ត្រីម្ចាស់លុយ និងជាមិត្តភក្តិស្ត្រីសង្ស័យ ឈ្មោះប៊ិន យ៉េង អាយុ៣៧ឆ្នាំ ស្នាក់នៅទីតាំងកើតហេតុ ទាំង២នាក់ជាកម្មការិនីរោងចក្រជាមួយគ្នា ដោយស្ត្រីសង្ស័យឧស្សាហ៍ចេញ-ចូលមកលេងផ្ទះស្ត្រីរងគ្រោះជាញឹកញាប់ណាស់ ។
តាមប្រភពថា ដំបូងឡើយ ស្ត្រីរពិសដៃខាងលើ បានមកលេងផ្ទះស្ត្រីរងគ្រោះតាំងពីម៉ោង៧ព្រឹក ដោយជិះម៉ូតូឌុបមកលេង ។ លុះដល់វេលាម៉ោង០២រសៀល ស្ត្រីរងគ្រោះបានយកទូរស័ព្ទរបស់ខ្លួន ដែលខូចយកទៅឱ្យជាងទូរស័ព្ទជួសជុល ដោយមុនពេលចាកចេញពីផ្ទះ ស្ត្រីរងគ្រោះមានការផ្តាំផ្ញើស្ត្រីជាជនសង្ស័យឱ្យជួយមើលផ្ទះសម្បែងផង និងប្រាប់ជួយមើលលុយរបស់ខ្លួនផងចំនួន៤០០ដុល្លារ គឺទុកនៅលើទូរទស្សន៍ ។ ប្រភពព័ត៌មានបន្តថា លុះស្ត្រីរងគ្រោះត្រឡប់មកពីធ្វើទូរស័ព្ទវិញ បានដើរទៅមើលលុយដែលទុកនៅលើទូរទស្សន៍ ស្រាប់តែពុំឃើញ ហើយក៏បានសួរទៅស្ត្រីសង្ស័យថា មានឃើញលុយរបស់ខ្លួនទេ?
ភ្លាមនោះ ស្ត្រីសង្ស័យបានបដិសេធថា ខ្លួនពុំបានដឹងនោះទេ ប៉ុន្តែមុនពេលជនរងគ្រោះ ចេញទៅបន្តិច ខ្លួនបានទៅតាមក្រោយ ដើម្បីទិញទឹកសុទ្ធហូប លុះពេលត្រឡប់មកវិញ ស្រាប់តែឃើញបុរសម្នាក់ជិះម៉ូតូមកឈប់នៅមុខផ្ទះកើតហេតុ ហើយដើរចូលទៅក្នុងផ្ទះ រួចដើរចេញមកវិញ ហើយជិះទៅបាត់តែម្តងទៅ ។ ប៉ុន្តែចម្លើយរបស់ស្ត្រីសង្ស័យ ធ្វើឱ្យស្ត្រីរងគ្រោះមិនជឿ និងមិនអស់ចិត្តឡើយ ។
ក្រោយការសាកសួរនាំតាំងពីរសៀល ដល់ក្បាលល្ងាចរួចមក ជនសង្ស័យនៅតែប្រកាន់គោលជំហថា ខ្លួនមិនបានលួចលុយដែលបាត់នោះទេ ជាហេតុធ្វើឱ្យជនរងគ្រោះ សម្រេចនាំជនសង្ស័យទៅកាន់ប៉ុស្តិ៍រដ្ឋបាលនគរបាលស្ទឹងមានជ័យ ដើម្បីសុំឱ្យសមត្ថកិច្ចជួយអន្តរាគមន៍សាកសួរនាំដេញដោល ។ ក្រោយការសាកសួរនាំយ៉ាង ល្អិតល្អន់របស់នគរបាលនោះ ទើបស្ត្រីសង្ស័យព្រមសារភាពថា ខ្លួនបានយកលុយនោះប្រាកដមែន ដោយបានយកលេខទូរស័ព្ទមិនដំណើរការមួយខ្សែ វេរតាមរយៈគណនេយ្យ វីង ចូលទៅកាន់លេខទូរស័ព្ទរបស់ខ្លួន ។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
