ខេត្តពោធិ៍សាត់ ៖ បុរសម្នាក់បានត្រូវក្រុមជនមិនស្គាល់មុខស្ទាក់វាយស្លាប់កណ្ដាលផ្លូវ ខណៈពេលយកលុយទៅជូនឪពុកម្ដាយក្នុងឱកាសបុណ្យកាន់បិណ្ឌ ហើយករណីនេះបានបង្កឱ្យមានការភ្ញាក់ផ្អើលឡើង នៅវេលាម៉ោង៨និង៤០នាទីយប់ថ្ងៃទី១៤ កញ្ញា ស្ថិតក្នុងភូមិក្រាំតាសែន សង្កាត់ព្រៃញី ក្រុងពោធិ៍សាត់ ។
សមត្ថកិច្ចឱ្យដឹងថា ជនរងគ្រោះឈ្មោះ សុម៉ាន សុភ័ក្រ ភេទប្រុស អាយុ៣៦ឆ្នាំ ជនជាតិខ្មែរ មានទីលំភូមិតាកុយ សង្កាត់ព្រៃញី ក្រុងពោធិ៍សាត់ ។ ជនរងគ្រោះរហែកខោអាវនិងមានស្នាមជាំពេញខ្លួនដែលអាចត្រូវក្រុមជនមិនស្គាល់មុខ មានគ្នាច្រើនព្រួតគ្នាវាយនឹងដំបងបណ្ដាលឲ្យស្លាប់នៅនឹងកន្លែងកើតហេតុ ។
ប្រភពព័ត៌មានពីមេភូមិឲ្យដឹងថា ជនរងគ្រោះមានទីលំនៅភូមិតាកុយ សង្កាត់ព្រៃញី ក្រុងពោធិ៍សាត់ ប៉ុន្តែទៅធ្វើការនៅឯខេត្តបន្ទាយមានជ័យ ។ នៅថ្ងៃទី១៤ កញ្ញានោះជនរងគ្រោះ ទើបតែមកពីខេត្តបន្ទាយមានជ័យដើម្បីយកលុយមកជូនឪពុកម្ដាយក្នុងឧិកាសបុណ្យកាន់បិណ្ឌនេះ ។ ពេលមកដល់ខេត្តពោធិ៍សាត់មិនទាន់ទៅផ្ទះភ្លាមទេ គឺទៅលេងបងដែលបួសជាសង្ឃនៅវត្តស្រះស្រង់ ។ លុះវេលាម៉ោង២០និង៤០នាទីយប់ ទើបដើរទៅផ្ទះដែលនៅមិនឆ្ងាយពីវត្តប៉ុន្មានទេ ខណៈនោះក៏ត្រូវក្រុមជនមិនស្គាល់មុខស្ទាក់វាយសម្លាប់តែម្ដង ។
ប្រភពព័ត៌មានផ្សេងទៀតនិយាយថា ពេលជនរងគ្រោះហូបបាយក្នុងសាលាឆាន់ ជនរងគ្រោះបានគ្រវែងដបទឹកសុទ្ធតាមបង្អួចត្រូវជញ្ជាំងឡងមកត្រូវក្បាលចាស់ៗដែលកំពុងអង្គុយខាងក្នុង ។ ពេលនោះស្ត្រីចុងភៅម្នាក់បាននិយាយស្ដីបន្ទោស ព្រមទាំងទះកំផ្លៀងចំនួនពីរដៃ ក៏កើតជារឿងទាស់គ្នាបន្តិចបន្តួចរហូតហៅប្រជាការពារមកព្រោងព្រាត ។ ពេលនោះតាអាចារ្យ និងគណៈកម្មការវត្តបានជួយសម្រួលបញ្ចប់រឿងហើយក៏ឱ្យជនរងគ្រោះដើរទៅផ្ទះទាំងយប់ ក៏ស្រាប់តែមានរឿងបែបនេះកើតឡើងតែម្ដងទៅ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
