គ្រាន់តែសំបុត្រចូលមើលការប្រកួត World Cup ឆ្នាំ២០១៨ វគ្គផ្តាច់ព្រ័ត ថ្លៃដល់ម្លឹង

បរទេស៖ សំបុត្រចូលរួមទស្សនាការប្រកួត World Cup ឆ្នាំ២០១៨ នៅប្រទេសរុស្ស៊ី បានចាប់ផ្តើមដាក់លក់ជាផ្លូវការហើយ ដោយតម្លៃសំបុត្រត្រូវបានបែងចែកចេញជា៤ប្រភេទផ្សេងៗគ្នា ទៅតាមវគ្គនៃការប្រកួតនីមួយៗ។ ៤ប្រភេទនៃតម្លៃសំបុត្រនេះ គឺមាន៣ប្រភេទសម្រាប់អ្នកគាំទ្រក្រៅស្រុក (Category 1,2,3) និងប្រភេទទី៤ (Category4) សម្រាប់អ្នកគាំទ្រក្នុងស្រុក ដែលតម្លៃមានលក្ខណៈធូរថ្លៃជាង។

អ្នកគាំទ្រ ក៏ដូចជាអ្នកស្នេហាវិស័យកីឡាបាល់ទាត់អាចធ្វើការបំពេញបែបបទបញ្ជាទិញបាននៅលើវេបសាយរបស់សហព័ន្ធបាល់ទាត់ពិភពលោក ហៅកាត់ FIFA ។

យ៉ាងណាមិញ សម្រាប់តម្លៃសំបុត្រនៅក្នុងព្រឹត្តការណ៍បាល់ទាត់ World Cup ឆ្នាំ២០១៨ បានឡើងថ្លៃជាងមុន ជាពិសេសចំពោះការប្រកួតវគ្គផ្តាច់ព្រ័តតែម្តង ដោយតម្លៃសំបុត្រដែលថ្លៃជាងគេនោះគឺ ៨២៩ផោន ស្មើនឹង ១១១០ដុល្លារ ហើយថោកជាងគេវិញគឺ ៤៥៩ដុល្លារ (សម្រាប់អ្នកគាំទ្រក្រៅប្រទេស)។

ចំនែកប្រជាជនរុស្ស៊ីវិញ គឺមានអាទិភាពខ្ពស់ ព្រោះតម្លៃសំបុត្រមានលក្ខណៈធូរថ្លៃជាង ដោយតម្លៃត្រឹមតែ ១២៣ដុល្លារតែប៉ុណ្ណោះ ក្នុងការប្រកួតវគ្គផ្តាច់ព្រ័ត៕