ខេត្តកំពង់ធំ ៖ លោកវរៈសេនីយ៍ត្រី យន់ ឆៃយាន អធិការរងនគរបាស្រុកកំពង់ស្វាយ ទទួលបន្ទុកខាងសណ្តាប់ធ្នាប់ បានប្រាប់ កោះសន្តិភាព ឲ្យដឹងនៅព្រឹកថ្ងៃទី២០ ខែកក្កដា ឆ្នាំ២០១៧ថា មានករណីក្មេងប្រុសម្នាក់ អាយុ១៥ខែ បានលង់ទឹកប្រឡាយមុខផ្ទះស្លាប់។ ហេតុការណ៍នេះបានកើតឡើងកាលនៅល្ងាចថ្ងៃទី១៩ ខែកក្កដា ឆ្នាំ២០១៧ ស្ថិតនៅចំណុចប្រឡាយទឹកមុខផ្ទះរបស់ជនរងគ្រោះក្នុងភូមិសាន់គរ(ខ) ឃុំសាន់គរ ស្រុកកំពង់ស្វាយ ខេត្តកំពង់ធំ។
លោកអធិការរងបន្តរថា បើយោងតាមការបញ្ជាក់របស់សាច់ញាតិកុមាររងគ្រោះប្រាប់ថា កាលពីល្ងាចថ្ងៃកើតហេតុ ខណៈឪពុកកុមារារងគ្រោះឈ្មោះ អិត ណូយ អាយុ២៨ឆ្នាំ និងម្តាយឈ្មោះ កង តាំងអ៊ី អាយុ២៦ឆ្នាំ នៅផ្ទះដែរ តែមិនបានយកចិត្តទុកដាក់ពីបញ្ហាកូនរបស់ខ្លួននោះឡើយ ដោយបណ្តោយឲ្យកូនតូចរបស់ខ្លួនទើបតែមានអាយុ១៥ខែចេះដើរតិចៗដើរលេងដោយមិនបានយកចិត្តទុកដាក់ចំពោះសុវត្ថិភាពកូនតូចនោះឡើយ។
មួយសន្ទុះក្រោយពីបាត់កូនយូរក៏នាំគ្នាដើរស្វែងរកទើបប្រទះ ឃើញសាកសពកូនប្រុសឈ្មោះ ណូយ ផានិត អាយុ១៥ខែ បានលង់ទឹកប្រឡាយមុខផ្ទះស្លាប់យ៉ាងអាណោចអាធ័មបាត់ទៅហើយ។ គួបញ្ជាក់ថាប្តីប្រពន្ធទាំងពីរនាក់ខាងលើទើបតែបានកូនប្រុសម្នាក់នេះ និងកំពុងតែពពោះម្នាក់ទៀត បន្ទាប់ពីមានការយំសោកបោកខ្លួនដោយស្តាយស្រណោះកូន ខណៈសាច់ញាតិយកទៅធ្វើបុណ្យតាមប្រពៃណី៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
