រាជធានីភ្នំពេញ ៖ បុរសសិង្ហបុរីម្នាក់ដែលជាប់ពាក់ព័ន្ធ ករណីឆបោកប្រាក់ជាង៣លានដុល្លារអាមេរិក បានដួលសន្លប់នៅមុខបន្ទប់ចៅក្រម ធ្វើឲ្យភ្ញាក់ផ្អើលកាលពីវេលាម៉ោង១២ថ្ងៃត្រង់ថ្ងៃទី២៦ មិថុនា ២០១៧នេះ ខណៈនោះដែរក៏បានលេចមុខលោកឧកញ៉ា ឌួង ឆាយ ខ្នះខ្នែងជួយនាំទៅពេទ្យ។ គួរបញ្ជាក់ថា បុរសសិង្ហបុរីឈ្មោះ ENG WEI KHIONG ភេទប្រុស អាយុ៣៤ឆ្នាំ ដែលជានាយកគ្រប់គ្រងបច្ចេកទេសឲ្យក្រុមហ៊ុន ស៊ីឃ្យួរខម មេឌា ខេមបូឌា (SECURECOM MEDIA) CO.LTD ត្រូវបានសមត្ថកិច្ចនគរបាលព្រហ្មទណ្ឌក្រសួងមហាផ្ទៃ ចាប់ខ្លួនកាលពីល្ងាចថ្ងៃទី២៣ មិថុនា នៅព្រលានយន្តហោះអន្តរជាតិភ្នំពេញ តាមបណ្តឹងលោកមេធាវីការពារឲ្យអតិថិជនជាង១០០នាក់ របស់ក្រុមហ៊ុន ស៊ីឃ្យួរខម មេឌា ខេមបូឌា នោះ។
ក្រោយពេលឃាត់ខ្លួនជនសង្ស័យឈ្មោះ ENG WEI KHIONG ត្រូវបានសមត្ថកិច្ចនាំទៅកាន់សាលាដំបូងរាជធានីភ្នំពេញ កាលពីព្រឹកថ្ងៃទី២៥ មិថុនា ដែលសំណុំរឿងនេះបានស្ថិតក្នុដៃលោក ហ៊ឹង ប៊ុនថន ព្រះរាជអាជ្ញារងធ្វើការសាកសួរ។ ក្រោយពេលសាកសួរចប់ហើយ នាល្ងាចថ្ងៃដដែលនោះ តំណាងអយ្យការបានប្រគល់ជនសង្ស័យទៅសមត្ថកិច្ចវិញ លុះព្រឹកថ្ងៃទី២៦ មិថុនា ឲ្យយកមកសាកសួរបន្ត រហូតដល់ថ្ងៃត្រង់ លោក ហ៊ឹង ប៊ុនថន បានចោទប្រកាន់ជនសង្ស័យជាផ្លូវការក្រោមបទឆបោក តាមមាត្រា៣៧៧.៣៧៨ នៃក្រមព្រហ្មទណ្ឌ។ ពេលតំណាងអយ្យការចោទប្រកាន់ហើយជនសង្ស័យបានចាត់បញ្ជូនទៅខាងចៅក្រមស៊ើប ដើម្បីសម្រេចឃុំខ្លួនដាក់ពន្ធនាគារជាបណ្តោះអាសន្ន។ ខណៈចៅក្រមមិនទាន់បានសាកសួរផង ជនសង្ស័យបានដួលសន្លប់នៅមុខបន្ទប់ ធ្វើឲ្យមានការភ្ញាក់ផ្អើល ពេលនោះបានលេចមុខលោកឧកញ៉ា ឌួង ឆាយ ទៅខ្នះខ្នែងហៅរថយន្តសាមុយដឹកជនសង្ស័យទៅសង្រោះនៅមន្ទីរពេទ្យកាល់ម៉ែត្រ។
សមត្ថកិច្ចឲ្យដឹងថា ជនសង្ស័យមានជំងឺបេះដូង ដែលជំងឺនេះឲ្យតែមានការភ័យខ្លាចគឺប្រតិកម្មភាម។ ឧកញ៉ា ឌួង ឆាយ តាមជនសង្ស័យទៅដល់មន្ទីរពេទ្យ ក្នុងគោលបំណងជួយផ្គត់ផ្គង់ទាំងអាហារ និងការព្យាបាលលើជនសង្ស័យ ដែលលោកឧកញ៉ាពោលពាក្យថា គេ (ENG WEI KHIONG)ជាមិត្តភក្តិ ទំនាក់ទនងការងាររកស៊ីជាមួយគ្នា បានជាតាមជួយមើលដូច្នេះ។ បើទោះបីជនសង្ស័យគាំងបេះដូងដួលសន្លប់ចូលពេទ្យយ៉ាងនេះក្តី នីតិវិធីរបស់តុលាការនៅដំណើរទៅមុខ នៅវេលារសៀលថ្ងៃដដែលនោះ លោក ហន សុខេមរិន ចៅក្រមស៊ើបសួរ បានសម្រេចចេញដីកាឃុំខ្លួនលើជនជាតិសិង្ហបុរីរូបនោះ នៅពេលសុខភាពជនសង្ស័យបានធូស្រាល តម្រូវឲ្យសមត្ថកិច្ចនាំទៅពន្ធនាគារតែម្តង៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]