រាជធានីភ្នំពេញ ៖ បុរសរត់រ៉ឺម៉កម៉ូតូម្នាក់ ត្រូវគេចោទថាចោរឆក់ទូរស័ពដៃ ហើយវាយបែកចិញ្ចើមហូរឈាម ខណៈពេលកំពុងតែឈប់ចាំម៉ូយ ឃើញប្តីប្រពន្ធជិះម៉ូតូឈ្លោះប្រកែកគ្នា ជ្រុះទូរស័ព្ទ បានរត់ទៅរើសឲ្យ ត្រូវម្ចាស់ទូរស័ព្ទចោទថាចោរឆក់ទៅវិញ ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង០៩និង៣០នាទី ថ្ងៃទី១១ ខែសីហា ឆ្នាំ២០១៧ ចំណុចខាងលិចរង្វង់មូលចោមចៅ ភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ ។
ជនសង្ស័យដែលជាប់ចោទឈ្មោះ ទឹម ស៊ៀង ហៅវៃ អាយុ៣៨ឆ្នាំ មុខរបររត់រ៉ឺម៉កម៉ូតូនៅរង្វង់មូលចោមចៅ ស្នាក់នៅភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅភូមិធ្លក់យល់ ឃុំពន្លៃ ស្រុកអង្គបុរី ខេត្តតាកែវ ។ ចំណែកម្ចាស់ទូរស័ព្ទឈ្មោះ អ៊ិន សុផានី ភេទស្រី អាយុ២៩ឆ្នាំ មុខរបរចុងភៅ ស្នាក់នៅភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ ។
តាមប្រភពព័ត៌មានពីម្ចាស់ទូរស័ព្ទបាននិយាយថា ៖ មុនពេលកើតហេតុ រូបគាត់ និងប្អូនថ្លៃរបស់គាត់ និងកូនប្រុសម្នាក់ ជិះម៉ូតូចេញពីផ្ទះរបស់ខ្លួន ទៅហូបអាហារនៅជិតរង្វង់មូលចោមចៅ លុះមកដល់ចំណុចកើតហេតុ រូបគាត់កំពុងតែនិយាយទូរស័ព្ទជាមួយប្តី ត្រូវជនសង្ស័យឆក់បាត់ ។
បើតាមប្រភពព័ត៌មានពីកន្លែងកើតហេតុ បាននិយាយថា ៖ នៅមុនពេលកើតហេតុ គេឃើញស្ត្រីជាម្ចាស់ទូរស័ព្ទ បានជិះម៉ូតូម៉ាកវ៉េវ ពណ៌ខ្មៅ មិនចាំស្លាក់លេខ ជិះគ្នា៣នាក់ប្តីប្រពន្ធ និងកូនប្រុស ខណៈពេលជិះនៅលើម៉ូតូឃើញរវល់តែឈ្លោះប្រកែកគ្នា ហើយបានធ្លាក់ទូរស័ព្ទដៃ ស្របពេលនោះជនសង្ស័យដែលជាអ្នករត់រ៉ឺម៉កម៉ូតូចតនៅកន្លែងកើតហេតុបានដើរទៅរើសទូរស័ព្ទឲ្យ បែរជាត្រូវម្ចាស់ទូរស័ព្ទចោទប្រកាន់ថាឆក់ទូរស័ព្ទរបស់គាត់ មិនតែប៉ុណ្ណោះស្ត្រីជាម្ចាស់ទូរស័ព្ទ បានដើរទៅប្តឹងសមត្ថកិច្ចឲ្យមកជួយអន្តរាគមន៍ ដោយប្រាប់ថា គាត់ជិះម៉ូតូជាមួយប្តី និងកូនប្រុសម្នាក់ ស្រាប់តែចោរឆក់ទូរស័ព្ទដៃរបស់គាត់ ហើយប្តីរបស់គាត់មើលតាមកញ្ចក់ម៉ូតូឃើញជនសង្ស័យឆក់ ក៏បានវាយជនសង្ស័យឲ្យបែកចិញ្ចើម រួចហើយស្រាប់តែបុរសជាប្តីជិះម៉ូតូចេញទៅបាត់ បន្ទាប់មកឃើញបុរសម្នាក់ជិះម៉ូតូមួយគ្រឿងទៀតមកដល់ ត្រូវស្ត្រីរងគ្រោះអះអាងថា ជាប្អូនថ្លៃរបស់គាត់ ដែលគាត់ជិះម៉ូតូមកជាមួយពេលកើតហេតុ រីឯប្តីរបស់គាត់នៅឯខេត្តព្រះវិហាទេ មិនមែននៅកន្លែងកើតហេតុទេ ។
ប្រជាពលរដ្ឋនៅកន្លែងកើតហេតុ បានបន្តទៀតថា ៖ ពេលកើតហេតុភ្លាមៗ ស្ត្រីរងគ្រោះអះអាងថា ជិះម៉ូតូជាមួយប្តី ភ្លាមៗនោះពេលដែលស្ត្រីជាម្ចាស់ទូរស័ព្ទទៅដាក់ពាក្យបណ្តឹង បែរជាប្រាប់ថាប្តីរបស់គាត់ ដែលជាអ្នកវាយអ្នករត់រ៉ឺម៉កម៉ូតូ ដែលជាប់ចោទថាចោរឆក់ទូរស័ព្ទនោះ នៅខេត្តព្រះវិហារ ហើយគាត់ជិះម៉ូតូជាមួយប្អូនថ្លៃទៅវិញ ។
ទោះបីជាយ៉ាង ក្រោយពេលកើតហេតុ ជនរងគ្រោះម្ចាស់ទូរស័ព្ទបានដាក់ពាក់បណ្តឹង ហើយសមត្ថកិច្ចបានកសាងសំណុំរឿងបញ្ជូនជនសង្ស័យទៅជំនាញព្រហ្មទណ្ឌខណ្ឌ ដើម្បីចាត់ការតាមនីតិវិធី ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]