ស្បែកមុខស្ងួតអាចធ្វើឱ្យគ្មានបញ្ហាស្បែកមុខខ្លាញ់ និងបង្កការកើតមុនលើផ្ទៃមុខក៏ពិតមែន ក៏យើងគួរតែយកចិត្តទុកដាក់ថែរក្សាស្បែកមុខឱ្យបានល្អដែរ។ ស្បែកមុខស្ងួតអាចធ្វើឱ្យស្បែករបស់អ្នកខ្វះជាតិសំណើម បណ្តាលឱ្យមានបញ្ហាជាច្រើនផ្សេងទៀតដូចជា រមាស់ របក ស្ងួត ប្រេះ ជាដើម។
ខាងក្រោមនេះជាវិធីសាស្រ្តធម្មជាតិដែលអ្នកគួរតែអនុវត្ត ដើម្បីព្យាបាលស្បែកមុខស្ងួត និងផ្តល់ជាតិសំណើមលើផ្ទៃមុខ៖
១. ត្រសក់
ត្រសក់មានជាតិទឹកដល់ទៅ ៩០ភាគរយ និងសម្បូរទៅដោយសារជាតិវីតាមីន A និង វីតាមីន C ប៉ូតាស្យូម ម៉ាញ៉េស្បូម កាល់ស្យូម ផូស្វ័រ ជាតិដែក molybdenum, Folate, silica សារជាតិខូឡាជែន និង Fiber កាកសសៃដទៃទៀត ។ សារធាតុអស់ទាំងនោះហើយដែលបានជួយជម្រុញឱ្យស្បែកអ្នកភ្លឺថ្លា និងមានសំណើម។
ការអនុវត្ត៖ យកត្រសក់ក្រឡុកជាមួយទឹកដោះគោក្នុងបរិមាណស្មើគ្នា រួចបន្ថែមទឹកក្រូចពោធិសាត់ ៤ ស្លាបព្រា។ រួចយកមកលាបលើមុខ ទុកចោល ៣០ នាទីរួចលាងទឹកចេញជាការស្រេច។ វិធីនេះមិនត្រឹមតែអាចព្យាបាលស្បែកស្ងួតនោះទេ ថែមទាំងអាចជួយឱ្យស្បែកមុខទន់ ភ្លឺរលោងស្រស់ស្អាតថែមទៀតផង។
២.ប្រទាលកន្ទុយក្រពើ
ប្រទាលកន្ទុយក្រពើពិតជាមានប្រយោជន៍ដ៏លើសលប់សម្រាប់សុខភាពស្បែកមុខរបស់អ្នក។ ប្រទាលកន្ទុយក្រពើសម្បូរដោយជាតិទឹក ជាតិរំអិលសំអាតមុខធម្មជាតិដែលអាចប្រឆាំង និងព្យាបាលការរលាក មេរោគផ្សិត និងបញ្ហាស្បែកមុខស្ងួតបានថែមទៀតផង។
ការអនុវត្ត៖ គ្រាន់តែយកជែលប្រទាលកន្ទុយក្រពើលាបលើស្បែកមុខរបស់អ្នក ២០ នាទី រួចលាងទឹកជាការស្រេច។ វិធីនះអាចជួយកម្ចាត់សារធាតុកខ្វក់ដែលមាននៅលើផ្ទៃមុខ បើរន្ធញើសដើម្បីឱ្យជាតិសំណើមចូលទៅក្នុងផ្ទៃមុខផងដែរ។
៣. ទឹកដោះគោ
ទឹកដោះគោអាចជួយព្យាបាល និងប្រឆាំងការរលាក ហើយថែមទាំងអាចផ្តល់សំណើម និងភាពភ្លឺថ្លាដល់ស្បែកមុខផងដែរ។
ការអនុវត្ត៖ គ្រាន់តែយកសំលីផ្តិតទឹកដោះគោជូតសំអាតមុខ ទុកចោល ១០នាទី រួចលាងជាមួយទឹកក្តៅឧណ្ហៗជាការស្រេច។
៤.ទឹកឃ្មុំ
ទឹកឃ្មុំគឺជាឱសថធម្មជាតិមួយដែលមានគុណសម្បត្តិមហាសាល ដែលអាចព្យាបាល ការពារការរលោក ផ្តល់សំណើមដល់ផ្ទៃមុខ មានសារធាតុប្រឆាំងនឹងមេរោគ និងសារធាតុប្រឆាំងអុកស៊ីកម្មថែមទៀតផង។
ការអនុវត្ត៖ ដោយគ្រាន់តែយកទឹកឃ្មុំលាបលើស្បែកមុខរយៈពេល ១០ នាទី រួចលាងទឹកចេញជាការស្រេច។ ការប្រើប្រាស់វិធីបែបនេះជាប្រចាំអាចព្យាបាលស្បែកមុខស្ងួត ថែមទាំងធ្វើឱ្យស្បែកមុខ ទន់ ភ្លឺថ្លា និងមានសំណើមថែមទៀតផង។
៥.ប្រេងអូលីវ
ប្រេងអូលីវសម្បូរទៅដោយវីតាមីន E ដែលអាចផ្តល់ភាពភ្លឺថ្លា និងធ្វើឱ្យស្បែក មានសំណើម ថែមទាំងមានសារធាតុប្រឆាំងអុកស៊ីតកម្មដែលអាចពន្យាភាពចាស់បានទៀតផង។
ការអនុវត្ត៖ អ្នកអាចប្រើប្រេងអូលីវលាបលើមុខ និងដងខ្លួនបាន រាល់ពេលដែលអ្នកងូតទឹករួច។ វិធីនេះវាផ្តល់ជាតិសំណើមសម្រាប់រូបរាងកាយនិងផ្ទៃមុខ ។
៦. ផ្លែបឺរ
ផ្លែបឺរសម្បូរទៅដោយអាស៊ីដខ្លាញ់ វីតាមីន និងសារធាតុប្រឆាំងអុកស៊ីតកម្មដែលអាចជួយផ្តល់សំណើមដល់ស្បែកមុខ ។ ដើរតួនាទីជាភ្នាក់ងារសំអាតផ្ទៃមុខ និងកាត់បន្ថយនៃភាពចាស់ថែមទៀតផង។
ការអនុវត្ត៖ យកសាច់ក្នុងផ្លែបឺមកលាបលើផ្ទៃមុខ (អាចក្រឡុកឱ្យហ្មត់សិនជាការប្រសើរ) ទុកចោលរយៈពេល ១៥នាទីហើយលាងទឹកចេញ។ អាចអនុវត្តជារៀងរាល់ថ្ងៃ។
ការណែនាំ៖
មូលហេតុចម្បងដែលធ្វើឱ្យស្បែករបស់អ្នកស្ងួត គ្មានជាតិសំណើម បណ្តាលមកពីស្បែករបស់អ្នកខ្វះជាតិទឹក និងត្រូវការជាតិទឹកមកបន្ថែមជាចាំបាច់។ វិធីសាស្រ្តធម្មជាតិខាងលើនេះនឹងមានប្រសិទ្ធភាពបន្ថែមប្រសិនជាអ្នកព្យាយាមផឹកទឹកឱ្យបានច្រើនក្នុងមួយថ្ងៃ បរិភោគបន្លែ និងផ្លែឈើដែលសម្បូរទៅដោយទឹក សារធាតុចិញ្ចឹម និងវីតាមីនឱ្យបានច្រើន៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]