រាជធានីភ្នំពេញ ៖ យុវជន២នាក់របួសធ្ងន់ និងម្នាក់ទៀតបាក់ធ្មេញ ក្នុងគ្រោះថ្នាក់ចរាចរណ៍មួយបង្កឡើងដោយរថយន្តបុកគ្នាជាមួយម៉ូតូ កាលពីវេលាម៉ោង១និង២០នាទីរំលងអធ្រាត្រឈានចូលថ្ងៃទី៦ មីនា នៅលើកំណាត់ផ្លូវលេខ៣១០កែងផ្លូវលេខ១០៥ ក្នុងសង្កាត់បឹងកេងកងទី៣ ខណ្ឌចំការមន ។
ជនរងគ្រោះឈ្មោះអុក ទ័រ ភេទប្រុស អាយុ២៣ឆ្នាំ ស្នាក់នៅផ្ទះជួលសង្កាត់បឹងត្របែក ខណ្ឌចំការមន មានស្រុកកំណើតនៅឃុំស្វាយធំ ស្រុកស្វាយជ្រុំ ខេត្ដស្វាយរៀង រងរបួសបាក់ភ្លៅឆ្វេង និងបែកក្បាល ម្នាក់ទៀតឈ្មោះប៉ែត ភេទប្រុស អាយុ២០ឆ្នាំ ស្នាក់នៅបន្ទប់ជួលជិតគ្នារបួសបែកក្បាលហូរឈាមស្រោចពេញផ្ទៃមុខ ដោយឡែកម្នាក់ទៀតបាក់ធ្មេញអត់ស្គាល់អត្តសញ្ញាណទេ ។
ប្រភពព័ត៌មានបានឱ្យដឹងថា មុនពេលកើតហេតុគេឃើញម៉ូតូសង់កូរ៉េ ពណ៌ក្រហម ជិះគ្នា៣នាក់ តាមផ្លូវលេខ៣១០ ពីកើតទៅលិច ចំណែករថយន្ដកាមរី ពណ៌ទឹកប្រាក់ ធ្វើដំណើរតាមផ្លូវលេខ៣១០ ពីលិចទៅកើតក្នុងទិសដៅបញ្ច្រាសគ្នា ខណៈមកដល់ផ្លូវកែងលេខ១០៥ ម៉ូតូសង់កូរ៉េក៏បត់ឆ្វេងទទឹងផ្លូវធ្វើឱ្យរថយន្ដដែលកំពុងតែបើកលឿនចាប់ហ្វ្រាំងមិនទាន់ក៏បុកម៉ូតូពេញទំហឹងដួលប្រាវដេករដូករណែលពេញថ្នល់រងរបួសទាំង៣នាក់ ចំណែករថយន្ដកាមរីបើកគេចបាត់ស្រមោល ។
ក្រោយពេលកើតហេតុជនរងគ្រោះរបួសធ្ងន់២នាក់ត្រូវរថយន្ដសង្គ្រោះដឹកយកទៅព្យាបាលនៅគ្លីនិកឯកជន ចំណែកជនរងគ្រោះដែលបាក់ធ្មេញនោះ បានគេចខ្លូនទៅបាត់ដែរ ហើយម៉ូតូត្រូវសមត្ថកិច្ចយកទៅរក្សាទុកឱ្យនៅអធិការដ្ឋានខណ្ឌចំការមន ៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
